އާސަންދަ ނިޒާމުގެ ދަށުން އާންމު ރައްޔިތުންނަށް ލިބޭ ޚިދުމަތަށް ބަދަލެއް ނުގެނެސް މިހާރުވާ އިސްރާފު ހުއްޓުވުމުގެ ސަބަބުން 500 މިލިޔަން ރުފިޔާ ސަލާމަތްކުރެވޭނެ ކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ. ވަޒީރު މިހެން ވިދާޅުވީ ރައްޔިތުންގެ މަޖިލީހުގައި ކުރިއަށްދާ ބަޖެޓު ބަހުސްގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.
މީގެ އިތުރުން ވަޒީރު ވިދާޅުވީ، މިހާރު ޕެންޝަން ލިބޭ ފަރާތްތަކުގެ ޕެންޝަނަށްވެސް ބަޖެޓުން ބަދަލެއް ނާންނާނެ ކަމަށެވެ.
މީގެ ކުރިން ސަރުކާރުތަކުން ހިންގަމުން އައި ކުންފުނިތައް ބަނގުރޫޓްވުމުން ދޫކޮށްލިހެން އާސަންދަ ކުންފުނިވެސް ދޫކޮށްލައި އާ ގޮތްތަކެއް ހޯދަން މަޖުބޫރުވެފައިވާ ކަމަށް ރައްޔިތުންގެ މަޖިލީހުގެ ނައިބް ރައީސް އަހުމަދު ނާޒިމް މިއަދުގެ މަޖިލިސް ޖަލްސާގައި ވަނީ ވިދާޅުވެފައެވެ.
އަންނަ އަހަރަށް ލަފާކޮށް ފިނޭންސް މިނިސްޓްރީން ހުށަހަޅާފައިވާ ދައުލަތުގެ ބަޖެޓުގެ ބަހުސްގައި ދިއްގަރު ދާއިރާގެ މެންބަރުކަންވެސް ކުރައްވާ ނާޒިމް ވިދާޅުވީ ސިއްހީ ދާއިރާއަށް ދިމާވެފައިވާ އެންމެ ބޮޑު ގޮންޖެހުމަކީ އެންސްޕާ އާއި އާސަންދައިން ކުރަން ޖެހިފައިވާ ބޭކާރު ހަރަދުތައް ގިނަވުން ކަމަށެވެ.
ދާދި ފަހުން، ލޮލަށް ޖަހާ އަގު ބޮޑު އިންޖެކްޝަނެއް ކަމަށްވާ ލުސެންޓިސް އިންޖެކްޝަން ބޮޑު އަގުގައި ވިއްކާ މައްސަލައެއް ވަނީ ފެންމަތިވެފަ އެވެ.
ގާތްގަނޑަކަށް 500 އެއްހާ ޑޮލަރަށް ލިބޭ އެ ބޭސް ކްލިނިކަކުން 23،000ރ އަށް އާސަންދައަށް ބިލު ކުރަމުންދާ މައްސަލަ ސޯޝަލް މީޑިއާގައި މީހަކު ވަނީ ތިލަކޮށްފަ އެވެ.
އާސަންދައިން އެކަން ބަލަން ފަށާފައިވާއިރު، ނާޒިމް ވިދާޅުވީ ފާއިތުވި އަހަރެއްގެ ތެރޭގައި އެ ކުންފުނިން އެ އަގުގައި 1،000 އެއްހާ އިންޖެކްޝަން ވިއްކާފައިވާ ކަމަށެވެ. އަދި އެ ކުންފުންޏަށް 24 މިލިއަނެއްހާ ރުފިޔާ އާސަންދައިން ދީފައިވާ ކަމަށް ވިދާޅުވި އެވެ.
