ފުރަތަމަވެސް ކުރަންޖެހޭ ސުވާލަކީ ކައިވެނިކުރަނީ ކީއްކުރަންތޯއެވެ. ޖަވާބުގައި ބުނަން ޖެހެނީ ދެމީހަކު ކައިވެނި ކުރަނީ ޒަވާޖީ ޙަޔާތެއް ފެށުމަށް ކަމަށެވެ. ޒަވާޖީ ޙަޔާތެއް ފެށުމުގެ ބޭނުމަކީ ކޮބައިކަމަށް ބަލާއިރު ޒަވަޖީހަޔާތެއް ފަށަނީ ބާއްޖަވެރި، އުފާވެރި ދިރިއުޅުމެއް އުޅުމުގެ އުންމީދުގައެވެ. ވީމާ އެ ބިންގާ ހަރުދަނާ ނުކުރެވިއްޖެ ނަމަ ދެން ވާނީ ކިހިނެއް ހެއްޔެވެ؟
އެ ބިންގާ ވަރުގަދަ ކުރެވޭނީ ކައިވެންޏަށް ކުރާ ބޮޑު ހޭދައަކުން ނޫނެވެ. ކައިވެނި ކައިވެނީގެ ގޮތުގައި ކޮށްގެންނެވެ. މާނައަކީ ކައިވެނީގެ ކުރިން ހޭދަކުރާ ދުވަސްތައް ﷲ ތަޢާލާ އެންގެވި ގޮތުގައި ހޭދަކުރަންޖެހޭނެ ކަމެވެ. ކައިވެންޏަށްފަހު ކުރަންޖެހޭ ކަންކަން ކައިވެނީގެ ކުރިން ކުރުމަށްފަހު ކައިވެންޏަކީ ހަމައެކަނި ސެޓުފިކެޓެއް ހޯދަން ކުރާ ކަމަކަށް ހަދައިފިނަމަ ބިންގާ އެއޮތީ ފުރަތަމަވެސް ވަރަށް ބޮޑަށް ގޯސްވެފައެވެ.
ހަރުބަހުގައި އޮންނަނީ ބިންގާ ތެދުކޮށް ވަރުގަދަކުރުމަށެވެ! ނޫންނަމަ އެބިންގާމަތީގައި ކުރާ ޢިމާރާތް ހުންނާނީ ކައްޗަށް ކަމަށެވެ. އަދި ބިންގާ ބަލިކަށިނަމަ ޢިމާރާތްވެސް ބަލިކަށިވެ ވެއްޓުން އަވަސްވާނެ ކަމަށެވެ.
ޒަވާޖީ ޙަޔާތް ފެށުމުގެ ކަންކަން ވެސް އޮތީ ހަމަ މިފަދަ ގޮތަކަށެވެ! އެންމެ މުހިންމީ ހަރުދަނާ ބިންގަލެކެވެ! ހަރުދަނާ ފެށުމެކެވެ. އެކންކުރެވެނީ ބާއްވާ ބޮޑު ކައިވެނީގެ ޙަފްލާއަކުންނޫނެވެ. ހަފްލާއަށްދާ މީހުންގެ ޢަދަދާ ޕާޓީގެ ފުރިހަމަކަމަކުންވެސް ނޫނެވެ.
ކައިވެނި ރޫޅުމަކީ މިހާރު ވަކި ޤައުމަކަށް ޚާއްޞަ ކަމެއް ކަމަށް ބުނެވޭކަށް ނެތެވެ. އަދި ވަކި މުޖުތަމައުތަކެއްގައި ހިނގާ ކަމެއް ކަމަށްވެސް ބުނެވޭކަށް ނެތެވެ. ނަމަވެސް ކައިވެނި ރޫޅުން އިސްލާމީ މުޖުތތަމައުތަކުގައި ގިނަކަން ޤަބޫލުކުރަންޖެހެއެވެ. މިހެންވުމަށް ދިމާވާ ސަބަބުތައް ވެސް އެބަހުއްޓެވެ.
މިއީ ބަވަނަވެފައިވާ ދުނިޔެއެކެވެ. ލޮލަށް ނުވެސް ފެންނަ މީހުންނާއި އެބަ ގުޅުން އުފައްދައެވެ. އަދި ކައިވެނި ކުރާ ހިސާބަށް އެބަދެއެވެ. އެފަދަ ކަމެއް ދަރިންގެ ކިބައިން ހުށަހެޅި ނަމަވެސް ފުރަތަމަ ކުރާ ކަމަކީ ރުޅި އައުން ކަމަށް ނުހަދާށެވެ. ދަރިފުޅު އެގުޅުނީ ކާކާއިކަން ބަލާށެވެ! އޭނާއަކީ ހެޔޮލަފާ މުސްލިމަކަށް ވެފައި އަޚްލާޤް ރަނގަޅުވެފައި ދިރިއުޅެން މަސައްކަތް ކުރާ މީހަކު ނަމަ އަވަހަށް ބަލައިގަންނާށެވެ.
އޭނާއަކީ އެހެން ޤައުމެއްގެ ނުވަތަ އެހެން ޤަބީލާއެއްގެ މީހަކަށް ވެސް ވެދާނެއެވެ. އެހެން ކުލައެއްގެ މީހަކަށްވެސް ވެދާނެއެވެ. އެކަންކަމާއި ހަނގުރާމަނުކުރާށެވެ. އެހެނީ ކައިވެނި މިކުރަނީ މީހުންނާއިއެވެ. ޤައުމުތަކާއި ނަސްލުތަކާއި ގައިގެ ކުލައަކާއިވެސް ނޫނެވެ. ކޮންމެ ޤައުމެއްގެ ކޮންމެ ނަސްލެއްގެ އަދި ކޮންމެ ކުލައެއްގެ މީހެއް ނަމަވެސް އެމީހާއަކީ ތަޤްވާވެރިއެއްނަމަ އަމިއްލަ ޤައުމާއި ނަސްލުގެ މީހަކަށްވުރެ މާ ހެޔޮލަފާ މީހަކަށްވެސް ވެދާނެއެވެ.
މައިންބަފައިން ކުއްލިއަކަށް ކައިވެނި ހަމަޖެއްސުމަކީވެސް މައްސަލައެކެވެ. އެވަގުތު ދަރިންނަށް ބުނެވޭނެ މާ ބޮޑު ބަހެއް ނުއޮވެއެވެ. އެހެންކަމުން ކިޔަމަންތެރިކަން އަދާކުރުމުގެ ގޮތުން މައިން ބަފައިން ބުނާ މީހަކާއި ކައިވެނިކޮށްފާނެއެވެ. ނަމަވެސް ގިނަ ފަހަރަށް އެއިރު ކައިވެނި ކުރެވޭ ދެ މީހުންވެސް ތިބެނީ ކޮންމެވެސް މީހަކާއި ކޮންމެވެސް ސިފައެއްގައި ގުޅިގެންނެވެ. ވީމާ މައިން ބަފައިން ކުރުވި ކައިވެނިމަތީގައި އުޅުން އޮންނަނީ ފަސޭހަ ކަމަކަށް ނުވެފައެވެ. ޒަވާޖީ ހަޔާތަށް ފަށާތަނުން މައްސަލަތައް ޖެހެން ފެށުމުގައި މިފަދަ ސަބަބުތައް މެދުވެރިވެއެވެ.
ހަމަ މިއާއެކު ދަރިންގެވެސް މަސްއޫލިއްޔަތެއް އެބަ އޮވެއެވެ. އެއީ އަމިއްލައަށް ބައިވެރިއަކު ހޯދައި ”އެފެއާ“ ފެށުމުގެ ކުރިން މައިން ބަފައިންގެ ބަސް ހޯދުމެވެ. އެމީހުން ރުހޭތޯ ބެލުމެވެ. ގިނަ ދުވަސްތަކެއް ވަންދެން ސިއްރުން ގުޅިގެން އުޅުމަށްފަހު މައިންބަފައިންނަށް ހުށަހެޅުމުން ދެކޮޅު ހަދައިފިނަމަ ދެން އުފެދޭ މައްސަލަތަކުގެ ސަބަބުން މުޅި ހަޔާތް ނާކާމިޔާބުވެފައިވެސް އެބަހުއްޓެވެ. ފުރަތަމަ ކަމަކަށް ”އެފެއާ“ ހިންގުމަކީ އިސްލާމް ދީން ހުއްދަކުރާ ކަމެއް ނޫނެވެ. ބޯއިފްރެންޑާ ގާލްފްރެންޑަކީ އިސްލާމް ދީން ދަންނަ ބައެއްވެސް ނޫނެވެ. މިބުނަނީ ލޯބިވެގެން ކައިވެނި ނުކޮށް އުޅުމަކީ އިސްލާމް ދީން ދަންނަ ކަމެއް ނޫން ވާހަކައެވެ.
ދަރިންގެ އެންމެ ބޮޑު ޒިންމާއަކީ މީހާ ނުފެނި މީހަކާއި ގުޅި ވާހަކަ ދެއްކިނަމަވެސް އިސްލާމް ދީނުގެ އިންތަކުން ބޭރުނުވުމެވެ. ދީން ހުއްދަ ނުކުރާ މުޢާމަލާތުތައް ނުކުރުމެވެ. ފުރަތަމަވެސް ހިތުގައި ބާއްވަންވީ އިސްލާމް ދީން ހުއްދަ ނުކުރާ އިންތަކުން ހިލޭ އަންހެނުންނާއި ފިރިހެނުން އެއްވެސް މުޢާމަލާތެއް ކުރުމަކީ ކަނޑައެޅިގެން ޙަރާމް ކަމެއް ކަމެވެ. ވާހަކަ ދެއްކި ނަމަވެސް އެހެންކަމެއް ކުރި ނަމަވެސް ކުރަންވާނީ އިސްލާމް ދީނުގެ އިންތަކުގެ ތެރެއިން ކަމެވެ. ޚުދު ތިމާގެ އަވަށްޓެރިއެއް ނަމަވެސް މިކަންކަން ބާއްވަން ޖެހޭނީ އިސްލާމް ދީނުގެ އިންތަކުގެ ތެރެއިންނެވެ.
ހަމައެއާއިއެކު މިކަމުގައި މައިން ބަފައިންގެވެސް ދައުރެއް އެބައޮވެއެވެ. އެއީ ދަރިންނަށް ޖެހިލުމެއް ނެތި އެފަދަ މައްސަލަތައް ހުށަހަޅަން ކެރޭނެ ފަދަ ގޮތަކަށް ދަރިން ތަރުބިއްޔަތު ކުރުމެވެ. އެކުވެރިކަމާއިއެކު ދަރިން ގެންގުޅުމެވެ. ސިއްރު ވާހަކަ ހިއްޞާ ކުރާ ފެންވަރުގައި ދަރިންނާއި ކުރިންސުރެ މުޢާމަލާތު ކުރުމެވެ. ނޫންނަމަ އެފަދަ ކަންކަމުގެ ވާހަކަ ބުނަން ދަރިން ބިރުގަނެ ޖެހިލުންވާނެއެވެ.
މިބަޔާންކުރި ކަންކަމަށް ވަރަށް ބޮޑަށް ސަމާލުކަން ދޭންޖެހޭނެއެވެ. ބާއްޖަވެރި ޙަޔާތެއް ލިބޭނީ އެއިރުންނެވެ. އުފާވެރި، ކާމިޔާބު ދިރިއުޅުމެއް ވެސް ލިބޭނީ އެއިރުންނެވެ.
