ކޮފީ ބުއިމަކީ އިންސާނާގެ އުމުރު 2 އަހަރެއްހާ ދުވަހަށް އިތުރުކުރުމަށް މަގުފަހިކޮށްދޭ ކަމެއް ކަމުގައި އަލަށް ހެދި ދިރާސާ އަކުން ދައްކައިފިއެވެ.
ޕޯޗުގަލްގައި ކުރިއަށް ގެންގޮސް، އޭޖިން ރިސާޗް ރިވިއު ޖާނަލްސްގައި ޝާއިއުކޮށްފައިވާ މި ދިރާސާގެ ރިޕޯޓުގައި ބުނެފައިވަނީ އިންސާނާގެ އުމުރު މަތިވަމުން އަންނައިރު، މެދުމިނުގައި ކޮފީ ބުއިމަކީ ދުޅަހެޔޮ ސިއްހަތެއްގައި އަދި ބެލެންސް ދިރިއުޅުމަކަށް އެހީތެރިވެދިނުމުގައި މުހިންމު ދައުރެއް އަދާކުރާނެ ކަމެއް ކަމަށް ލަފާކުރެވޭ ކަމަށެވެ.
އަދި އަދި ކޮފީ ބުއިމުން ލިބޭ ފައިދާގެ ގޮތުގައި އެވްރެޖްކޮށް އެއް އަހަރާއި 8 މަސް ދުވަހުގެ މުއްދަތަކަށް އުމުރު ދިގުވުން (ސިއްޙަތު ރަނގަޅަށް ސަލާމަތުން) ހިމެނޭ ކަމަށް ރިޕޯޓުގައި ބުނެފައިވެއެވެ.
އެނގޭ އެއް ހަގީގަތަކީ ދުނިޔޭގެ އާބާދީ މިހާރު މުސްކުޅިވަމުންދާ މިންވަރަކީ މީގެ އަހަރުތަކެއް ކުރިން މީހުން މުސްކުޅިވި މިންވަރާ އަޅާބަލާއިރު ނުވަތަ އުމުރާ އަޅާ ބަލާއިރު ބޮޑުތަނުން އަވަސްވެފައިވާ ކަމެއް ކަން، އެހެންވީމަ ޑައެޓްރީ އިންޓަވެންޝަންތައް ހޯދުމަކީ ވަރަށް މުހިންމު ކަމެއް، އޭގެ ސަބަބުން މީހުންނަށް ދިގު މުއްދަތަކަށް ދިރިއުޅުމުގެ އިތުރުން ދުޅަހެޔޮ ދިރިއުޅުމެއް ވެސް އުޅެވޭނެ،“ މި ދިރާސާކުރުމުގައި އެނެމް އިސްކޮށް ހަރަކާތްތެރިވި ޕޯޗުގަލްގެ ކޮއިމްބްރާ ޔުނިވާސިޓީގެ ރޮޑްރިގޯ ކުންހާ ވިދާޅުވި އެވެ.
ކޮފީ އިން ލިބޭ ސިއްހީ ފައިދާތަކާ ގުޅިގެން ހެދިފައިވާ ގިނަ ދިރާސާތަކުގައިވެސް ފާހަގަވާ ކަންތައްތަކުގެ ތެރެގައި ކޮފީ އަކީ ހިތުގެ ބަލިތަކާއި ކޮގްނިޓިވް ދަށްވުމާއި ދާއިމީ ބަލިތައް ޖެހުމުގެ ފުރުސަތު ކުޑަކޮށްދޭ އެއްޗެކެވެ.
އާންމުގޮތެއްގައި ކެފެއިންއާ ގުޅިފައިވާ ކޮފީގައި 2،000 އަށް ވުރެ ގިނަ ބަޔޯއެކްޓިވް ކޮމްޕައުންޑްސް އެކުލެވިގެންވާ އިރު، އޭގެ ތެރޭގައި އެންޓިއޮކްސިޑެންޓް އަދި އެންޓި-އިންފްލެމޭޓަރީ ފައިދާތައް ފޯރުކޮށްދޭ، ނިއުރޯއިންފްލެމޭޝަން ދަށްކޮށް، އިންސިއުލިން ސެންސިޓިވިޓީ ރެގިއުލޭޓް ކޮށްދޭ މާއްދާތައް ހިމެނެ އެވެ.
”އަޅުގަނޑުމެންގެ ރިވިއުގައި ފާހަގަކޮށްފައި ވަނީ އާންމުކޮށް ކޮފީ ބޯ ނަމަ، އުމުރުން ދުވަސްވާ ވަރަކަށް، ގުދުރަތީ ގޮތުން ހަށިގަނޑުގައި ބަލިކަށިކޮށްލާ ބަޔޮލޮޖިކަލް މެކޭނިޒަމްތަކާ ދެކޮޅަށް މެދުވެރިއެއްގެ ގޮތުގައި މަސައްކަތްކޮށް އެކަން ކަމުގެ އަސަރުކުޑަކޮށްދޭ ކަން. – ރޮޑްރިގޯ ކުންހާ ވިދާޅުވި އެވެ.
ނަމަވެސް ކޮފީ އާއި އޭގެ ބައިތަކުގެ ސަބަބުން ދުޅަހެޔޮ ސިއްހަތެއްގައި ދިރިއުޅުން ފުޅާކުރުމަށް އެހީތެރިވެދޭ ސީދާ މެކޭނިޒަމްތައް އަދި ނޭނގޭ ކަމަށާއި ކުރިއަށް އޮތް ތަނުގައި ކުރެވޭ ދިރާސާތަކުން މިކަން އިތުރަށް ދެނެގަނެވިދާނެ ކަމަށް ސައިންސްވެރިން ވަނީ ބުނެފަ އެވެ.
