ބޭހަށް ނުގުޑާ ޖަރާސީމުތަކުން ސަލާމަތްވުމަށް ކުރިއަށް އޮތް 5 އަހަރަށް އަމާޒުކޮށް އެކުލަވާލި އެކްޝަން ޕްލޭން މިއަދު އިފްތިތާހުކޮށްފި އެވެ.
މި ޕްލޭން އިފްތިތާހުކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދެވެ.
ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވި ގޮތުގައި މިއީ ދުނިޔޭގެ ހުރިހާ ގައުމަކަށްވެސް ކުރިމަތިވެފައިވާ ނުރައްކަލެކެވެ. އަދި މިކަމުގައި ރާއްޖޭގެ ރައީސުލްޖުމްހޫރިއްޔާ ނަމޫނާ ދައްކަވަމުން ގެންދަވާ ކަމަށް އޭނާ ވިދާޅުވި އެވެ.
އދ. އިން ރާއްޖެއަށް ކަނޑައަޅާފައި ހުންނަވާ ސަފީރު ޑރ. އަނުއްރުދެ ތުޝާރާ ވިދާޅުވީ މިއީ މުޅި ދުނިޔެއިން ތަހައްމަލުކުރަމުންދާ ހަމަހިމޭން ބޮޑު ކާރިސާއެއް ކަމަށެވެ. އަދި ދެކުނު އޭޝިއާ ސަރަހައްދުގައި މި މައްސަލަ އިތުރަށް ބޮޑުވެފައިވަނީ ބޭސް ސިޓީ ނެތި އެންޓިބައޮޓިކްސް ވިއްކަމުންދާތީ ކަމަށް އޭނާ ވިދާޅުވި އެވެ.
މިގޮތުން 2024 އިން 2029 އަށް އެކުލަވާލި މި އެކްޝަން ޕްލޭންގެ ދަށުން ރާއްޖޭގެ ހުރިހާ ސަރަހައްދެއްގައި މަސައްކަތްތަކެއް ކުރިއަށް ގެންދާނެ އެވެ. އަދި އާންމުން ހޭލުންތެރިކުރުމާއި، އުސޫލުތަކަށް ގެންނަންޖެހޭ ބަދަލުތަކާއި ގުޅުންހުރި އިދާރާތައް އެކުގައި މަސައްކަތްކުރާނެ ގޮތްތަކެއް ކަނޑައަޅާނެ އެވެ.
