ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ސަމިޓްގައި ބައިވެރިވެވަޑައިގަތުމަށް އިންޑިއާގެ ފޮރިން މިނިސްޓަރު ސުބްރަމާނިޔަމް ޖޭޝަންކަރް، އަވަށްޓެރި ޕާކިސްތާނަށް ވަޑައިގަންނަވާނެ ކަމަށް އިއުލާންކޮށްފި އެެވެ.
އިންޑިއާގެ ފޮރިން މިނިސްޓްރީގެ ސްޕޯކްސްޕާސަން ރަންދީރް ޖޭސްވާލްއާއި ހަވާލާދީ ރޮއިޓާސް އިން ރިޕޯޓްކުރި ގޮތުގައި މި މަހުގައި ބާއްވާ މި ސަމިޓަށް ޖޭޝަންކަރް ކުރައްވާ ދަތުރުފުޅަކީީ އިންޑިއާގެ ފޮރިން މިނިސްޓަރަކު ޒަމާންތަކެއް ފަހުން ޕާކިސްތާނަށް ކުރައްވާ ރަސްމީ ދަތުރުފުޅެކެވެ.
ރަންދީރް ވިދާޅުވިގޮތުގައި އިންޑިއާއިން ޕާކިސްތާނަށް ވަޑައިގަންނަވާ ވަފްދުގައި އިސްވެ ހުންނަވައިގެން ޖޭޝަންކަރް ޕާކިސްތާނަށް ވަޑައިގަންނަވާނީ އޮކްޓޫބަރު 15 އިން 16 ގެ ނިޔަލަށެވެ. ނަމަވެސް، މި ސަމިޓްގެ ހަވާސާގެ ތެރެއިން ޖޭޝަންކަރް ޕާކިސްތާނުގެ އެެއްވެސް ލީޑަރަކާއި ބައްދަލުކުރައްވާނެ ކަމުގެ އެއްވެސް އިޝާރާތެއް ދެއްވާފައި ނުވެ އެވެ.
އެންމެ ފަހުން ދެ ގައުމުގެ އިސް އޮފިޝަލުން އެއް ތަންވެވަޑައިގަތީ މިދިޔަ އަހަރުގެ މޭ މަހު ޕާކިސްތާނުގެ ފޮރިން މިނިސްޓަރު ބިލާވަލް ބުއްޓޫޫ ޒަރްދާރީ އިންޑިއާގެ ގޯއާގައި އޮތް ފޮރިން މިނިސްޓަރުންގެ ބައްދަލުވުމަކަށް ވަޑައިގަތް ފަހަރުގަ އެވެ. އެ އިވެންޓްގެ ހަވާސާގައި ޒަރްދާރީ އިންޑިއާގެ އިސް އޮފިޝަލަކާއި ބައްދަލުކުރައްވާފައި ނުވެ އެވެ. ނަމަވެސް، ޖޭޝަންކަރްއާއި ދެ ބޭފުޅުން ވަނީ ދެ ގައުމުގެ ހީނަރުވެފައިވާ ގުޅުމުގެ ޒިންމާ ދެ ގައުމުންވެސް ނަގަން ޖެހޭނެ ކަމަށް ވިދާޅުވެފަ އެވެ.
ޖޭޝަންކަރް ޕާކިސްތާނަށް ވަޑައިގަންނަވަނީ އިންޑިއާއާއި ޕާކިސްތާނުގެ ދެމެދު އޮންނަ ކަޝްމީރް ސަރަހައްދާއި ގުޅިގެން ދެގައުމުގެ ހަތުރުވެރިކަން ބޮޑުވެފައިވާ ދަނޑިވަޅެއްގަ އެވެ. މީގެ އިތުރަށްވެސް، އިންޑިޔާއިން ވަނީ ޕާކިސްތާނުން އިންޑިއާގެ ވެރިކަން ވައްޓާލަން މަސައްކަތްކުރާ ޓެރަރިސްޓުންނަށް އެހީވާން އުޅޭ ކަމަށް ބުނެފަ އެވެ.
2019 ވަނަ އަހަރުގައި ޕާކިސްތާނުގެ ހަރުކަށި ފިކުރުގެ ބަޔަކު ދިން ޖާނުން ފިދާވުމުގެ ބޮމުގެ ހަމަލާއެއްގައި އިންޑިއާގެ އަސްކަރީ އުޅަނދަކަށް ގެއްލު ން ލިބުމަށްފަހު ދެ ގައުމުގެ ގުޅުން އިތުރަށް ހީނަރުވި އެވެ. އެ ހަމަލާގެ ރައްދުގައި އިންޑިއާއިން ވަނީ ޕާކިސްތާނުގެ ހަނގުރާމަވެރިންގެ ބޭސްއަކަށް ވައިގެ މަގުން ހަމަލާދީފަ އެވެ.
