ސައުތު އޭޝިއަން ޓްރެވަލް އެވޯޑްސް (ސަޓާ)އިން ދޭ ”ފޭސް އޮފް ސައުތު އޭޝިއާ“ އެވޯޑް ޗަމްޕާ ދެބެއިންނަށް އަރުވައިފިއެވެ.
މި އެވޯޑް ޗަމްޕާ ބްރަދާސް ކުންފުނީގެ ޗެއާމަން މުހައްމަދު މޫސާ އާއި ކްރައުން ގްރޫޕުގެ ޗެއާމަން ހުސައިން އަފީފު ދެކުނު އޭޝިއާގެ ފަތުރުވެރިކަމަށް ކޮށްދެއްވާފައިވާ ހިދުމަތްތަކުގެ އަގު ވަޒަންކުރުމުގެ ގޮތުންނެވެ.
ދިވެހި ފަތުރުވެރިކަމުގެ ބާނީންގެ ތެރޭގައި ހިމެނިވަޑައިގަންނަވާ އެ ދެ ބޭފުޅުންނަށް އެވޯޑް ހަވާލުކުރުން އޮތީ މީރު މޯލްޑިވްސް ރިސޯޓުގައި މިއަދު ބޭއްވި ރަސްމިއްޔާތެއްގައެވެ. ދެ ބޭފުޅުންނަށްވެސް އެވޯޑް ހަވާލުކޮށްދެއްވީ ސަޓާގެ ނައިބު ރައީސް ސޫރަޖު ހާންއެވެ.
”ފޭސް އޮފް ސައުތު އޭޝިއާ“ އެވޯޑަކީ ސަރަހައްދީ ފަތުރުވެރިކަމުގެ ސިނާއަތުގައި އެންމެ ފާހަގަކޮށްލެވޭ ޝަހުސިއްޔަތުތަކަށް ދޭ އެވޯޑެކެވެ.
އެވޯޑާ ހަވާލުވެވަޑައިގަތުމަށް ފަހު ދެ ބޭފުޅުންވެސް ވިދާޅުވީ އެ ފަދަ އެވޯޑެއް ލިބުމަކީ ވަރަށް ބޮޑަށް އުފާކުރައްވާ ކަމެއް ކަމަށެވެ. މިފަދަ އެވޯޑެއް ލިބޭނެ ކަމަށް ހީވެސް ނުކުރައްވާކަން ފާހަގަކުރައްވާ އެކަމަށް ދެ ބޭފުޅުންވެސް ވަނީ ޝުކުރު އަދާކުރައްވާފައެވެ.
