އެންޓި ކޮރަޕްޝަން ކޮމިޝަން އަދި އިލެކްޝަންސް ކޮމިޝަންގެ ރައީސް އާއި ނައިބު ރައީސްގެ މަގާމަށް އައްޔަނުކުރުމުގެ ބާރު، ރައީސުލްޖުމްހޫރިއްޔާ އަށް ދޭނަމަ އެ ކޮމިޝަންތަކުގެ މުސްތަގިއްލުކަން ގެއްލޭނެ ކަމުގައި ބުނެ ދަ ޑިމޮކްރެޓްސްއިން ކަންބޮޑުވުން ފާޅުކޮށްފިއެވެ.
ޑެމްސް އިން އެފަދައިން ބުނެ، ބަޔާނެއް ނެރުނީ އެ ކޮމިޝަންތަކުގެ ރައީސުންނާއި ނައިބުން އައްޔަނުކުރުމުގެ ބާރު ރައީސް އަށް ލިބިދޭ ގޮތަށް ގާނޫނަށް ބަދަލުގެނައުމަށް ސަރުކާރުން ހުށަހެޅުމުންނެވެ.
އެގޮތުން އެ ޕާޓީން ބުނީ، އެ އިރެއްގައި އޮންނަ ސަރުކާރަށް ނިސްބަތްވާ ފަރާތްތަައް ވެސް ބައިވެރިވާ ޢާންމު އިންތިހާބުތައް ބާއްވާ ކޮމިޝަނާއި ސަރުކާރަށް ވެސް އަމާޒުވާ ފަސާދައިގެ މައްސަލަތައް ބެލުމަށް ވެސް އޮންނަ ކޮމިޝަންތައް ކަމަށެވެ. އަދި އެ ކޮމިޝަންތަކުގެ މިނިވަންކަމާއި މުސްތަގިއްލުކަން މުހިންމުވެފައި، އެކަން ލާޒިމުވަނީ ސަރުކާރުގެ ނުފޫޒެއްގައި ނުޖެހި އެ މަސްއޫލިއްޔަތުތަކާއި ޒިންމާތައް އަދާކުރަންޖެހޭތީ ކަމަށް ވެސް އެ ޕާޓީން ބުންޏެވެ.
”ނަމަވެސް ސަރުކާރުގެ ފަރާތުން ރައްޔިތުންގެ މަޖިލީހަށް މިހާރު ހުށަހަޅާފައިވާ ބިލުތަކުން ރައީސުލްޖުމްހޫރިއްޔާ އަށް އެ ދެ ކޮމިޝަނުގެ ރައީސުންނާއި ނައިބު ރައީސުން ކަނޑައަޅައި، އައްޔަނުކުރާ ގޮތަށް ބަދަލުކުރުމަކީ އެ ކޮމިޝަންތަކުގެ މުސްތަގިއްުލަކަމަށް ލޮޅުންއަރުވާލާކަމެކެވެ،“ އެ ބަޔާނުގައި ބުންޏެވެ.
އެ ބަޔާނުގައި އިތުރަށް ބުނީ، ސަރުކާރުން ހުށަހެޅި އެ ބިލުތަކަކީ ރައީސް، އެ ކޮމިޝަންތަކުގެ މަސައްކަތުގެ ތެރެއަށް ވަނުން ކަމަށާއި، އެކަމަކީ ޑިމޮކްރެޓިކް އަސާސްތައް އަދި ގާނޫނޫ އަސާސީގެ ރޫހަށް ބަލާއިރު ވެސް ތަންދޭ ކަމެއް ނޫން ކަމަށެވެ. އަދި އެ މުސްތަގިއްލުކަން ނަގާލުމުގެ އަމަލު ނުހިންގުމަށް ސަރުކާރާށް އެ ޕާޓީން ވަނީ ގޮވާލާފައެވެ.
އެހެން ނަމަވެސް، ސަރުކާރުގެ ފަރާތުން އިލެކްޝަންސް ކޮމިޝަންގެ ގާނޫނަށް އަދި އެންޓި ކޮރަޕްޝަން ކޮމިޝަނުގެ ގާނޫނަށް އިސްލާހު ހުށަހެޅީ މުސްތަގިއްލު ކޮމިޝަންތަކުގެ ހިންގުން ހަރުދަނާކޮށް، އެ ކޮމިޝަންތަކަށް އައްޔަނުކުރާ މެންބަރުންގެ ތެރެއިން އެ ކޮމިޝަންތަކުގެ ރައީސާއި ނައިބު ރައީސްގެ މަގާމަށް މެންބަރުން އައްޔަނުކުރުމުގައި އަމަލުކުރަމުން އަންނަ އުސޫލު އެއް ހަމަ ކުރުމަށް ހުށަހެޅޭ އިސްލާޙެއް ކަމުގައި އެ އިސްލާހުގައި އެ މެންބަރުން ބުނެފައިވެއެވެ.
އެގޮތުން އިލެކްޝަންސް ކޮމިޝަންގެ ގާނޫނަށް އެ އިސްލާހު ހުށަހެޅުއްވީ ކެލާ ދާއިރާގެ މެންބަރު އަބްދުﷲ ޝަރީފުއެވެ. އަދި އެންޓި ކޮރަޕްޝަން ކޮމިޝަނުގެ ގާނޫނަށް އެ އިސްލާހު ހުށަހެޅުއްވީ ފެލިދޫ ދާއިރާގެ މެންބަރު އާދަމް ޒާހިރުއެވެ.
