ރުޅި އަކީ އަޅުގަނޑުމެން އެންމެންގެ ކިބައިގައިވެސް ހުންނަ ސިފައެކެވެ. ނަމަވެސް ބައެއް މީހުންނަށް އެމީހުންގެ ރުޅި ކޮންޓުރޯލު ކުރުން ވަނީ ވަރަށް އުނދަގޫ ކަމަކަށެވެ. ކަންކަމުގައި މާ އަވަހަށް ރުޅި އިސްކުރާނަމަ އޭގެ ސަބަބުން އެމީހަކަށް ބޮޑެތި ގޮންޖެހުންތަކާއި ގެއްލުންތައްވެސް ކުރިމަތިވެއެވެ. ތިރީގައި މި ހިމަނާލަނީ މާ ގަދަޔަށް ރުޅި އިސްކުރެވޭނަމަ އެކަން ރަނގަޅު ކުރުމަށް ކުރެވޭނެ ބައެއް ކަންކަމެވެ.
ބްރީތިން އެކްސަސައިޒް
ރުޅިގަދަވާ ގަޑިތަކުގައި ބްރީތިން އެކްސަސައިޒުތައް ކުރުމަކީ މީހާގެ ރުޅި މަޑުވެ މީހާވެސް މަތަވާ ކަމެކެވެ. ދިރާސާތަކުން ދައްކާ ގޮތުގައި ރުޅިގަދަވާ ގަޑިތަކުގައި ނޭވާލާ މިންވަރަށް ސަމާލުކަން ދޭނަމަ މީހާގެ ނާރުތަކުގެ ނިޒާމު ހައްމަތަވެ، އޭގެ ސަބަބުން މީހާ ރުޅިމަޑުވެއެވެ. އެހެންކަމުން ރުޅިގަދަވާ ވަގުތުތަކުގައި ފުންކޮށް ނޭވާލުމުން ހިތާމަ ކުރަންޖެހޭ ފަދަ ކަމެއްް މެދުވެރި ނުވަނީސް ރުޅި މަތަވެއެވެ.
ކޮގްނިޓިވް ބިހޭވިއަރަލް ތެރަޕީ
ކޮގްނިޓިވް ބިހޭވިއަރަލް ތެރަޕީ (ސީބީޓީ) އަކީ މީހާއަށް ކުރެވޭ ނުރަނގަޅު ހިޔާލުތަކާ އޭނާ ދުރު ކުރުމަށްޓަކައި ނަފްސާނީ ބަލީގެ މާހިރުން ބޭނުން ކުރާ އުކުޅެކެވެ. ސީބީޓީ ނެގުމުން ކަންކަމާ ކުރިމަތިލާ ގޮތް ބަދަލުވެ، ރުޅިމަޑުކުރުމަށްފަހު ވިސްނުންތެރިކަމާއެކު ކަންކަމާ ކުރިމަތިލެވެއެވެ. އެހެންކަމުން މާ ގަދައަށް ރުޅިގަދަވެ ”އެންގާ އިޝޫ“ ހުންނަ ނަމަ ނަފްސާނީ ބަލީގެ މާހިރަކާ ވާހަކަ ދައްކައި ސީބީޓީ ނެގަން ޖެހެއެވެ.
ބްރޭކެއް ނެގުން
ބައެއް ފަހަރު މީހާ ރުޅިގަދަވަނީ މާ ބޮޑަށް ކަންކަމާ ފިކުރު ބޮޑުވެ ސްޓްރެސް ވުމުގެ ސަބަބުން ކަމަށް ވެދާނެއެވެ. އެހެންކަމުން މާބޮޑަށް ރުޅިގަދަވެ ގޯހެއް ހެދެން އުޅޭހެން ހީވާ ގަޑިތަކުގައި އެ ކުރަން ހުރި ކަމެއް ހުއްޓާލުމަށްފަހު އެކަމަކުން ބްރޭކެއް ނެގުމަކީ ވަރަށް މުހިންމު ކަމެކެވެ. މިހެން ބްރޭކު ނެގުމުން މީހާގެ މޫޑު ރަނގަޅުވެ، ސްޓްރެސް ދައްވެއެވެ. އަދި އޭގެ ސަބަބުން ރުޅި ވެސް މަތަވެއެވެ.
