ދިވެހިރާއްޖެއިން މިސް ޔުނިވަރސް މުބާރާތުގައި ފުރަތަމަ ފަހަރަށް ބައިވެރިވާން ނިންމާފައިވާ މަރިޔަމް ޝައިނާ ނަސީމް ކިޔާ ޒުވާނެކެވެ.
މިކަމަށް ސަރުކާރުން ތަރުހީބު ނުދޭކަމަށް ބުނުމުން ސައިޚް އަހްމަދު ސަމީރު ވިދާޅުފައި ވަނީ ރީތީގެ މުބާރާތުގައި ބައިވެރިވުމީ ބޮޑުވެގެންވާ މުންކަރާތެއް ކަމަށެވެ.
“މީގައި އިސްލާމީ ޤައުމެއް ތަމްސީލު ކުރުމުގެ ޙައްޤު ލިބިގެން ނުވޭ! މިކަން ކުށްވެރިކޮށް ސަރުކާރުން އިލްތިމާސްކުރެއްވިކަމަށްޓަކައި ރައީސުލް ޖުމުހޫރިއްޔާ ޑރ މުޙައްމަދު މުޢިއްޒަށް ޝުކުރު އަދާކުރަން“ ސައިޚް ވިދާޅުވެފަވެއެވެ.
މިކަމާއި ގުޅިގެން ސައިޚް ޢަލީ ޒާހިރު ވިދާޅުވެފައި ވަނީ ދީނީ ގޮތުންނާއި އަޚްލާގީ ގޮތުން ދަށުދަރަޖައިގެ މުންކަރާތްތަކަށް ސަރުކާރުން ފާޅުގައި ދެކޮޅުަހެދުމަކީ އީމާންކަމުގެ އަހުލުވެރިންގެ ހިތްތަކަށް ފިނިކަން ގެނުވި ކަމެެއް ކަމަށެވެ.
“ޑރ.މުއިއްޒަށާއި ސަރުކާރަށް މާތްﷲ ހެޔޮތައުފީގު މިންވަރު ކުރައްވާށި. އާމިން“ ސައިޚް ވިދާޅުވެފަވެއެވެ.
މިކަމާއި ގުޅިގެން ސީދާ ރައީސުލްޖުމްހޫރިއްޔާ ވެސް ވަނީ ރޭ ޕޯސްޓެއް ކުރަށްވާފައެވެ. އެ ޕޯސްޓްގައި އެމަނިކުފާނު ވަނީ، ފިރިހެނަކުވިޔަސް، އަންހެނަކުވިޔަސް، މާތް ﷲ ރުހިވޮޑިގެންނުވާ ގޮތަކަށް ތިމާގެ ހަށިގަނޑު ހާމަކޮށްގެން ކުރާ މަސައްކަތަކުން ނުވަތަ ބައިވެރިވާ ކުޅިވަރަކުން، ތިމާއަށް ނުވަތަ ތިމާގެ ދިނާއި ޤައުމަށް ލިބޭނެ ޙަޤީޤީ ރީތިނަމެއް، އުފަލެއް، ކާމިޔާބީއެއް ނެތްކަމަށް ވިދާޅުވެފައެވެ.
މިކަމާއި ގުޅިގެން ޒުވާނުން ބާރުވެރިކުރުވުމާބެހޭ ވުޒާރާއިން މިއަދު ނެރުނު ބަޔާނެއްގައި ވިދާޅުވެފައި ވަނީ މެކްސިކޯގައި ބޭއްވުމަށް ހަމަޖެހިފައިވާ ރީތީގެ މުބާރާތެއްގައި ދިވެއްސަކު ބައިވެރިވުމަކީ އެކަމުގައި ސަރުކާރުގެ ބައިވެރިވުމެއް އޮތްކަމެއްކަމަށް ދޭހަވާގޮތަށް ޚަބަރުތަކެއް ފަތުރަމުންދާ ކަމަށެވެ. އެހެން ނަމަވެސް އެފަދަ އެއްވެސް މުބާރާތެއްގައި ދިވެއްސަކު ބައިވެރިވުމަކީ ދިވެހި ސަރުކާރުން ބަލައިގަންނަ ކަމެއްނޫންކަމަށް ޒުވާނުން ބާރުވެރިކުރުވުމާބެހޭ ވުޒާރާއިން ވިދާޅުވިއެވެ.
ދިވެހިންގެ ދީނާއި ޢަޤީދާއާއި ސަގާފަތާ ނުގުޅޭ ހަރަކާތްތަކާއި މުބާރާތްތައް ބޭއްވުމާއި އަދި އެކިއެކި ފަރާތްތަކުން ބާއްވާ އެފަދަ މުބާރާތްތަކާއި ހަރަކާތްތަކުގައި ދިވެހިން ބައިވެރިވުމަކީ ދިވެހި ސަރުކާރުން ބަލައިގަންނަ ކަމެއް ނޫން ކަމަށާއި، އެފަދަ ކަންކަމަކީ ދިވެހިން ޤަބޫލުކުރާ ޢާންމު އަޚުލާޤީ މިންގަނޑުތަކާއި އުޞޫލުތަކާވެސް ޚިލާފު ކަމެއްކަމަށް އެ ވުޒާރާއިން ވިދާޅުވެފަވެއެވެ.
