ކުރިއަށް އޮތް 20 އަހަރުގެ ޤައުމީ ތަރައްގީގެ މާސްޓާ ޕްލޭންގެ މަޝްވަރާ އިފްތިތާޙްކުރުމަށް ބޭއްވި ޙަފުލާގައި ވާހަކަފުޅު ދައްކަވަމުން ރައީސް ވިދާޅުވީ ސަރުކާރުން ބޭނުންވަނީ ގައުމު ތަރައްގީ ކުރަން ކަމަށާއި، ކުރިއަށް އޮތް 20 އަހަރުގެ ގައުމީ ތަރައްގީގެ ޕްލޭނުގެ ތެރެއިން ކުރެވޭނީ ރައްޔިތުން ފުދުންތެރިކޮށް، ރައްޔިތުން ބޭނުންވާ ފެންވަރަށް ޚިދުމަތްތައް ގެންދިޔުމުގެ މަސައްކަތް ކަމަށެވެ.

އަޅުގަނޑުމެން ބޭނުންވަނީ ގައުމު ތަރައްގީކުރަން. ރައްޔިތުން މުއްސަނދިވާން ފުދުންތެރިވާން. ގެދޮރުވެރިކަން އެންމެންނަށް ލިބިގެންދާން. ވަޒީފާގެ ފުރުސަތު ހުރިހާ މީހުންނަށް ތަފާތު ކުރުމެއް ނެތި ލިބޭނެކަން ޔަގީންވާން. އަޅުގަނޑުމެންގެ ސިއްޚީ ކަންތައްތަކާއި އަދި އިޖްތިމާއީ ހުިރހާ ކަންތައްތަކެއް ވެސް އަޅުގަނޑުމެން ބޭނުންވާ ފެންވަރަށް ގެންދަން، – ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ރައީސް ވިދާޅުވީ، އދ ގައި އެމިނުފާނު ވިދާޅުވި ގޮތަށް، 2040 އަންނަ އިރު ރާއްޖެއަކީ ތަރައްގީ ވެފައިވާ ގައުމަކަށް ހެދުމަށް ބޭނުންވެވަޑައިގަންނަވާ ކަމުގައެވެ. ރައީސް ވިދާޅުވި ގޮތުގައި އެ ހިސާބަށް ރާއްޖެއަށް ވާސިލުވެވޭނީ ވަރަށް ގިނަ ކަންތައްތަކެއް ރަނގަޅުކޮށް ތަރައްގީ ވެސް ކުރެވިގެންނެވެ. އެގޮތުން އިޖްތިމާއީ ގޮތުންނާއި އުމްރާނީ ތަރައްގީގެ ގޮތުންނާއި އިގްތިސާދީ ތަރައްގީން ވެސް ވަރަށް ގިނަ ކަންތައްތައް ކުރަން ޖެހޭނެ ކަމުގައި ރައީސް ވިދާޅުވިއެވެ.

ހައި އެކްސްޕެކްޓޭޝަން. އެއިމް ކުރަންވީ އެންމެ މައްޗަށް. އެހެން ނަމަވެސް އަޒުމަކާ އެކުގައި އެކުވެރިކަމާ އެކީގައި ގައުމީ ވިސްނުމެއްގައި އެންމެން މަސައްކަތްކޮށްފިއްޔާ ހާސިލްކުރެވޭނެ އެކަންތައް. އެހެންވީމާ އިރާދަކުރެއްވިއްޔާ މިއަދު މި ފެށޭ މަސައްކަތް، ރާއްޖޭގެ ހުރިހާ ރަށެއްގައި ފެށިގެންދާނެ. ހުރިހާ ބޭފުޅުންގެ ބައިވެރިވުމާ އެކީގައި. ކޮންމެ ރަށެއްގެ ރައްޔިތުންގެ ވެސް މި ޕްލޭނަށް އެއްޗެއް ވިދާޅުވާން ޖެހޭނެ. ރައްޔިތުން ބޭނުންވާ ކަންތައް ކޮންމެ ރަށެއް މީގައި ރެޕްރެޒެންޓް ވާނެ، – ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

އެއާއެކު ރައީސް ވަނީ، ގައުމީ ތަރައްގީގެ ޕްލޭނަކީ ސިޔާސީ ކަމެއްގެ ގޮތުގައި ނުދެކި، އެކަމުގައި ބައިވެރިވެވަޑައިގަތުމަށް ހުރިހާ ފަަރާތްތަކުގެ އަރިހުން އެދިވަޑައިގަންނަވައިފައެވެ. އެގޮތުން ރާއްޖޭގައި ހަރަކާތްތެރިވާ ޖަމާއަތްތަކާއި ސިޔާސީ ޕާޓީތަކަށް ވެސް ރައީސް ވަނީ އެކަމުގައި ބައިވެރިވެވަޑައިގަތުމުގެ ދަޢުވަތު ދެއްވާފައެވެ.