ސަރުކާރުގެ ކުންފުނިތައް ބެލެހެއްޓުމުގެ ޒިންމާ އޮންނަ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އުވާލައި އެ ކުންފުނިތައް ފިނޭންސް މިނިސްޓްރީގެ ދަށަށް ބަދަލު ކުރުމާ މެދު ސަރުކާރުން ވިސްނަމުންދާ ކަމަށް ބަންޑާރަނައިބު އަހްމަދު އުޝާމް މިއަދު ވިދާޅުވެއްޖެއެވެ.
އުޝާމް މިހެން ވިދާޅުވީ މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
ސަރުކާރުގެ ދަށުން ހިންގާ ހުރިހާ ކުންފުނިތައް ރެގިއުލޭޓްކުރަމުން އަންނަނީ ޕީސީބީންނެވެ. ކުންފުނިތަކަށް ކަނޑައަޅާ ވެރިން އައްޔަންކުރާނީވެސް ޕީސީބީންނެވެ.
ބަންޑާރަ ނައިބު އުޝާމް ވިދާޅުވީ، ކުންފުނިތައް ބެލެހެއްޓުން ޕީސީބީއަށް މަތިކޮށްފައި އޮތްނަމަވެސް ޕީސީބީ އުފެއްދުމުގެ މަގްސަދު ވެސް އޮޅޭ ވަރަށް ކަންކަން ގޮސްފައިވާކަމަށެވެ.
އުޝާމް ވިދާޅުވީ ރާއްޖެ ފަދަ ކުޑަ އާބާދީއެއް އޮތް ތަނެއްގައި މުއްސަަސާތައް އިތުރުވެ ކަންކަމުގައި ޒިންމާވާންޖެހެނީ ކޮންބައެއް ކަން ނޭގޭ ހިސާބަށް މުއައްސާތައް އުފައްދާފައިވާކަމަށެވެ. މިސާލެއްގެ ގޮތުގައި ބަންދާރަ ނައިބު ފާހަގަކުރެއްވީ ކުންފުނިތައް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑެވެ.
”ސަރުކާރުގެ ކުންފުންޏެއްގެ ކަންކަމުގައި ސަރުކާރަށް ބަސް ނުބުނެވޭ ހިސާބަށް ކަންކަން ހިނގައްޖެ. މުއައްސަސާތަކާއި މިނިވަން އިދާރާތަކާއި ތަންތަން ހަދަމުން، ހަދަމުން ގޮސް މި ދެންނެވިހެން ކުންފުނީގެ ކަންކަމުގައި ބަސް ބުނާނީ މިނިސްޓްރީތޯ، ސަރުކާރުތޯ، ޕީސީބީތޯ ނޭނގޭ ހިސާބަށް ކަންކަން ގޮސްފި.“ ބަންޑާރަ ނައިބު އުޝާމް ވިދާޅުވިއެވެ.
ބަންޑާރަ ނައިބު ވިދާޅުވީ ކުންފުނިތަލުގެ ކޮރަޕްޝަންތައް އިތުރިވެ އިންތިހާއަށް މައްޗަށް ދިޔައިރު ބެލޭނެ ގޮތެއް ނެތިފައި އޮތްކަމަށެވެ. ސަބަބެއްކަމަށް އުޝާމް ވިދާޅުވީ ޕީސީބީންނާއި ސަރުކާރުން އެއް ބަޔަކު އަނެއް ބަޔަކު މައްސަލަ ބަލާނެކަމަށް ތިބުންކަމަށެވެ. އަދި ސަރުކާރު ކުންފުނިތައް ރަނގަޅަށް ނުހިންގިގެން އުޅެނީވެސް އެ ސަބަބާއި ހެދިކަން ފާހަގަކުރައްވަމުން އުޝާމް ވިދާޅުވީ ކުންފުނިތައް ފިނޭންސް މިނިސްޓްރީގެ ދަށުގައި އޮތް އިރު މާ ރަނގަޅަށް ބެލެހެއްޓުނުކަމަށެވެ. އެހެންކަމުން އެކަމާއި ސަރުކާރުން ވިސްނަމުން ގެންދާކަން އުޝާމް ވިދާޅުވިއެވެ.
”އެހެންވީމަ، އަޅުގަނޑުމެން މި ސަރުކާރުން ވަރަށް ސީރިއަސްލީ ކޮންސިޑާ ކުރަމުންދާ ކަމެއް މިއީ، މިފަދަ ތަންތަން ބެހެއްޓުމަކީ ހަމަ ކުރަން ޖެހޭ ކަމެއްތޯ؟ ސަރުކާރުގެ ކުންފުނިތައް ރެގިއުލޭޓް ކުރުމަށްޓަކައި ވަކިން ތަނެއް ހަދައިގެން އުޅުމަކީ ހަމަ ކުރަން ޖެހޭ ކަމެއްތޯ އަޅުގަނޑުމެން ހަމަ ސީރިއަސްލީ އެބަ ކޮންސިޑާ ކުރަން.“ އުޝާމް ވިދާޅުވިއެވެ.
އުޝާމް ވިދާޅުވީ ސަރުކާރުން މިކަމާ ވިސްނާ މި މައްސަލައަށް ހައްލު ހޯދުމަށް ގާނޫނަށް އިސްލާހު ގެންނަން ޖެހިއްޖެނަމަ، ގެނެސް އެ ބަދަލުތައް ގެންނަވާނެކަމަށެވެ.
