ބޭންކް އޮފް މޯލްޑިވްސް (ބީއެމްއެލް) އިން މިއަދު ހާމަކުރި މިއަހަރުގެ ތިންވަނަ ކުއާޓަރު ރިޕޯޓުގައި އެ ބޭންކުން ހަރުދަނާ މާލީ ނަތީޖާއެއް ހޯދައި ދިވެހި މުޖުތަމައަށް ކޮށްފައިވާ މުހިންމު އިންވެސްޓްމަންޓުތައް ފާހަގަކޮށްފިއެވެ.
ބީއެމްއެލުން މިއަދު ނެރުނު ބަޔާނެއްގައި ބުނީ ތިންވަނަ ކުއާޓަރުގައި ހިންގުމުގެ ފައިދާގެ ގޮތުގައި 718 މިލިއަން ރުފިޔާ ހޯދިފައިވާ ކަމަށާއި އެއީ ކުރީ އަހަރާ އަޅައި ބަލާއިރު 2.9 ޕަސަންޓުގެ ކުރިއެރުމެއް ކަމަށެވެ. އަދި މި ކުއާޓަރުގައި ސާފު ފައިދާއެއްގެ ގޮތުގައި 492 މިލިއަން ރުފިޔާ ލިބިފައިވާ އިރު، އެއީ ދެވަނަ ކުއާޓަރާ އަޅައި ބަލާއިރު 9.6 ޕަސަންޓުގެ އިތުރު އަދަދެއް ކަމަށް އެ ބޭންކުން ބުންޏެވެ.
”ބޭންކުގެ ލޯނު ޕޯޓްފޯލިއޯ ދަނީ ހަރުދަނާކަމާއެކު ކުރިއަރަމުންނެވެ. މި ކުއާޓަރުގައި ވަކިވަކި ފަރުދުންނަށާއި ވިޔަފާރިތަކަށް 1.2 ބިލިއަން ރުފިޔާގެ އައު ލޯނު ދޫކޮށްފައިވެއެވެ. ކުއާޓަރު ނިމުނުއިރު ޖުމުލަ އެސެޓް ހުރީ 44.7 ބިލިއަން ރުފިޔާގައެވެ. ކެޕިޓަލް އެޑިކުއަސީ ރޭޝިއޯ 54 ޕަސަންޓުގައި ހުރިއިރު މިއީ ގަވާއިދުން ލާޒިމުކުރާ މިންވަރަށްވުރެ މަތީ އަދަދެކެވެ..،“ ބީއެމްއެލުން ބުންޏެވެ.
އެ ނަތީޖާއާ ގުޅޭގޮތުން ބީއެމްއެލްގެ ސީއީއޯ މުހައްމަދު ޝަރީފު ވިދާޅުވީ މާލީގޮތުން ހޯދި ރަނގަޅު ނަތީޖާއާ މެދު ވަރަށް ފަހުރުވެރިވާ ކަމަށާއި މުޖުތަމައަށް އަމާޒުކޮށްގެން ހިންގުނު މަޝްރޫއުތަކާއި ވަކިވަކި ފަރުދުންނަށާއި ރާއްޖޭގެ ވިޔަފާރިތަކަށް އެހީތެރިވުމަށާއި ގައުމުގެ މުސްތަގުބަލު އާރާސްތުކުރުމަށް ބޭންކުން ކުރާ މަސައްކަތާ މެދު ވެސް ފަހުރުވެރިވާ ކަމަށެވެ. އަދި މިއަހަރުގެ ބާކީ އޮތް މުއްދަތުގައިވެސް އެ ރަނގަޅު ނަތީޖާ ދެމެހެއްޓޭނެކަމުގެ އިތުބާރު އެބައޮތް ކަމަށް ވިދާޅުވިއެވެ.
ބީއެމްއެލުން ބުނީ ތިންވަނަ ކުއާޓަރުގައި އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް)ގެ ސަނާބިލް މަޝްރޫއަށް ބޭންކުން ބޮޑު އިންވެސްޓްމަންޓެއް ކޮށްފައިވާ ކަމަށާއި އެއް މިލިއަން ރުފިޔާގެ ބޭންކް ފަންޑު ކާމިޔާބުކުރި ފަރާތްތައްވެސް ބޭންކުން ހާމަކުރީ މި ކުއާޓަރުގައި ކަމަށެވެ.
”ފަންޑުގެ ދަށުން ތައުލީމު، ތިމާވެށި، ކުޅިވަރު އަދި މުޖުތަމައުގެ ތަރައްގީއާ ގުޅޭ ދާއިރާތަކުން ފަސް މަޝްރޫއަކަށް އެހީތެރިކަން ފޯރުކޮށްދެވޭނެއެވެ. މި މަޝްރޫއުތަކުގެ މަގުސަދަކީ ދެމެހެއްޓެނިވި ގޮތްތައް ކުރިއެރުވުމާއި އައު ގޮތްތައް ތައާރަފުކުރުމާއި އިޖުތިމާއީ ބޭނުންތަކަށް ފުރުސަތުތައް ހޯދައިދިނުމެވެ..،“ ބީއެމްއެލުން ބުންޏެވެ.
ބީއެމްއެލުން ބުނީ މުޅި ރާއްޖެ ހިމެނޭ ބޭންކިން ވިއުގަޔަކާއެކު 20 އަތޮޅުގައި 39 ބްރާންޗު، 89 ސެލްފްސާވިސް ބޭންކިން ސެންޓަރު، 144 އޭޓީއެމް، ކޭޝް އޭޖެންޓުގެ ހިދުމަތުގެ އިތުރުން އެންމެ ޒަމާނީ އޮންލައިން ބޭންކިން ހިދުމަތާއެކު ބީއެމްއެލްގެ އަމާޒަކީ އާންމު ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުން ކަމަށެވެ.
