މި ސަރުކާރަކީ ނަތީޖާ ނެރޭނޭ ސަރުކާރެއް ކަމަށާއި، މި ސަރުކާރުން ޙަޤީޤީ ނަތީޖާ ނެރެން މަސައްކަތްކުރަނީ ޖޯޝާއެކު، ހަލުވި ދުވެލީގައިކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، އެމަނިކުފާނުގެ ސަރުކާރަށް އެއް އަހަރު ފުރުން ފާހަގަކުރެއްވުމަށް، ”ހަފުތާ 52 – ރައްޔިތުންނާއެކު ކުރިއަށް“ މިނަމުގައި ރޭ ބޭއްވި ޚާއްޞަ ޙަފްލާގައި ރައްޔިތުންނާ މުޚާޠަބު ކުރައްވާ ވާހަކަފުޅުދައްކަވަމުންނެވެ.
ރައީސް ވިދާޅުވީ އެމަނިކުފާނު ވެރިކަމާ ޙަވާލުވެވަޑައިގެންނެވިއިރު ސަރުކާރުން ބޭނުންވާ ނަތީޖާތައް ނެރުމަށް ދަތިތަކެއް ހުރިކަމުގައިވިޔަސް، ކުޑަ ދުވަސްކޮޅެއްގެ ތެރޭގައި، ގިނަ ކަންތައްތަކެއް ރައްޔިތުންނާ ހަމައަށް ގެނެސްދެވިފައިވާކަމަށެވެ. އެގޮތުން، އެއަރ އެމްބިއުލާންސްގެ ޚިދުމަތް ތަޢާރަފުކޮށް، 540 ބަލި މީހުން ފަރުވާއަށް ގެންގޮސްދީފައިވާކަމާއި، އައި.ވީ.އެފް އާއި ދަރިމައިވުމުގެ ސިއްޙަތާ ގުޅުންހުރި މުހިންމު ޚިދުމަތްތަކެއް އާސަންދައިގެ ދަށުން ފަހިކޮށްދެވިފައިވާކަމަށެވެ.
ރައްޔިތުންގެ ނަފުސާނީ ދުޅަހެޔޮކަން ކަށަވަރުކޮށްދެއްވުމުގެ އަމާޒުގައި މެންޓަލް ހެލްތު ހެލްޕްލައިން ޤާއިމުކުރައްވައި، އެ ވަޞީލަތް މެދުވެރިކޮށް، ޒުވާނުންނަށް ތަސައްލީ ދެވިފައިވާކަން އެމަނިކުފާނު ފާހަގަކުރެއްވިއެވެ. ކުއްލި ޙާލަތްތަކުގައި އެހީ ހޯދުމަށް ގިނަ ނަންބަރުތަކަށް ގުޅުމުގެ ބަދަލުގައި އެއް ނަންބަރުން ޚިދުމަތް ލިބޭނޭ އެމަރޖެންސީ ސަރވިސް ނަންބަރު، 911 ވެސް ވަނީ މިދިޔަ 52 ހަފުތާގެ ތެރޭގައި ތަޢާރަފުކޮށްފައެވެ.
އެމަނިކުފާނުގެ ވާހަކަފުޅުގައި ސަރުކާރުގެ އަމާޒަކީ ރައްޔިތުންނަށް ބޭނުންވާ އަޅާލުން، ވަގުތު ފާއިތުނުވަނީސް ދިނުންކަން ފާހަގަކުރެއްވިއެވެ. އެގޮތުން، ކުއްލި ޙާލަތްތަކުގައި އެހީ ހޯދުމަށް ގިނަ ނަންބަރުތަކަށް ގުޅުމުގެ ބަދަލުގައި އެއް ނަންބަރުން ޚިދުމަތް ލިބޭނޭ އެމަރޖެންސީ ސަރވިސް ނަންބަރުކަމަށްވާ 911 އިފްތިތާޙުކުރެވިފައިވާކަމަށް ވިދާޅުވިއެވެ. އަދި ރާއްޖޭގައި ބޮޑު މައްސަލައެއް ކަމުގައިވާ ތެލެސީމިއާގެ ކަންކަމުގައި އަޅުއްވާފައިވާ ފިޔަވަޅުތައް ހިއްސާކުރައްވަމުން ވޭތުވެ ދިޔަ 52 ހަފުތާގެ ތެރޭގައި ދައުލަތުގެ ޚަރަދުގައި ބޯންމެރޯ ޓްރާންސްޕްލާންޓު ހެދުމަށް 14 ކުދިން ފޮނުވާފައިވާކަން އެމަނިކުފާނު ހާމަކުރެއްވިއެވެ.
ސަރުކާރުން ބޭނުންވަނީ ނަތީޖާ ނެރުންކަން ތަކުރާރުކުރައްވަމުން ރައީސުލްޖުމްހޫރިއްޔާ ވަނީ ބޯހިޔާވަހިކަމުގައި ހޯއްދަވައިދެއްވާފައިވާ ލުއިފަސޭހަތަކަށް އަލިއަޅުއްވާލައްވާފައެވެ. އެގޮތުން، އަސާސީ ބޯހިޔާވަހިކަން އަތްފޯރާ ފަށަށް ގެނައުމަށްޓަކައި، އިޖުތިމާޢީ ގެދޮރުވެރިކަމުގެ މަޝްރޫޢުތަކުގައި ގެދޮރު ލިބި، އެއަށް ދައްކަން ޖެހޭ ފައިސާ ދެއްކުމުގައި ގޮންޖެހުންތައް ކުރިމަތިވެފައިވާ މީހުންނަށް ލުއިތައް ހަމަޖައްސައިދެއްވާފައިވާކަން އެމަނިކުފާނު ފާހަގަކުރެއްވިއެވެ.
މީގެ އިތުރުން 2025 ގެ ބަޖެޓަކީ ގެދޮރުވެރިކަމާއި ބޯހިޔާވަހިކަމުގެ ބަޖެޓުކަން ފާހަގަކުރައްވައި، ނުފޯރާ ފަށުން ލޯނު ނަގައިގެން ގެއަޅަން ޖެހޭ ޖެހުމަށް ޙައްލު ހޯއްދަވައިދެއްވުމަށް މަސައްކަތްކުރައްވަމުންގެންދަވާ ކަމަށް އެމަނިކުފާނު ވިދާޅުވިއެވެ. އަދި ވަޢުދު ވެ ވަޑައިގެންފައިވާގޮތަށް، ފަސް އިންސައްތައަށް ވުރެ އިތުރު ނޫން ސަރވިސް ޗާޖަކާއެކު، އިސްލާމީ އުޞޫލުން ފައިސާ ދޫކުރާ ލޯން ސްކީމެއް ތަޢާރަފުކޮށްފައިވާކަންވެސް އެމަނިކުފާނު ފާހަގަކުރެއްވިއެވެ. އެ މަނިކުފާނު މި ލޯން ސްކީމް ސިފަކުރެއްވީ، ޙަޤީޤި މާނައިގައި އަތްފޯރާފަށުގެ، އިޖުތިމާޢީ ލޯން ސްކީމެއްގެ ގޮތުގައެވެ.
މީގެ އިތުރުން ހިންގުމާއި ޚިދުމަތްތައް ލާމަރުކަޒުކުރުމަށް ކުރަމުންދާ މަސައްކަތުގެ ތެރެއިން ކައުންސިލްތަކަށް ފަޅުރަށްތައް ޚާއްޞަކޮށް، އައި.ޑީ.ކާޑާއި ޕާސްޕޯޓު ހެއްދުން ފަދަ އިދާރީ އަސާސީ ޚިދުމަތްތައް ރާއްޖޭގެ އެކި ސަރަހައްދުތަކުން ލިބޭނޭ ގޮތް އިންތިޒާމުކޮށް، ރަށްރަށުގެ ބިނާރު ތަރައްޤީކުރުމުގެ މަސައްކަތް ފެށުން ބަޖެޓުކޮށް، ދައުރު ނިމެންވާއިރަށް މަސައްކަތް ނިންމަވާނޭކަމަށް ރައީސުލްޖުމްހޫރިއްޔާ ވިދާޅުވިއެވެ.
