ފާފަކުރުން ގިނަވެ އެއީ މާބޮޑުކަމެއް ކަމަށް ނުދެކޭ މީހުން ދަނީ ގިނަވަމުންނެވެ. އެމީހުންނަށް ވިސްނިފައި އޮންނަނީ ޢުމުރުގެ ފަހުކޮޅުގައި ތައުބާވުމުން ފުދުނީ ކަމަށެވެ. އެމީހުންނަށް ނުވިސްނޭކަމަކީ ތައުބާނުވެ ހުރުމުން ދުނިޔޭގައި ކުރިމަތިލާން ނުޖެހޭނެ މުޞީބާތެއް ނެތް ކަމެވެ.
ފާފަކޮށް ތަޢުބާނުވެ ތިބޭ މީހުން ވިސްނައިލާށެވެ!
”އިބްނުލް ޤައްޔިމް ރަޙިމަހުﷲ އެކަލޭގެފާނުގެ ފޮތް “ އަލް ފަވާއިދު“ ގައި ފާފައިގެ ބައެއް ނޭދެވޭ އަސަރުތައް ޒިކުރު ކޮށްފައިވޭ. މިގޮތުން އިބްނުލް ޤައްޔިމް ވިދާޅުވެފައިވަނީ ފާފައިގެ ނޭދެވޭ އަސަރުތަކުގެ ތެރޭގައި ދުޢާ އިޖާބަ ނުވުމާއި، ހިތް ހަރުވުމާއި، ރޯދި ބަރަކާތުން މަޙްރޫމް ވުމާއި، ޢިލްމުން މަޙްރޫމް ވުމާއި، ނުބައި އެކުވެރިންނާއި އެކު އުޅެންޖެހުމާއި، ޙައްޤު މަގު ނުފެނުމާއި އަދިވެސް މިފަދަ އެތައް ކަމެއް އިބްނުލް ޤައްޔިމް ފާފައިގެ ނޭދެވޭ އަސަރުތަކުގެ ތެރޭގައި ޒިކުރު ކޮށްފައިވޭ.“
ދެން ނިކަން ބުނެބަލާށެވެ! ފާފަކުރެވުމުން ތައުބާ ނުވެ ހުންނަ މީހެއްގެ ޢުމުރުން ދުވަސްވެ މުސްކުޅިވާއިރު އެމީހެއްގެ ޙާލަތު ހުންނާނީ ކިހިނަކުން ހެއްޔެވެ؟ ތައުބާވެ ހެޔޮ ޢަމަލުކުރުމުގެ ވިސްނުން އެމީހަކަށް ލިބޭނީ ކިހިނަކުން ހެއްޔެވެ؟ މިބަހުގެ މާނައަކީ އެމީހަކު މަސައްކަތްކޮށްފިނަމަ ފުރުޞަތު ނުލިބޭނެ ކަމަށް ބުނުމެއް ނޫނެވެ. ނަމަވެސް އެފުރުޞަތު ލިބުން ކުޑަކަން ބަޔާންކުރުމެވެ.
ކުށްފާފަ ކުރުމަކީ, މާތް ﷲ އަށް އުރެދުމަކީ އަމިއްލަ ނަފްސަށް އަނިޔާވެރިވުމެވެ. ފާފަކޮށް ތަޢުބާ ނުވާހާ ހިނދަކު އޭނާ އެ ހުށަހޮޅިގަންނަނީ ކަށްވަޅުގެ ޢަޒާބަށެވެ. ނަރަކައިގެ ޢަޒާބަށެވެ. އަދި ދުނިޔަވީ ޢަޒާބަށެވެ.
– އިސްލާމީ ތިލަފަތުގެ ދަރުސަކުން
