މި އަހަރު ބ. ކަމަދޫގައި ބޭއްވި ބޮޑު އީދުގެ ޝޯތަކުން މަގްބޫލުކަން ހޯދި ނެށުންތެރިޔާ ޒާރާ އާއި ރައްޔިތުންގެ މަޖިލީހުގެ މީދޫ ދާއިރާގެ މެމްބަރު، އަހުމަދު ސިޔާމްގެ ކައިވެނީގެ ތައްޔާރީތައް ވަރަށް ފޯރީގައި ކުރިއަށްދާ ކަން އެނގިއްޖެއެވެ.
އެނގިފައިވާ ގޮތުގައި ކައިވެނީގެ ކުރިން ޒާރާގެ ރައްޓެހިންތަކެއް ވަނީ އޭނާ އަށް ”ބްރައިޑަލް ޝަވާ“އެއް ވެސް ދީފައެވެ. މިއީ އަލަތު ކައިވެނި ކުރާ މީހުންނަށް ހާއްސަކޮށްގެން ބާއްވާ ހަފްލާއެކެވެ. ބްރައިޑަލް ޝަވާއަކީ ރާއްޖޭގައި މިހާރު ވަރަށް ބޮޑު ޓްރެންޑެކެވެ.
ޒާރާ އާއި ސިޔާމްގެ ކައިވެނި ބޭއްވުމަށް ހަމަޖެހިފައި ވަނީ އަންނަ މަހުގެ 10 ގައެވެ.
ޒާރާ އާއި އޭނާގެ އާއިލާ އިން ވެސް މި ކައިވެންޏަށް ގަބޫލެވެ. މި ފަހުން ޒާރާގެ އާއިލާގެ މެމްބަރުން ވަނީ ފަސް ތަރީގެ ލަގްޒަރީ ރިސޯޓެއް ކަމަށްވާ ސިޔާމް ވޯލްޑަށް ގެންގޮސް ޗުއްޓީ ހޭދަކޮށްލުމުގެ ފުރުސަތު ވެސް ދީފައެވެ. ޒާރާގެ އާއިލާގެ މެމްބަރުން ބަލާ އައި ކަމަށްވަނީ އެއާ ޓެކްސީގައެވެ.
ޒާރާ މި ފަހަކާ ޖެހެންދެން މަސައްކަތްކޮށްފައި ވަނީ ކަމަދޫގެ ކައުންސިލް އިދާރާގެ މުވައްޒަފެއްގެ ގޮތުގައެވެ. އެކަމަކު، ޒާރާ މިހާރު ވަނީ ކައުންސިލް އިދާރާ އިން ވަކިވާން ސިޓީ ވެސް ފޮނުވައިފައެވެ. ޒާރާ ސިޔާމް އާއި ކައިވެނި ކުރަން ރަން ކިޔާފައިވަނީ ވެސް ދެ ގެސްޓްހައުސްއެއްގެ އަގަށް ކަމަށްވެއެވެ.
ސިޔާމް އާއި ޒާރާގެ ކައިވެނީގެ ވާހަކަތައް ދެކެވެމުން އަންނަ މި ދަނޑިވަޅުގައި ސިޔާމްގެ އެހީގައި ކަމަދޫގެ ހުރިހާ ރައްޔިތުންނަށް އުސޫލެއްގެ ތެރެއިން ހިލޭ ބޭސްފަރުވާ ކުރެވޭނެ ގޮތް ވެސް ވަނީ ހަމަޖައްސަވާފައެވެ.
ޒާރާއަކީ މިދިޔަ ބޮޑު އީދުގެ ތެރޭގައި ބ. ކަމަދޫގައި ބޭއްވި ކުޅިވަރުތަކުން ގިނަ ބަޔަކަށް ފާހަގަވެ، އޭނާގެ ހުނަރުން މަގުބޫލުކަން ހޯދި ޒުވާނެކެވެ.
