ބައެއް މީހުން އަބަދުވެސް ދައްކާނީ އެމީހާއަށް ބޭނުންވާ ކޮންމެވެސް ކަމެއް ނުވެގެން އުޅޭ ވާހަކައެވެ. އެހެން މީހުންނަށް ތިމާކޮށްދޭންޖެހޭ ކަންކަން ނުކޮށްދެވޭކަން ހިތަށްވެސް ނާރުވައެވެ. ބައެއް ދެމަފިރިންގެ މެދުގައިވެސް މިއީ ވަރަށް ބޮޑުވެފައިވާ ކަމެކެވެ.
ފުރަތަމަ ކަމަކަށްވެސް ވިސްނާށެވެ! ފިރިހެނުންނަށް ގިނަ އަނބިން ހުއްދައެވެ. 4 އަނބިންވެސް ހަމަކުރެވިދާނެއެވެ. އެ 4 މީހުންގެ ކިބައިންވެސް އުފާ ހޯދިދާނެއެވެ. ނަމަވެސް އަނބިންނަށް އުފާވެރިކަން ލިބެން އޮތީ ހަމައެކަނި ފިރިމީހާގެ ކިބައިންނެވެ. ވީމާ އަނބިމީހާގެ ޙައްޤުތައް އަދާނުކޮށް ހުރުން ހުއްދަވާނީ ކިހިނަކުން ހެއްޔެވެ؟
ބައެއް ފިރިހެނުން އިތުރު އަނބިން ހޯދަމުން އަދި ހިލޭ އަންހެނުންގެ ގާތަށް ދަމުންވެސް ދައްކާނީ އެމީހުންނަށް ކަންތައްތަކަކަށް ބޭނުންވެ ބޭނުންވާވަރަށް ނުފުދިގެން އުޅޭ ވާހަކައެވެ. އިތުރު ކައިވެނިކުރަނީ އެހެން ގޮތް ގޮތުން ކަންކަން ކުރަނީވެސް އެމީހުންނަށް ލިބެންޖެހޭ އުފާވެރިކަން ނުލިބިގެން ކަމަށެވެ.
މިފަދަ ގޮތްގޮތަށް ވާހަކަ ދައްކާ ބައެއް ފިރިން އަނބިންއިއެކު ރޭނުކޮށް މަސްދުވަސް އެބަ ދުއްވާލައެވެ. ބަލަ އޭނާވެސް ކަންކަމަށް ބޭނުންވާ ފަދައިން އަނބިމީހާ ވެސް ކަންކަން ބޭނުންނުވާނީހެއްޔެވެ؟ އޭނާގެ ބޭނުންތައް ފުއްދައިދޭންހުރީ ފިރިމީހާ ފިޔަވައި ކާކުހެއްޔެވެ؟
މިއީ މިފަދަ ގޮތްގޮތަށް ޢަމަލުކުރެވޭ ފިރިހެނުންކުރާ ވަރަށް ބޮޑު ނުބައިކަމެކެވެ. ބޮޑުފާފައެކެވެ. ދެވަނަ އަންބެއްގެ ވިސްނުން ގެންނަން ޖެހޭނީވެސް އަނބިމީހާއަށް އަދާކުރަންޖެހޭ ޙައްޤުތައް އަދާކުރުމަސްފަހުގައެވެ. އަނބިމީހާގެ ކިބައިން ތިބާ ބޭނުންވާ ވަރަށް ކަންކަން ނުފުދޭނަމައެވެ. ޚާއްޞަކޮށް ދެވަނަ އަންތބަކު ބެލެހެއްޓުމުގެ ޤާބިލުކަން ތިމާގެ ކިބައިގައި ހުރިނަމައެވެ. މިހާރު ތިބި އަނބިދަރިންނަށް ކުރަންޖެހޭ ޚަރަދުތައް ކުރަމުން އެމީހުންނަށް އެއްވެސް ކަމެއް އުނިނުކޮށް ދެވަނަ އަނބިމީހާގެ ބޭނުންތައް ފުއްދައިދެވޭނެ ނަމައެވެ.
މިބާވަތުގެ ވާހަކަތައް ދައްކާތީ އަހުރެން ދައްކާ ވާހަކަ ކަމުނުދާ މީހުންވެސް އުޅެއެވެ. އެއީ އަހުރެން ކަންބޮޑުވާ ކަމެއް ނޫނެވެ. މިދައްކަނީ ހަމަ ދީނީ ވާހަކަތަކެވެ. އެއްމުސްލިމަކު އަނެއް މުސްލިމަކަށް އަދާކުރަންޖެހޭ ޙައްޤުތަކުގެ ވާހަކައެވެ. އަދާނުކުރުމުން ފާފަވެރިވާނެ ކަންކަމުގެ ވާހަކަތަކެވެ. އެއިގެ އިތުރުން ޢާއިލާތައް ރޫޅި ދަރިންތައް މަގުމަތިވެ މުޖުތަމަޢުގައި ބޮޑެތި މައްސަލަތައް އުފެދި އިތުރުވަމުން އަންނަ ކަންކަމުގެ ވާހަކަތަކެވެ.
