ހިކަނދި ފަތަކީ ތަފާތު އެކިކަހަލަ ކާއެއްޗެހީގެ ރަހަ މީރު ކުރުމަށް އަޅުގަނޑުމެން އެންމެންވެސް ބޭނުން ކުރާ އެއްޗެކެވެ. މިއީ ރަހަ މީރު އެއްޗަކަށްވީއިރު މިއީ ތަފާތު އެކިކަހަލަ ނިއުޓްރިއެންޓުތައް ހިމެނޭ، އަދި ސިއްހަތަށް ވަރަށް ފައިދާ ހުރި އެއްޗެކެވެ.
ކޮންމެ ދުވަހަކުވެސް ދުވަސް ފަށައިގަންނައިރު ހިކަނދިފަތް ކެއުމަކީ އޭގެ ސަބަބުން ހަށިގަނޑަށް ވަރަށް ފައިދާ ހުރި ކަމެކެވެ.
ހިކަނދިފަތަކީ ގިނަ އަދަދަކަށް ފައިބާ އެކުލެވޭ ކެުމުގެ ބާވަތެއްކަމުން ދުވަސް ފަށައިގަތުމަށް މި ބޭނުން ކުރާނަމަ، އޭގެ ސަބަބުން މީހާގެ ހަޖަމުގެ ނިޒާމުގެ މަސައްކަތް ރަނގަޅު ވެއެވެ. އަދި އޭގެ ސަބަބުން ކާއެއްޗެހި ފަސޭހަކަމާއެކު ހަޖަމުވެ، ބޮޑު ކަމުދެވޭ ވަރުވެސް އިތުރުވެއެވެ. އަދި ބަނޑު ހަރުވުމުންވެސް ދުރުވެއެވެ.
މިއީ ލޭގައި ހަކުރު ހުންނަ މިންވަރުވެސް ދައްކޮށްދޭ އެއްޗެކެވެ. އެހެންކަމުން މިއީ ހަކުރި ބަލި ހުންނަ މީހުން ބޭނުން ކުރުން ވަރަށް ރަނގަޅު އެއްޗެކެެވެ. ހިކަނދިފަތަކީ އިންސިއުލިން ސެންސިޓިވިޓީ އިތުރު ކޮށްދޭ އެއްޗެއް ކަމުން، މި ބޭނުން ކުރުމުން ލޭގައި ހަކުރު ހުންނަ މިންވަރު ދައްވެ، އެކަމުގެ ސަބަބުން ދިމާވާ ސިއްހީ މައްސަލަ ތަކުން މީހާ ދުރުކޮށްދެއެވެ.
މީގެ އިތުރުން މިއީ ބަރުދަން ލުއި ކުރުމުގައިވެސް އެހީވެދޭ އެއްޗެކެވެ. ހެނދުނު ހެނދުނާ ދުވަސް ފަށައިގަތުމަށް ހިކަނދިފަތް ބޭނުން ކުރުމުން ހަށިގަނޑުގައި ހުންނަ ސަރުބީ ފަސޭހަކަމާއެކު ބޭރުވެ، މީހާގެ މެޓަބޮލިޒަމް ރަނގަޅު ވެއެވެ. އަދި އޭގެ ސަބަބުން މީހާގެ ބަރުދަން ލުއިވެއެވެ.
ހިކަނދިފަތަކީ މިނޫނަސް އެތައް ފައިދާތަކެއް އެކުލެވޭ އެއްޗެކެވެ. މި ބޭނުން ކުރުމުން މީހާގެ އެތެރެ ހަށީގައިވާ ތަފާތު އެކި ގުނަވަންތަކުގެ މަސައްކަތް ރަނގަޅުވެއެވެ. އެހެންކަމުން ދުޅަހެޔޮ ސިއްހަތެއްގައި ހުންނަން ބޭނުންވާނަމަ ކޮންމެ ދުވަހަކު މި ބޭނުން ކުރުމަކީ ރަނގަޅު ކަމެކެެވެ.
