ބޭރު ފައިސާ ގަނެވިއްކާ ހުރިހާ ވިޔަފާރިތަކުން ވެސް ވަގުތު އޮއްވާ މަނީ ޗޭންޖަރ ލައިސަންސް ފޯމު ހުށަހެޅުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހަނދާންކޮށްދީފިއެވެ.
އަލަށް ލައިސަންސް ލިބިފައިވާ ފަރާތްތަކާއި މިހާރު ލައިސަންސް ލިބިފައިވާ ފަރާތްތަކުގެ ސުންގަޑި ކަނޑައަޅާފައިވަނީ ނޮވެމްބަރު 30، 2024 އަށް ކަމަށްވާތީ، މިނިސްޓްރީން ވަނީ
އެޕްލިކޭޝަން ޕްރޮސެސްއަށް މަގުފަހިކޮށްދިނުމުގެ ގޮތުން އޮންލައިން ޕޯޓަލްއެއް ފޯރުކޮށްދީފައެވެ. އެމްއެމްއޭއިން ބުނީ އެ ޕޯޓަލްގެ ޚިދުމަތް extranet.mma.gov.mv/money-changers އިން ލިބެން ހުންނާނެ ކަމަށެވެ.
އެމްއެމްއޭއިން ވިޔަފާރިތަކަށް ބާރުއަޅަނީ ހުރިހާ ޝަރުތުތަކެއް ފުރިހަމަވާ ގޮތަށް ފޯމު ހުށަހެޅުމާއި މުއްދަތު ހަމަވުމުގެ ކުރިން އެ ފޯމުތައް ހުށަހެޅުމަށެވެ. އެއީ މި ވިޔަފާރީގައި އުޅޭ ފަރާތްތަކަށް ވިޔަފާރި ހިންގުމަށް ބުރޫއެއް އެރުނަނުދިނުމަށެވެ.
މި ލައިސަންސް ދިނުމަށް ވަކި ކެޓަގަރީތައް ތައާރަފްކޮށްފައިވާއިރު، އެކި ކެޓެގަރީ ތަކުގެ ފީ ވެސް ތަފާތެވެ.
މިހާރު ޢަމަލުކުރަން ފަށާފައިވާ ރާއްޖޭގެ މަނީ ޗޭންޖަރ ލައިސަންސްގެ ޤަވާޢިދުގައި ވާގޮތުން ދެ ކެޓަގަރީއަށް ވެސް އެޕްލިކޭޝަން ފީގެ ގޮތުގައި 10،000 ރުފިޔާ ދައްކަން ޖެހޭނެ އެވެ. އަލަށް ކުރިމަތިލާ ފަރާތްތަކަށް ކެޓެގަރީ 1 އަށް 20،000 ރުފިޔާ އަދި ކެޓެގަރީ2 އަށް 1،300 ޑޮލަރު ކަނޑައަޅާފައިވާއިރު، މީގެ އިތުރުން އަހަރީ ފީގެ ގޮތުގައި ކެޓެގަރީ 1 އަށް 24،000 ރުފިޔާ އަދި ކެޓެގަރީ 2 އަށް 1،800 ޑޮލަރު ކަނޑައަޅާފައިވެއެވެ. ދެ ކެޓެގަރީއަށް ވެސް ސެކިއުރިޓީ ޑިޕޮސިޓްގެ ގޮތުގައި 50،000 ޑޮލަރު ދައްކަން ޖެހެ އެވެ.
