އާބަން ސެންޓަރުތަކާ ގުޅޭގޮތުން ހަގީގަތާ ހިލާފު ވާހަކަ ދައްކަނީ ސިޔާސީ ފައިދާއެއް ހޯދުމަށް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އާބަން ސެންޓަރުތަކުގެ ގޮތުގައި ތަރައްގީކުރާނެ 7 ރަށް މިއަދު ވަނީ ކަނޑައަޅާފަ އެވެ. އެ 7 ރަށަކީ ރ. އުނގޫފާރު، ބ. އޭދަފުށި، ޅ. ނައިފަރު، އދ. މަހިބަދޫ، ފ. ނިލަންދޫ، ދ. ކުޑަހުވަދޫ އަދި ލ. ފޮނަދު އެވެ.
މި ރަށްތަކުގެ ތެރޭގައި އެންމެ އުތުރާއި އެންމެ ދެކުނުގެ ރަށެއް ހިމެނިފައި ނުވާތީ ބައެއް ފަރާތަކުން ދަނީ ކަންބޮޑުވުން ފާޅުކުރަމުންނެވެ.
އެކަމާ ގުޅިގެން ރައީސް ”އެކްސް“ގައި ކުރެއްވި ޕޯސްޓެއްގައި ވިދާޅުވީ ތަރައްގީގެ ސިޔާސަތު އެމަނިކުފާނުގެ މެނިފެސްޓޯގެ ޗެޕްޓަރ 4، ނަންބަރު 12، 13 އަދި 14 ގައި ވަރަށް ސާފުކޮށް ބަޔާންކޮށް ފައިވާ ކަމަށެވެ. އަދި މެނިފެސްޓޯ ލޯންޗްކުރި ޖަލްސާއިން ފެށިގެން މިއަދާ ހަމަޔަށް އެތައް ޖަލްސާއެއްގައި އެމަނިކުފާނު ބަޔާންކޮށްފައިވާ ފަދައިން، ދެމެހެއްޓެނިވި ސަރަހައްދީ ތަރައްގީގެ ސިޔާސަތުގެ ދަށުން މާލެ އާބަން ރީޖަންގެ އިތުރުން އެންމެ މަތީ ފަންތީގެ ހިދުމަތްތައް ހިމެނޭހެން އެންމެ އުތުރުގެ ތިން އަތޮޅު ހިމެނޭހެން ނޮދަން އިންޓާގްރޭޓަޑް ޑިވެލޮޕްމަންޓް ޒޯނަކާއި އެންމެ ދެކުނުގެ ހަތަރު އަތޮޅު ހިމެނޭހެން ސަދަން އިންޓާގްރޭޓަޑް ޑިވެލޮޕްމަންޓް ޒޯނެއް ތަރައްގީ ކުރުން އަދި އޭގެ އިތުރަށް ހަތް އާބަން ސެންޓަރު — މާލެއިން އުތުރުން 3 އަތޮޅާއި މާލެއިން ދެކުނުން 4 އަތޮޅު ތަރައްގީ ކުރުން އެއީ ސަރުކާރުގެ ސިޔާސަތު ކަމަށެވެ.
އަދި މިކަންކަމަކީ ކުރިޔަށް 20 އަހަރު ދުވަހަށް އެކަށައަޅަން މަސައްކަތް ފަށާފައިވާ ތަރައްގީގެ މާސްޓާޕްލޭންގައި ރާއްޖޭގެ ހުރިހާ ރަށެއްގެ ރައްޔިތުންގެ ހިޔާލާއި ފަންނީ ފަރާތްތަކާއި ކައުންސިލްތަކާއި ކަމާބެހޭ ހުރިހާ ފަރާތްތަކެއްގެ ބައިވެރިވުމާއެކު އެކަށައެޅުމަށް ގަސްދުކުރާ ކަންކަން ކަމަށް ރައީސް ވިދާޅުވި އެވެ.
”ކަންކަމުގެ ހަގީގަތް ނުބައްލަވާ، ނުވަތަ ހަގީގަތް އެނގިވަޑައިގެން ތިއްބަވައިގެން، ސިޔާސީ ފައިދާ ހޯދުމުގެ ނިޔަތުގައި ސިޔާސީ ބައެއް ފަރާތްތަކުން ކުރައްވާ ކަންކަމަށް ޒިންމާވާނީ އެކަންކަން ކުރައްވާ ބޭފުޅުން،“ ރައީސް ވިދާޅުވި އެވެ.
