މަސްވެރިންނަށް މިހާތަނަށް ނުދެވި ހުރި ފައިސާ މިފްކޯއާ ހަވާލުކޮށްފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، މެނިފެސްޓޯގައި ވާ ގޮތަށް 48 ގަޑިއިރު ތެރޭގައި މަސްވެރިންނަށް ފައިސާ ދެވޭނެ ދެމެހެއްޓެނިވި ނިޒާމެއް ގާއިމުކުރުމުގެ މަސައްކަތް ކުރަމުންދާ ކަމަށެވެ.
މިފްކޯއިން ބުނީ މިހާރު ޖުމުލަ 331 ދޯންޏަކުން ކިރި މަހަށް 9.1 މިލިއަން ރުފިޔާ ދޭން ޖެހިފައިވާ ކަމަށެވެ. އަދި މި މުއްދަތުގައި ފެލިވަރު، ކޫއްޑޫ އަދި އައްޑޫއަށް ކިރާފައިވަނީ 882.32 މެޓްރިކް ޓަނުގެ މަސް ކަމަށް އެ ކުންފުނިން ބުންޏެވެ.
ކުރީގެ ސަރުކާރުން މަސްވެރިންނަށް ދޭން ޖެހުނު 250 މިލިއަން ރުފިޔާއަށް ވުރެ ގިނަ ރުފިޔާ ނުދެވި އޮތް ކަމަށާއި، މިހާރުގެ ސަރުކާރުން ވަނީ އެ ފައިސާއާ އެކު މިހާތަނަށް މަސްވެރިންނަށް 1.1 ބިލިއަން ރުފިޔާއަށް ވުރެ ގިނަ ރުފިޔާ ދޫކޮށްފައެވެ.
