ދުނިޔެ އޮތީ ނިދާފައެވެ. ހަމަހިމޭންކަމުގެ ސާލެއްގައެވެ. އަރާމު ނިންޖެއްގެ ހަމަހިމޭންކަމުގައި އޮތް ދުނިޔެ އަށް އެތައްބަޔެއްގެ ފާޑުކިޔުންތައް ދަނީ އަމާޒުވަމުންނެވެ. ނަމަވެސް ބީރު ކަންފަތެއް ދިނުމަށްފަހު ބާލީސްދަށަށް ބޯ ކޮށްޕާލާފަ އޮތް އަދުގެ ދުނިޔެ ސިއްސުވާލީ އާރެއް ބާރެއްނެތް، ހަމައެކަނި ބޮނބި އާއި ވެލިން މައިދާނުން ކާމިޔާބު ހޯދިދާނެ ކަމަށް ޤަބޫލު ކުރެވޭ، ކުޑަކުޑަ ގައުމެއްގެ ވެރިއެކެވެ.
އާދެ! ދައްކަން މިއުޅޭ ވާހަކައަކީ ރާއްޖޭގެ ރައީސުލްޖުމްހޫރިއްޔާ ރައީސް ޑރ. މުހައްމަދު މުއިއްޒު އދ. ގެ އާންމު މަޖިލީހުގައި ތަގްރީރް ކުރައްވަމުން ދެއްކެވި ފުރިހަމަ ނަމޫނާއާއި ދެއްކެވި މިސާލުތަކުގެ ވާހަކައެވެ.
ދުނިޔޭގެ ބޮޑެތި ބާރުތަކާ ދެކޮޅަށް ދެއްވި ބާރުގަދަ ބަހުގެ ހަމަލާތަކެވެ. ދުނިޔެ ސިއްސުވާލި މި ލީޑަރަށް ހަގީގަތުގަވެސް ޝުކުރު ހައްގެވެ.
ފަލަސްތީނުގެ ހައްގުގައި ރައީސް ދެއްކެވި ވާހަކަފުޅުތަކުން ކޮންމެ އިސްލާމީ ވެރިއަކުވެސް މިއަދު މިސާލުނަންގަވަންޖެހެއެވެ.
ދުނިޔެ ރޮއްވާލާ އެތަކެއް ގަތުލު އާންމެއް ހިންގަމުންދާ ގައްދާރު ބެންޖަމިން ނަތަންޔާހޫ އަށްވެސް މިއަދު ފެނިގެންދާނީ ދިވެހިންނާއި ދިވެހި ގައުމުގެ އަސްލު ސްޓޭންޑެވެ. އދ. ގެ އާންމު މަޖިލީހުގައި އިސްރާއިލުގެ ރައީސެއްގެ ހައިސިއްޔަތުން ވާހަކަ ދައްކަވަން ފެއްޓެވުމުން ދިވެހި ވަފްދު އެ ހޯލުން ނުކުތް ނުކުތުމަކީވެސް ދިވެހިން އިސްރާއީލުގެ އަނިޔާވެރިކަމަށް ހިތް ނުރުހޭ ކަމާއި، ދިވެހިން ތިބީ ފަލަސްތީނުގެ ހައްގުގައިކަން މުޅި ދުނިޔެއަށް ސާބިތު ކޮށްދިން ހެއްކެކެވެ.
ދުނިޔޭގެ ގައުމުތަކުން ބޮޑެތި ހަނގުރާމަތައް ކުރަމަކީ އާންމުކަމެވެ. އަދި މައްސަލައިގެ ބާވަތުން ބައެއްފަހަރު އާމާންދީ ހަނގުރާމައިން ފެޔަށްވެސް ޖެހެއެވެ. ނަމަވެސް މިހާރު އިޒްރޭލުން ފަލަސްތީނަށް ދެމުންދާ ހަމަލާތައް މެދުކެނޑުމެއްނެތި ދެމުން ގެންދިއުމަކީ މުޅި ދުނިޔެވެސް އެކަމުގައި ޝާމިލް ވާން ޖެހޭ ކަމެކެވެ. ރައީސްގެ ތަގްރީރުގައި ވިދާޅުވީ އދ.ގެ ޤަރާރުތަކާއި ބައިނަލްއަޤުވާމީ ޤާނޫނުތަކާއި ޚިލާފުވެ، އިޒްރޭލުން ފަލަސްތީނުގެ ރައްޔިތުންގެ ޙައްޤުތައް ނިގުޅައިގަންނަމުންދާ ދިއުމަކީ ބަލައިގަނެވޭނެ ކަމެއްނޫން ކަމަށެވެ. އަދި ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަތުމަށް ބައިނަލްއަޤްވާމީ ގޮތުން ކުރެވޭ މަސައްކަތް ކުރެވެން ޖެހޭނެ ކަމަށެވެ.
ރައީސް ވިދާޅުވެފައިވަނީ އެ ޖަރީމާތަކުގެ ސަބަބުން، އަންހެނުންނާއި ކުޑަކުދިންނާއި ތުއްތު ކުދިން ހިމެނޭހެން، ފަލަސްޠީނުގެ އެތައް ހާސް ރައްޔިތުންނެއް މަރުވެ، ޒަޚަމްވަމުންދާކަން ހަނދާނުން ފޮހެވިގެންނުދާ ކަމަށެވެ. އަދި ފަލަސްޠީނުގެ ރައްޔިތުންގެ ގެދޮރާއި، ހަސްފަތާލުތަކާއި، ސްކޫލްތައް ސުންނާފަތިކޮށް އިންސާނީ އެހީތެރިކަމަށް ހުރަސްއަޅާ، ހަމަލާތަކުގައި ޣައްޒާގެ ކުށެއްނެތް ޢާންމުން މަރުވަމުންދާ މިންވަރު ދުނިޔެއަށް ބަލައިނުގަނެވިގެން އުޅެނިކޮށް، މިހާރު އިސްރާއީލުން ލުބްނާނަށް ޙަމަލާދީ، އެ ޙަމަލާތަކުގައި އެތައް ސަތޭކަ ޢާންމުންނެއް މަރުވަމުންދާދިއުމަކީވެސް ބަލައިގަންނަން ދަތިކަމެއްކަމަށެވެ.
ފަލަސްޠީނާއި ލުބްނާން އަދި އަލްޖަޒީރާގެ ނޫސްވެރިންނަށް އަމާޒުކޮށް ދެމުންދާ ޙަމަލާތަކާއި އަލްޖަޒީރާގެ އޮފީސްތައް ބަންދުކުރި ކުރުމަކީ، ޣައްޒާގައި ހިންގަމުންދާ ޖަރީމާތައް ދުނިޔެއަށް ވަންހަނާކުރުމަށް ކުރި މަސައްކަތެއް ކަމަށެވެ. ރައީސް ގެ ތަޤްރީރުގައި މިފަދަ މޭރުމަކުން ވާހަކަފުޅު ދައްކަވާފައިވާއިރު، ލޯ ކުރިމަތިން އިންސާނީ ނަސްލެއް އެދަނީ ނެތިވެ ފަނާވަމުންވެ.
ބަސް ބުނާނެ ބަޔަކުނެތި، ގިނިކަންޏާ އެކަނި އޮވެ ފަލަސްތީން ވީރާނާވަމުންދާއިރު، ރައީސް މުއިއްޒުގެ ބަސްތަކުން ހަގީގަތުގަވެސް މުޅި ދުނިޔެއަށް އަސަރުކުރާނެ ކަމަށް ބެލެވެއެވެ. ސަބަބުތައް ބައިވަރެވެ. ވަރުގަދަ ބަހުގެ ހަމަލާތަކާއެކު، އދގެ އެންމެ ބާރުގަދަ ގުނަންކަމަށްވާ، ސަލާމަތީ މަޖިލީހުގެ ދާއިމީ މެމްބަރުންނަށް ދީފައިވާ ވީޓޯކުރުމުގެ ބާރު އުވާލުމަށްވެސް ރައީސް މުއިއްޒު ވަނީ ގޮވާލައްވާފައެވެ. ރައީސް މުއިއްޒު ވިދާޅުވީ ވީޓޯ ކުރުމުގެ ބާރަކީ އދ. ގެ އެންމެ ބާރުގަދަ ގުނަންކަމަށް ވިޔަސް މިއަދު ލޯކުރިމަތިން ފެންނަނީ ބައިނަލްއަޤްވާމީ ޤާނޫނުތައް ނަގަހައްޓާ، މި ޤަތުލްއާއްމަށް ނިމުމެއް ގެންނަން ބޭނުން ނުވާ މަންޒަރު ކަމަށެވެ. ނަތީޖާއެއްގެ ގޮތުން އދ ފަދަ މަލްޓިލެޓަރަލް ނިޒާމުތަކަށް ދުނިޔެއިން ކުރާ އިތުބާރު ދުވަހެއް ދުވަހަކަށް ކުޑަވަމުންދާކަމަށެވެ. އަދި އޭގެ މައިގަނޑު ސަބަބަކީ ބޮޑެތި މައްސަލަތަކާ ގުޅިގެން ސަލަމާތީ މަޖިލީހުން ހަރުދަނާ މަސައްކަތެއް ނުކުރާތީކަމަށް ވެސް ރައީސް ވިދާޅުވިއެވެ.
ފަލަސްތީނުގެ ރައްޔިތުންނާއި ދެކޮޅަށް އިސްރާއީލުން ހިންގަމުންދާ ގަތުލްއާއްމު ނުހުއްޓުވޭ ކަމަށާއި، އިސްރާއީލުން ހިންގަމުންދަނީ ގަތުލްއާއްމެއްކަމަށް އދގެ ތަޖުރިބާކާރުންނާއި ރެޕަޓުއާއިން ވެސް ވިދާޅުވާއިރު، އެކަމަށް ހައްލު ލިބިގެން ނުދާ ކަމަށެވެ.
ފަލަސްތީނުގެ ބިންތަކަށް ޔަހޫދީން ވެރިވެގަނެގެން އުޅެނީ ބައިނަލްއަޤްވާމީ ޤާނޫނުތަކާ ޚިލާފަށްކަން މުޅި ދުނިޔެ ހެކިދޭ ކަމަށްވެސް ރައީސް ވިދާޅުވިއެވެ. އެ ބިންތަކުން އެމީހުން ފައިބަންޖެހޭކަމަށް އދގެ ދަށުން ހިނގަމުންދާ ބައިނަލްއަޤްވާމީ ޖިނާޢީ ކޯޓުން ނިންމާފައިވާކަންވެސް ރައީސް ފާހަގަކުރެއްވިއެވެ. އަދި ބައިނަލްއަޤްވާމީ ޖިނާޢީ ކޯޓުގެ ނިންމުން ތަންފީޒުކުރަން ޖެހޭ ކަމަށް އެމަނިކުފާނު ވިދާޅުވާ ވިދާޅުވުން ރައީސް ވަނީ ތަކުރާރު ކުރައްވާފައެވެ.
ބޮނބި އާއި ދޮންވެލިން މައިދާނުން ކާމިޔާބު ހޯދިދާނެ ކަމަށް ޤަބޫލު ކުރާ ކުޑަކުޑަ ގައުމެއްގެ ވެރިއެއްގެ ބަސް މިއަދު ދުނިޔެ އަހައިފިއެވެ. ބަހަކީ ވަރުގަދަ ހަތިޔާރެކެވެ. އަމާޒަށް އެ ތީރު ދޫކޮށްލީ ނިކަން ވިސްނާ ފިކުރު ހިންގުމަށްފަހުގައެވެ. ނިދަން އޮތް ދުނިޔެއިން އާމާންކަމަށް އެދި ސާލު ފޮރޮޅާލީ މޭ އައްޑަނައަކަށް ދިއްކުރުމަށްފަހުގައެވެ.
މިހާ ހިސާބުން ހަނދާނަށް އަންނަނީ ، ޅެންވެރިއެގެ ފުރިހަމަ ޅެން ބައިތެކެވެ.
އަހަރެންގެ މޭ ގައުމައްޓަކާއި އައްޑަނައަކަށް ދިއްކޮށްލުމީ،
ފަހުނޭވަޔަށް ދާންދެން މޮޓޯ ކަމުގައި ހިޔާރުކުރާނަމޭ!
ރައީސް މުއިއްޒުގެ ވަރުގަދަ ތަޤްރީރުން ސާބިތުވީ ދިވެހިން ތިބީ ދިވެހިންގެ ގޮތުގައި ކަމާއި، އަމާޒަށް ދޫކޮށްލެވޭ ވަރުގަދަ ތީރާއެކު ގައުމު ކުޑަޔަސް ހައްގުގެ މަގުގައި ވަކާލާތުކުރުމުގައި ދިވެހިންގެ ރާއްޖެ ދެމިއޮންނާނެ ކަމެވެ.
