މިއަދުގެ ހުކުރު ހުތުބާ ހާއްސަކޮށްފައިވަނީ ގެވެށި އަނިޔާ މި މައުލޫގެ މައްޗަށެވެ.
ހުތުބާ ފައްޓާފައިވަނީ އަނިޔާވެރިވުމުގެ ހުރިހައި ވައްތަރެއް އިސްލާމްދީނުގައި ހަރާމްކުރައްވައިކަން ފާހަގަކުރަމުން ގެވެށި އަނިޔާއަކީ އަނިޔާވެރިވުމުގެ ތެރޭގައި ހިމެނޭ އެއް ބާވަތްކަން ހަދާން ކޮށްދެމުންނެވެ. އަދި މި ކަމަކީ މުޖުތަމައުގައި ގަދަ އަޑުން ވާހަކަދެކެވޭ، އެ ކަމާ މެދު ކަންބޮޑުވެ، އެ ކަން ހުއްޓުވުމަށްޓަކައި އަޑު އުފުލަމުންދާ މައްސަލައެއްކަމަށްވެސް ހުތުބާގައިވެ އެވެ.
ގެވެށިއަނިޔާގެ ރޯގާ އަހަރެމެންގެ ގޭތެރޭގައި ވަކިހިއްޕަމުން ދަނީ ބައްޕައާއި ދަރީންނާ ދެމެދުގައި، ނުވަތަ މަންމައާއި ދަރީންނާ ދެމެދުގައި ނުވަތަ ފިރިމީހާއާއި އަނބިމީހާއާ ނުވަތަ އަނބިމީހާއާއި ފިރިމީހާއާ ދެމެދުގައި ބަދަލުކުރެވޭ ހަރުކަށި މުއާމަލާތުތަކުގެ ސަބަބުންކަން ހުތުބާއި ވަނީ ފާހަގަކޮށްފަ އެވެ.
އެގޮތުން ބައެއް ފިރިހެނުން ހަރުކަށި ގޮތަކަށް މުއާމަލާތުކުރަނީ އަހްލާގު ރިވެތި، ޢިލްމުވެރި ބަޔަކަށް އެމީހުންގެ ދަރީން ހެދުމުގައި ބޭނުމުގައިކަމަށާއި އަނެއް ބަޔަކު އެކަން ކުރަނީ ދަރީން ރަނގަޅަށް ބަލަހައްޓާ ކިޔަމަންތެރި އަތްނބަކު ގޭގައި ބޭންދުމަށްކަމަސް ހުތުބާގައިވެއެވެ. އެހެންނަމަވެސް ފިރިހެނުންގެ މި އަމަލުކުރުމުގެ ނަތީޖާއަކީ، އަނބިމީހާއާއި ދަރީންގެ ނުކިޔަމަންތެރިކަން އިތުރުވެ އަމާންކަންމަތީ އޮތް ގޭތެރެ ނާމާންވުމާއި ހިތްހަމަޖެހުން އޮންނާން ޖެހޭ ގޭތެރެ ހިތްދަތިވުންކަމަށް ހުތުބާގައިވެ އެވެ.
އަނބި ދަރީންނަށް އަޅައިނުލައި، އަނބިމީހާ ވަރިކޮށްފައި، ދަރިންނަށް ހަރަދުނުދީ ފިލައިގެން އުޅޭ ބަފައިން އުޅޭކަން ހަނދާކޮށްދެމުން މި ހުރިހާކަމަކީވެސް މުޅީން ވެސް އަނިޔާކަމަށް ހުތުބާގައިވެ އެވެ. އަދި މި ފަދަ އަނިޔާތަކަކީ، މާތް ﷲ ހަރާމްކުރައްވައިފައިވާ ކަންކަންކަމަށާއި ތިމާގެ އަހުލުވެރީންނާ މެދު ގިޔާމަތް ދުވަހުން މާތް ﷲ ސުވާލުކުރައްވާނެކަންވެސް ހުތުބާގައި ހަނދާންކޮށްދީފަ އެވެ.
އަނބީން ވެސް ފިރީންނަށް ކިޔަމަންތެރިވުން އިސްލާމްދީނުގައި ވާޖިބުކުރައްވައިފައިވާކަން ވަނީ ހަނދާންކޮށްދިފަ އެވެ. އަދި ފިރީންނަށް ކިޔަމަންތެރިވުމަކީ، އެ ކަނބަލުންގެ ދަރަޖަ މަތިވެރިވާނޭކަމެއްކަމަށާއި އެ ކަމުގެ ސަބަބުން، އާއިލީ ގުޅުން ބަދަހިވެ، ގެވެށިއަނިޔާއަށް އޮންނަ ފުރުސަތު ހަނިވާނެކަންވެސް ހުތުބާގައި ވަނީ ފާހަގަކޮށްފަ އެވެ.
ގެވެށި އަނިޔާތައް އިތުރުވެ އޭގެ ދާއިރާތައް ފުޅާވަމުން ގޮސް މިއަދު އެކަންތައް ވަނީ، އަތް ނުފޯރާފަށަށް އުފުލިފައިކަމަށް ހުތުބާގައިވެ އެވެ. ގެވެށިއަނިޔާގެ ހުރިހައި ބާވަތަކުން ދުރުހެލިވުމަށް ހުތުބާގައި ގޮވައިލައި ވަނީ ނަސޭހަތްތެރިވެފަ އެވެ.
