ފީފާ ވޯލްޑް ކަޕް ފުޓްބޯޅަ މުބާރާތް 2034 ވަނަ އަހަރު، ސައުދީ އަރަބިއްޔާގައި ބާއްވަން ހުށަހަޅާފައިވާ ޕްރޮޕޯސަލްއާ ގުޅޭ އިވެލުއޭޝަން ރިޕޯޓް ފީފާއިންވަނީ މިހާރު އާއްމުކޮށްފައެވެ. އާއްމުކޮށްފައިވާ އިވެލުއޭޝަން ރިޕޯޓަށް ބަލާއިރު، އެ ބިޑާ އެއްވަރުގެ ސްކޯއެއް މިހާތަނަށް އެއްވެސް މުބާރާތެއްގައި އެއްވެސް ގައުމެއްގެ ބިޑަކަށް ލިބިފައެއް ނުވެއެވެ.

2034 ވަނަ އަހަރުގެ ވޯލްޑް ކަޕް ހޯސްޓް ކުރުމަށް ބިޑްކޮށްފައިވަނީ ސައުދީ އަރަބިއްޔާއިން އެކަންޏެވެ. އެހެންކަމުން ވާދަވެރިކަމެއް ނެތި އެ ބިޑް ސައުދީން ކާމިޔާބު ކުރާނެ ކަމަށް ރިޕޯޓްތައް ބުނެއެވެ. ބިޑް ކާމިޔާބުކުރިކަން ނުވަތަ ނޫންކަން ރަސްމީކޮށް ފީފާއިން އިއުލާން ކުރާނީ އަންނަ ހަފްތާގައި އޮންނަ ފީފާގެ ބައްދަލުވުމުގައެވެ.

ސައުދީ އަރަބިއްޔާއިން 2034 ވަނަ އަހަރުގެ ވޯލްޑް ކަޕް ބާއްވަން ކުރާ މަސައްކަތުގެ ތެރެއިން 11 ދަނޑު އެޅުމުގެ ޕްލޭންވަނީ ހަދާފައެވެ. ސައުދީން ޕްލޭންކޮށްފައިވާ އާ 11 ދަނޑުގެ ތެރެއިން އަށް ސްޓޭޑިއަމް ހުންނާނީ ވެރިރަށް ރިޔާޒުގައެވެ. އޭގެ ތެރޭގައި 92،760 މީހުންގެ ޖާގައިގެ ކިންގް ސަލްމާން އިންޓަނޭޝަނަލް ސްޓޭޑިއަމް ހިމެނޭއިރު، އެ ދަނޑުގައި ވޯލްޑްކަޕް ހުޅުވާ މެޗާއި ފައިނަލް ކުޅޭނެ އެވެ.