ޚިޔާނާތުގެ ކުށް ސާބިތުވެގެން ހަމައެކަނި ޖަލައްލިޔަސް ކަމަކުނުދާނެ ކަމަށާއި، ގެދޮރާއި މުދާ ވިއްކައިގެން ވެސް އެ މީހަކު ޚިޔާނާތެރިވި ފައިސާ ހޯދެންވާނެކަމަށް ފޭދޭ ދާއިރާގެ މެންބަރު އިބްރާހީމް ދީދީ (އައިބީ) މިއަދު ވިދާޅުވެއްޖެއެވެ.
މިއަދުގެ މަޖިލީހުގެ ޖަލްސާގައި، ސަރުކާރުގެ ފަރާތުން ފެލިދޫ ދާއިރާގެ މެންބަރު އާދަމް ޒާހިރު ހުށަހަޅުއްވާފައިވާ، އެންޓި-ކޮރަޕްޝަން ކޮމިޝަނުގެ ޤާނޫނަށް އިޞްލާޙު ގެނައުމުގެ ބިލުގެ އިބްތިދާއީ ބަހުސްގައި ވާހަކަ ދައްކަވަމުން އައިބީ ވަނީ އޭސީސީން ބެލި މައްސަލަތަކަކީ ކޮބައިތޯ ސުވާލު ކުރަށްވާ ވާހަކަ ދައްކަވާފައެވެ.
“އެންޓިކޮރަޕްޝަން ކޮމިޝަންތަކުން ކޮބައިތޯ ބެލި މައްސަލަތަކަކީ، ރާއްޖޭގައި ކޮރަޕްޝަންގެ މައްސަލަތައް ދަމުން ދަމުން ގޮސް، އަޅުގަނޑުމެންނަށް އަޑު އިވިގެން ދިޔައީ، ކުރީ ސަރުކާރުގައި، އޭގެ ކުރީ ސަރުކާރުގައި ވެސް މިލިއަން ރައްޔިތުންގެ ފައިސާތައް ކާލާފައި ނޫނީ ގެއްލިގެން ދިޔަތަން، ކޮބައިތޯ އޭރު އޮތް އެންޓިކޮރަޕްޝަން ކޮމިޝަން، ދިވެހިރާއްޖޭގައި ޖިނާއީ ކުށްތައް ތަހްގީގުކުރަންއޮންނަނީ ފުލުހުންގެ މުއައްސަސާ، ބައެއް ކަހަލަ ކަންތައްތައް ފުލުހުންނަށް ތަހްގީގުކުރެވޭކަށް ނޯވޭ،“ އައިބީ ވިދާޅުވިއެވެ.
އެ ބާރު ފުލުހުންނަށް ނޯންނަނީ ގާނޫނުން އެ ބާރު އޭސީސީ އަށް ދީފައި އޮތުމުން ކަމަށާއި، ނަމަވެސް ޖިނާއީ ހުރިހާ މައްސަލައެއް ވެސް ފުލުހުންނަށް ތަހްގީގުކުރެވެން ވާނެކަމަށް އައިބީ ވިދާޅުވިއެވެ. އައިބީ ވިދާޅުވީ، ފުލުހުން ތަހްގީގުކުރާ މައްސަލައަކާމެދު ސުވާލު އުފެދިއްޖެނަމަ އޭސީސީއަށް އެކަން ބެލޭގޮތަށް ބަދަލުގެންނަންޖެހޭ ކަމަށެވެ. ސަބަބަބީ ރާއްޖޭގައި ހިނގާ ކޮރަޕްޝަންގެ ކަންކަން އެންމެ ފަސް މެންބަރުންގެ ކޮމިޝަންއަކަށް ބަލައި ތަޙްޤީޤް ނުކުރެވޭނެތީކަމަށް އޭނާ ވިދާޅުވިއެވެ.
“ރާއްޖޭގެ ކޮންމެ ސަރުކާރަކުން ވެސް މި ބުނަނީ ދައުރު ނިމިގެން ދާނެ އެއްހާސް، އެއް މިލިއަން ނޫނީ އެއް ބިލިއަން ޑޮލަރުގެ ޚިޔާނާތްތެރިވި ވާހަކަ، އެ ފައިސާ ވީގޮތެއް ނޭނގޭވާހަކަ، އަންނަ ސަރުކާރެއްގެ ދައުރު ނިމިގެންދާއިރު އެ ފައިސާ ހޯދެނީއެއްނޫން، ރައީސް ޔާމީންގެ ވެރިކަމުގައި އެއް ބިލިއަން ޑޮލަރުގެ މައްސަލާގައި ދައުވާކޮށްފައި ޖަލަށް ލާފައޮތީ، ވައްކަމުގެ ސާބިތެއްގައި، އެ ފައިސާ ހޯދުނުތޯ މިދިޔަ ސަރުކާރަށް، އަދިވެސް ނުހޯދޭ، ފައިސާ ހޯދަންވީ ނޫންތޯ، ހަމައެކަނި ޖަލަށް މިހަކު ލައިގެން މިކަމެއްނުވާނެ، ފައިސާވެސް ހޯދެންޖެހޭނެ، ގެދޮރާއި މުދާ ވިއްކައިގެން ވެސް“ އައިބީ ވިދާޅުވިއެވެ.
އޭނާ ވިދާޅުވީ، މިދިޔަ ސަރުކާރުން މި ގައުމު ދަރުވާލި ދަރުވާލުން ވެސް ބަލައި ތަހްގީގުކުރަންޖެހޭ ކަމަށެވެ. އަދި އެ މައްސަލަތައް ބެލުމަކީ ރައްޔިތުންގެ މަޖިލީހުގެ ވެސް ޒިންމާއެއް ކަމަށާއި، ރައްޔިތުންގެ ފައިސާ އަށް ޚިޔާނާތްތެރިވި މީހުން މަޖިލިސް ކޮމެޓީތަކަށް ގެނެސް އެމީހުންނާއި ސުވާލުކޮށް، އެމަންޒަރު ރައްޔިތުންނަށް ފެންނާނެހެން ލައިވް ކުރަން ޖެހޭ ކަމަށް ވެސް އައިބީ ވިދާޅުވިއެވެ.
