މިއަދު ހައްލު ކުރުމަށް މަސައްކަތް ކުރަމުންދާ މައްސަލަތައް ގުޅިފައި ވަނީ، އަހަރުތަކެއް ކުރިން އުފެދި އެކަންކަމާއި މެދު ކުރީގެ ވެރިން އަޅާނުލައި ހުރުމުގެ ނަތީޖާތައްކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވީ ޖުމްހޫރީ ދުވަހުގެ ރަސްމީ ޖަލްސާގައި މިރޭ ވާހަކަފުޅު ދައްކަވަމުންނެވެ.
އިޖްތިމާއީ މައްސަލަތައް ހައްލު ކުރުމަށް ސަރުކާރުން އަޅަމުން ގެންދާ ފިޔަވަޅުތަކަކީ، ރައީސް މިރޭ ވިދާޅުވި ގޮތުގައި ގައުމުގެ އަންނަން އޮތް ޖީލުގެ ސަލާމަތާއި ރައްކާތެރިކަމުގެ މަސައްކަތެވެ.
ރައީސް ވިދާޅުވީ މިދިޔަ އެއް އަހަރުގެ ތެރޭގައި ހިދުމަތް ކުރެއްވުމަށް އެމަނިކުފާނު ކުރެއްވި ހުރިހާ މަސައްކަތެއް ކުރެއްވީ ރައްޔިތުންގެ ފަޅީގައި ހުންނަވައިކަމަށެވެ. އެއީ ރައްޔިތުންގެ އަޑުއަހައި، އެ ރައްޔިތުންގެ އުންމީދުތަކުގައި ކުލަ ޖެއްސުމުގެ ގޮތުން ކުރެވުނު މަސައްކަތެއްކަން ފާހަގަކުރައްވައި ވިދާޅުވީ ބޭނުންވާ އަމާޒަށް ދެވޭނީ ހަވާލުކުރި މަސްއޫލިއްޔަތު ރަނގަޅު ގޮތުގައި އަދާކޮށްގެންކަމަށެވެ.
ރައީސް ވިދާޅުވީ ބަޔަކު އަތް ނުލާ ހުރި ޒަމާންވީ އެތައް މައްސަލައެއް ހައްލު ކުރުމަށް މިއަދު މަސައްކަތް ކުރައްވަމުން ދަނީ އެ ސަބަބާއި ހުރެކަމަށެވެ. އޭގެ ތެރޭގައި އެމަނިކުފާނު ފާހަގަކުރެއްވީ ރާއްޖޭގައި އޮތް ގޭންގު މާރާމާރީތަކާއި އެފަދަ ކުށްތައް ނައްތާލުމަށް ގާނޫނަށް ގެނަން ގަސްދުކުރާ އިސްލާހުތަކެވެ. އަދި ޒުވާނުންނާއި، ގައުމުގެ ދަރީންގެ މުސްތަގުބަލަށް ވިސްނައި ރާއްޖޭގައި ވޭޕް މަނާކުރުމަށް ނިންމުމާއި، ދުންފަތުގެ ބާވަތްތަކާއި ގުޅޭގޮތުން އަޅާފައިވާ ފިޔަވަޅުތައް ފާހަގަކުރެއްވި އެވެ.
ރައީސް ވިދާޅުވީ ރާއްޖޭގައި އޮތް ޒަމާންވީ ބޭހުގެ މާފިއާގެ މައްސަލަ އޮތީ ހައްލު ނުވެކަމަށެވެ. ބޮޑު އަގުގައި ބޭސްތައް ވިއްކާ މައްސަލަ ހައްލުކޮށް، ދިވެހިންނަށް ކޮލިޓީ ބޭސް ލިބޭނެ މަގު ފަހިވެގެން ދިޔައީ މިދިޔަ އެއް އަހަރުގެ ތެރޭގައި ކުރެވުނު މަސައްކަތެއްގެ ނަތީޖާއެއްގެ ގޮތުންކަމަށް ރައީސް ވަނީ ވިދާޅުވެފަ އެވެ.
ވަރަށް ގިނަކަންތައްތައް ފަސޭހައަކަށްޓަކައި، ކޮންފޮޓް ޒޯނެއްގައި ތިބުމަށްޓަކައި، މިދިޔަ ޒަމާންތަކުގައި އަޅާނުލައި ހުރި ގިނަ ކަންކަން އެބަހުރި، އެ ކަންކަން ރައްޔިތުންގެ ހާދިމެއްގެ ގޮތުގައި ހުރިކަމަށްވާނަމަ ހައްލު ކުރުމަށް މަސައްކަތް ކުރަންޖެހޭނެ.. އެހެންވީމަ ޑްރަގުގެ މައްސަލަ ހައްލު ކުރުމަށްޓަކައި ތެދުވީ.. އެހެންވީމަ، އެހެންވީމަ މިތަނުގައި އޮތް ގޭންގު މާރާމާރީތަކުގެ މައްސަލަ ހައްލު ކުރުމަށްޓަކައި އަޅުގަނޑުމެން ތެދުވީ.. އެހެންވީމަ ވޭޕް މަނާކުރުމަށް ނިންމީ، އެހެންވީމަ މިތަނުގައި އޮތް ބޭހުގެ މާފިއާ ނައްތާލަން ތެދުވީ، އެހެންވީމަ މިތަނުގައި ވަކި ބައެއްގެ ދަށުގައި އޮތް ޑޮލަރުގެ ކަޅު ބާޒާރު ނިމުމަކަށް ގެނެސް ރައްޔިތުންނަށް ޑޮލަރުގެ މުއްސަނދިކަން ގެނައުމަށް ނިންމީ.. މިފަދައެތައްކަމެއް ކުރަމުން މިދަނީ.. ރައްޔިތުންގެ ފަޅިގައި ތިބެގެން މި އުނދަގޫ ބޮޑު މަސައްކަތް ރައްޔިތުންނަޓަކައި ކުރަން ތެދުވީ…
ރައީސް ވިދާޅުވީ ރާއްޖޭގައި ޑޮލަރުގެ ކަޅު ބާޒާރެއް އުފެދި، އެ ވިޔަފާރި އޮތީ ބަކި ބައެއްގެ އަތް ދަށުގައި ކަމަށެވެ. އެހެންކަމުން މިއަދު ރައްޔިތުން އެދޭ ގޮތަށް ސަރުކާރުން އަޅަމުން ގެންދާ ފިޔަވަޅުތަކަކީ އުނދަގޫ މަސައްކަތެއް ނަމަވެސް ނިކުންނަން އޮތީ ފޮނި ނަތީޖާއެއްކަމަށް ރައީސް ވިދާޅުވި އެވެ.
ރައީސް ވިދާޅުވީ އުންމީދަކީ މިފަދަ މައްސަލަތައް ހައްލު ކުރުމުގައި ސަރުކާރަށް ރައްޔިތުންގެ ފުރިހަމަ އެއްބާރުލުން ލިބިގެން ދިއުންކަމަށާއި، ކުރިޔަށް އޮތް އަހަރުތަކުގައި މިކަމުގެ ނަތީޖާ ފެންނާނެކަމުގެ ފުރިހަމަ ޔަގީންކަން އެމަނިކުފާނު ދެއްވާކަމަށެވެ.
