އަންނަ އަހަރު ނިމުމުގެ ކުރިން ރާއްޖެ ޓްރާންސްޕޯޓް ލިންކް އާރްޓީއެލް) އިން މުޅި ރާއްޖެ ގުޅަލައިލެވޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެ ހިދުމަތަކީ ކުރީގެ ރައީސް އިބްރާހީމް މުހައްމަދު ސޯލިހުގެ ވެރިކަމުގައި ޖޫން 12، 2022 ގައި ފެށި ހިދުމަތެކެވެ. މްޓީސީސީއާ ހަވާލުކޮށްގެން އާރްޓީއެލް އަންނަނީ ކަނޑާއި އެއްގަމުގެ ދަތުރުފަތުރުގެ ހިދުމަތް ދެމުންނެވެ. އެގޮތުން ސްޕީޑް ލޯންޗްގައި ފެރީގެ ހިދުމަތް ދެމުން އަންނަ އިރު، އާބާދީ ބޮޑެތި ބައެއް ސަރަހައްދުތަކުގައި އަންނަނީ ބަހުގެ ހިދުމަތް ދެމުންނެވެ.
މި ހިދުމަތުގެ ބޭނުމަކީ މުޅި ރާއްޖެ އަވަސް އަދި ފަސޭހަ ދަތުރު ފަތުރުގެ ނިޒާމަކުން ގުޅައިލުމެވެ.
އާރްޓީއެލްގެ ހިދުމަތް ދޭން ރާވާފައި އޮތީ ރާއްޖެ ހަ ޒޯނަކަށް ބަހާލައިގެންނެވެ. އެގޮތުން މިހާރު 4 ޒޯނެއްގައި ހިދުމަތް ފަށާފައިވެ އެވެ.
އާރްޓީއެލް ހިދުމަތް މިހާރު ދެމުން އަންނަ ޒޯންތައް:
* ޒޯން 1: ހއ. ހދ. އަދި ށ. އަތޮޅު
* ޒޯން 2: ޅ. އަތޮޅު
* ޒޯން 5: ގއ. އާއި ގދ. އަތޮޅު
* ޒޯން 6: ފުވައްމުލައް އަދި އައްޑޫ
އާރްޓީއެލް ހިދުމަތް ނުފަށާ ޒޯންތައް:
* ޒޯން 3: ކ، އއ، އދ އަދި ވ އަތޮޅު
* ޒޯން 4: މ، ފ، ދ، ތ އަދި ލ އަތޮޅު
މި ހިދުމަތް އެންމެ ފެށި އަތޮޅަކީ ނ. އަތޮޅެވެ. އެއީ ޖުލައި މަހުގެ ތެރޭގައި ނ. އަތޮޅުގަ އެވެ.
ދާދި ފަހުން ޓްރާންސްޕޯޓް މިނިސްޓްރީން ވަނީ ޖަޕާން އިންޓަނޭޝަނަލް ކޯޕަރޭޝަން އޭޖެންސީ (ޖައިކާ) އާ ހަވާލުކޮށްގެން އާރްޓީއެލްގެ ހިދުމަތާ ގުޅޭ ސާވޭއެއް ވެސް ހަދައިފަ އެވެ. އެ ސާވޭގެ ބޭނުމަކީ ނިޒާމު އިތުރަށް ހަރުދަނާކޮށް، ވަރުގަދަ ކުރުމަށްޓަކައި ޖައިކާ މެދުވެރިވެގެން ޖަޕާނުން އެހީ ހޯދުން ކަމަށް މިނިސްޓްރީން ބުނެފައިވެ އެވެ.
ޓްރާންސްޕޯޓް މިނިސްޓްރީން މިދިޔަ މަހު ވަނީ އާރްޓީއެލްގެ ފެރީ ހިދުމަތުގެ އަގު ބޮޑުކުރަން ނިންމާފައިވާކަން ވެސް އިއުލާންކޮށްފަ އެވެ.
މިނިސްޓަރު މުހައްމަދު އަމީން ވިދާޅުވީ އެގޮތަށް ނިންމީ ވިދާޅުވީ އާރްޓީއެލް ހިދުމަތް އަގު ހެޔޮކޮށް ދިނުމަށް ސަރުކާރުން ދޭން ޖެހޭ ސަބްސިޑީ ބޮޑުވާތީ ދެމެހެއްޓެނިވި ގޮތެއްގައި ހިދުމަތް ދޭން ކުރިމަތިވެދާނެ ދަތިތަކަށްޓަކަ އެވެ.
