ރާއްޖެއަށް އަންނަ ކްރޫޒް ލައިނާތަކަށް ހިދުމަތް ދިނުމަށްޓަކައި ރާއްޖޭގެ ހަތަރު ސަރަހައްދެއްގައި ކްރޫޒް ޓާމިނަލްތަކެއް އަޅަން ނިންމައިފި އެވެ.
މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ރިސަރޗް އެންޑް ޑިވެލޮޕްމަންޓް ކޮންސަލްޓެންޓް އަނިލް އާދަމް ދައުލަތުގެ މީޑިއާ ޕީއެސްއެމްގައި ވިދާޅުވީ، ކްރޫޒް ލައިނާ ޓާމިނަލްތަކުގެ މަސައްކަތް ކުރިއަށް ގެންދިއުމަށް ނިންމާފައި ވަނީ ކުންފުނިން އެކުލަވާލާ މާސްޓާޕްލޭންގެ ތެރެއިން ކަމަށެވެ
އޭނަ ވިދާޅުވީ ކްރޫޒް ޓާމިނަލްތައް ގާއިމުކުރުމަށް އަމާޒު ހިފާފައި ވަނީ ދެމެހެއްޓެނިވި ގޮތަކަށް ކަމަށެވެ. އެގޮތުން އަންނަ ޖެނުއަރީ މަހު ފީސިބިލިޓީ ނިންމާލުމަށް ފަހު އަންނަ އަހަރުގެ ފުރަތަމަ ކުއަޓަރުގައި ކްރޫޒް ލައިނާ ޓާމިނަލްތަކުގެ އަމަލީ މަސައްކަތްތައް ފެށޭނެ ކަމަށް އަންދާޒާކުރެވޭ ކަމަށް ވިދާޅުވި އެވެ.
ކުރޫޒް ޓާމިނަލްތައް ހަދަން ނިންމާފައި ވަނީ ހއ. އުލިގަމާއި ލ. ފޮނަދޫގެ އިތުރުން އައްޑޫ ހިތަދޫ ގަ އެވެ.
ރާއްޖެ ކޮންމެ އަހަރަކު ވެސް ގިނަ އަދަދަކަށް ކްރޫޒްލައިނާތައް ދަތުރުކުރި ނަމަވެސް އެ އެއްޗިއްސަށް ހިދުމަތް ދޭނެ ހާއްސަ ޓާމިނަލެއް މިހާތަނަށް ހަދައިފައެއް ނުވެ އެވެ.
އައްޑޫގައި ކްރޫޒް ޓާމިނަލެއް ހެދުމުގެ ވާހަކަ މިހާތަނަށް ވަރަސް ގިނަ ފަހަރު މަތިން ކައުންސިލުން ދައްކާފައިވެ އެވެ. އެގޮތުން ކްރޫޒް ޓާމިނަލަކާ އެކީ ޔޮޓް މެރީނާއަކާއި 100 އެނދުގެ ސިޓީ ހޮޓަލެއް އެޅުމަށް މިދިޔަ އަހަރުގެ އޮކްޓޯބަރު މަހުގެ ފަހުކޮޅު ކައުންސިލުން އިންޓަނޭޝަނަލް ޗެއިން މޯލްޑިވްސް ޕްރައިވެޓް ލިމިޓެޑް (އައިސީއެމްޕީއެލް) ކިޔާ ކުންފުންޏަކާ ހަވާލުކުރި އެވެ. އަދި އެއީ ޖުމްލަ 350 މިލިއަން ޑޮލަރުގެ އިންވެސްޓްމެންޓެއް ކަމަށް ބުނެފައިވެ އެވެ.
