ހިތުގެ ތެޅުން އަވަސްވުމަކީ ވަރަށް ގިނަ މީހުންނަށް ދިމާވާ ކަމެކެވެ. ވަރަށް ގިނަ މީހުން ދެކޭ ގޮތުގައި ހިތުގެ ވިންދު އަވަސްވުމަކީ ހިތުގެ ބައްޔެއްގެ ސަބަބުން މެދުވެރިވާ ކަމެކެވެ. އެހެންކަމުން މާބޮޑަށް ހިތްތެޅި ހިތުގެ ވިންދު އަވަސްވުމަކީ އޭގެ ސަބަބުން އެމައްސަލަ ދިމާވާ މީހާ ހާސްވެ ކަންބޮޑުވާ ކަމެކެވެ. ނަމަވެސް ހިތުގެ ވިންދު އަވަސްވުމަށް މެދުވެރިވާ ވަރަށް ގިނަ ސަބަބުތައް ހުރެއެވެ.
މިފަހަރު މި ހިމަނާލަނީ ހިތުގެ ވިންދު އަވަސްވުމަށް މެދުވެރިވާ ބައެއް ސަބަބުތަކެވެ.
އެންޒައިޓީ ނުވަތަ ޕެނިކު އެޓޭކު
އެންޒައިޓީގެ ސަބަބުން މީހާގެ ހިތުގެ ތެޅުން އަވަސްވެ މީހާގެ ހިތުގެ ވިންދު އަވަސްވާ ގޮތް ވެއެވެ. މިކަން މެދުވެރިވަނީ ކޮންމެވެސް ކަމެއްގެ ސަބަބުން މީހާގެ ހިތުގައި ބިރުވެރިކަން އުފެދި ހިތް ނުތަނަވަސްވާތީއެވެ. ބައެއް ހާލަތްތަކުގައި މާބޮޑަށް ހާސްވުމުގެ ސަބަބުން މީހާއަށް ޕެނިކު އެޓޭކު ވެސް ޖެހެއެވެ. މިފަދަ ހާލަތްތަކުގައި ވެސް މީހާގެ ހިތުގެ ތެޅުން އަވަސްވެ ވިންދު އަވަސްވެއެވެ.
ޑީހައިޑްރޭޓުވުން
މީހާގެ ހަށިގަނޑަށް ބޭނުންވާ ވަރަށް ފެން ނުލިބި ޑީހައިޑްރޭޓު ވުމުންވެސް ހިތުގެ ވިންދު އަވަސްވެ ހިތް ތެޅޭ ގޮތް ވެއެވެ. މިކަން މިހެންވަނީ ހަށިގަނޑުގައި ހުންނަ އިލެކްޓްރޮލައިޓުތައް އެއް ހަމައެއްގައި ނުހިފެހެއްޓޭތީއެވެ. އަދި އިލެކްޓްރޮލައިޓުތައް ހަށިގަނޑަށް ބޭނުންވާ ވަރަށް ފޯރުކޮށްދިނުމަށްޓަކައި ހިތުން އިތުރަށް މަސައްކަތްތަކެއް ކުރަންޖެހޭތީއެވެ.
ހުން އައުން
މާބޮޑަށް ހުން ގަދަވުމަކީވެސް މީހާގެ ހިތުގެ ވިންދު އަވަސްވުމަށް މެދުވެރިވާ ސަބަބެކެވެ. މިކަން މިހެންވަނީ ހުން އައުމުގެ ސަބަބުން މީހާގެ މުޅި ހަށިގަނޑު ހޫނުވެ، އިންޕެކްޝަންތަކާ ދެކޮޅަށް މަސައްކަތް ކުރުމަށްޓަކައި ހިތުގެ މަސްތައް އިތުރަށް މަސައްކަތް ކުރަން ޖެހޭތީއެވެ.
ހޯމޯނަލް އިމްބެލެންސް
ހަށިގަނޑުގައި ހުންނަ ހޯމޯނުތަކަށް އަންނަ ބަދަލުތަކުގެ ސަބަބުންވެސް މީހާގެ ހިތް ތެޅޭ ވަރު އަވަސްވެ ހިތުގެ ވިންދު އަވަސްވެއެވެ. މިހެން މިކަންމެދުވެރިވަނީ ހޯމޯނުތަކަށް އަންނަ ބަދަލުތަކުގެ ސަބަބުން ހިތުގެ މަސައްކަތްތަކަށް އަސަރު ކުރާތީއެވެ.
