ރާއްޖެއިން ފުރައިގެންދާ ބިދޭސީންގެ 10 އިނގިލީގެ ނިޝާން ސިސްޓަމަށް އިންސްޓޯލް ކުރެވިފައިވާތީ، މިގައުމަށް އަންނަ ބިދޭސީންގެ އައިޑެންޓިޓީ، މޯލްޑިވްސް އިމިގްރޭޝަނަށް ނޭނގި ނުދާނެ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.
މިނިސްޓަރު މިގޮތަށް ވިދާޅުވީ އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނެވެ.
މި ބައްދަލުވުމުގައި ނޫސްވެރިޔަކު ވަނީ މީގެ ކުރިންވެސް ރާއްޖެއަށް އަންނަ މީގެ ކުރިން ޑީޕޯޓްކޮށްފައިވާ ބައެއް ބިދޭސީން ސިފަބަދަލުކޮށްގެން ރާއްޖެ އައިސްފައިވާ ކަން ފާހަގަކޮށްފަ އެވެ. އެ ނޫސްވެރިޔާ ކުރި ސުވާލަށް ޖަވާބުދެއްވަމުން މިނިސްޓަރު ވަނީ މީގެ ކުރީގައި އިމިގްރޭޝަނުން ރާއްޖެ އެތެރެވާ ބިދޭސީންގެ އައިޑެންޓިޓީ ބެލީ ހަމައެކަނި ޕާސްޕޯޓް ނަމްބަރުން ކަން ފާހަގަކުރައްވާފަ އެވެ. ނަމަވެސް، މިހާރު އިމިގްރޭޝަންގައި ބިދޭސީންގެ ބަޔޯމެޓްރިކް ޑޭޓާ ހުރީތީ، ސިފަބަދަލުކޮށްފައިވާ ބިދޭސީއަކަށްވެސް ރާއްޖެ އެތެރެނުވެވޭނެ ކަމަށް ވިދާޅުވި އެވެ.
“ކުރީގައި މި ޖެހޭ މައްސަލައަކީ ފުރައިގެންދާއިރުވެސް، އަޅުގަނޑުމެންގެ ޑޭޓާބޭސްގައި ބަޔޯމެޓްރިކްސް ނެގިފައި ނެތުން. އެހެން ނަމަވެސް، ވަކި ހިސާބަކުން ފެށިގެން ނެގެމުން އެބަދޭ. މިހާރު މި ހުރިހާ ބިދޭސީއެއް ރާއްޖެ އެތެރެވާއިރުވެސް ބޭރުވާއިރުވެސް އަޅުގަނޑުމެން އެބަ ކަށަވަރުކުރަން ބަޔޯމެޓްރިކްސް”
މިހާރު ހޯމް މިނިސްޓްރީން ދަނީ ލިޔެކިޔުން ނެތް ބިދޭސީން ގަވާއިދުގެ ތެރެއަށް ވެއްދުމަށް “ކުރަނގި” ނަމުގައި ހާއްސަ އޮޕަރޭޝަނެއްވެސް ކުރިއަށްގެންދަމުން ނެވެ. އެ އޮޕަރޭޝަންގެ ދަށުން މިހާރު ދަނީ ރާއްޖޭގައި ތިބި ހުރިހާ ބިދޭސީންގެ ބަޔޯމެޓްރިކްސް ނަގާ، މީގެ ކުރިން ބަޔޯމެޓްރިކްސް ނެގިފައިވާ ބިދޭސީންގެ އިނގިލީގެ ނިޝާން އަލުން ނެގުމުގެ މަސައްކަތް ކުރަމުން ނެވެެ.
ނިމިދިޔަ ސަރުކާރުން ވަނީ ބަންގްލަދޭޝްއިން ރާއްޖެއަށް އެތެރެވާ ލޭބަރުންގެ ކޯޓާ ލިމިޓް ކޮށްފަ އެވެ. މި ސަރުކާރުން ވެރިކަމާއި ހަވާލުވިފަހުން ވަނީ އެ ލިމިޓް އުވާލާފަ އެވެ. އެކަމަކު، ނުގަވާއިދުން އުޅޭ ބިދޭސީންގެ މައްސަލަ ހައްލުވަންދެން މިހާރު ވަނީ ބަންގްލަދޭޝްގެ ލޭބަރުން ރާއްޖެ ނާންނަ ގޮތަށް ވަގުތީ ފިޔަވަޅު އަޅާފަ އެވެ.
