އެއްގަމު އުޅަނދު ދުއްވުމުގެ ލައިސަންސް އިތުރު 10 ރަށަކުން ނެނގޭނެ ގޮތް ސަރުކާރުން ހަދައިފި އެވެ.
ޓްރާންސްޕޯޓް މިނިސްޓްރީގެ އޮފިޝަލަކު މިއަދު ވިދާޅުވީ ރާއްޖޭގައި ލައިސަންސް ދޫކުރުމުގެ ނިޒާމު އިތުރަށް ހަރުދަނާ ކުރުމަށް މުހިންމު ފިޔަވަޅުތަކެއް އަޅަމުން އަންނަ ކަމަށެވެ. އެގޮތުން އިތުރު 10 ރަށެއްގެ ކައުންސިލަށް ލައިސަންސް ދޫކުރުމުގެ ހުއްދަ މިހާރު ދީފައިވާ ކަމަށް އޮފިޝަލް ވިދާޅުވި އެވެ.
އެއީ، ހއ. މޮޅަދޫ ކައުންސިލާއި ހއ. އިހަވަންދޫ ކައުންސިލާއި ހއ. ކެލާ ކައުންސިލާއި ރ. ހުޅުދުއްފާރު ކައުންސިލާއި ބ. ކެންދޫ ކައުންސިލާއި ވ. އަތޮޅު ކައުންސިލްގެ އިތުރުން ފ. ދަރަނބޫދޫ ކައުންސިލާއި މ. ދިއްގަރު ކައުންސިލް އަދި ގދ. ގައްދޫ ކައުންސިލެވެ.
އޮފިޝަލް ވިދާޅުވި ގޮތުގައި މި ކައުންސިލްތަކާ އެކު މިހާރު ޖުމްލަ 39 ރަށަކުން ލައިސަންސް ނެގުމުގެ ހިދުމަތް ލިބޭނެ އެވެ.
ޓްރާންސްޕޯޓް މިނިސްޓްރީން ”ސަރުކާރު“ގެ ވެބްސައިޓުގައި ބުނީ އެ ރަށްރަށުގައި މި ހިދުމަތް ދިނުމަށް މީހުން ތަމްރީނު ކޮށްފައިވާ ކަމަށެވެ. އެ ތަމްރީނުތަކުގެ ސަބަބުން، އަތޮޅުތަކުގައި ލައިސަންސް ދޫކުރުމުގެ ހިދުމަތުގެ ފެންވަރު ރަނގަޅުވެ، އިތުބާރު ހުރި ގޮތެއްގައި ފޯރުކޮށްދެވޭނެ ކަމަށް މިނިސްޓްރީން ބުންޏެވެ.
މިހާރު ލައިސަންސް ދޫކުރާ ކައުންސިލްތައް ނުވަތަ ސެންޓަރުތައް މޮނިޓާކުރުމުގެ މަސައްކަތް ވެސް ފަށާފައިވާ ކަމަށް މިނިސްޓްރީން ބުންޏެވެ.
”މި މަސައްކަތުގެ މަގުސަދަކީ ލައިސަންސް ދޫކުރުމުގައި ގެންގުޅޭ މިންގަނޑުތައް ހިފެހެއްޓުމާއި، ހިދުމަތުގެ ފެންވަރު ރަނގަޅު ކުރުމެވެ،“ މިނިސްޓްރީން ބުންޏެވެ.
”މި ފިޔަވަޅުތަކަކީ ރާއްޖޭގެ މަގުތަކުގެ ރައްކާތެރިކަން އިތުރުކުރުމަށާއި ލައިސަންސް ދޫކުރުމުގެ ނިޒާމަށް ރައްޔިތުންގެ އިތުބާރު އިތުރު ކުރުމަށް އެޅޭ މުހިންމު ފިޔަވަޅުތަކެކެވެ. މި އާ ފިޔަވަޅުތަކުގެ ސަބަބުން ރާއްޖޭގައި ލައިސަންސް ދޫކުރުމުގެ ނިޒާމު އިތުރަށް ހަރުދަނާވެ، ރައްޔިތުންނަށް ލުއިފަސޭހަ ވެގެންދާނެ އެވެ.“
ރާއްޖޭގައި ވެހިކަލްތައް އިތުރުވުމާއި ޓްރެފިކްގެ މައްސަލަތައް ހައްލު ކުރުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ.
