މިދިޔަ އަހަރު ތެރޭ ހޯދުނު އެންމެ ބޮޑު ކާމިޔާބަކީ ރާއްޖެއަށް ދިމާވެފައި އޮތް މާލީ ހާލަތުން އަރައިގަނެ، ބަނގުރޫޓުވިޔަ ނުދީ ހިފެހެއްޓުން ކަމަށާއި ދެން އޮންނާނީ ތަރައްގީކުރުން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ދުނިޔޭގެ އެންމެ ބޮޑު އެއް ކްރެޑިޓް ރޭޓިން އޭޖެންސީ، މޫޑީސް އިން ރާއްޖެއަށް އެންމެ ފަހުން ދިން ސީއޭއޭ2 ރޭޓިން ވަނީ ދަމަހައްޓައިފައެވެ. މޫޑީސް އިން ރާއްޖެއަށް ދީފައިވާ ރޭޓިން ސީއޭއޭ1 އިން ސީއޭއޭ2 އަށް ދަށްކުރީ މިދިޔަ ސެޕްޓެމްބަރު މަހުގެ ތެރޭގައެވެ. ސީއޭއޭ-2 ރޭޓިންއަކީ މާލީ ހާލަތު ދަށް އަދި ދަރަނި ނުދެއްކިދާނެ ފަދަ ހާލަތެއް އޮންނަ ގައުމުތަކަށް ދޭ ރޭޓިންއެކެވެ.
އއ. ރަސްދުއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ރައީސް ވިދާޅުވީ، މިދިޔަ ވެރިކަން ނިމުމުގެ ކުޑަދުވަސްކޮޅެއް ކުރިން އައިއެމްއެފް އިން ރާއްޖެއާ ގުޅޭ ރިޕޯޓެއް ނެރުނު ކަމަށާއި އެ ރިޕޯޓުގައިވެސް ރާއްޖެ އޮތީ ބަނގުރޫޓްވާ ހިސާބުގައިކަން ފާހަގަކޮށްފައިވާ ކަމަށެވެ. ނަމަވެސް ސަރުކާރަށް މިވީ އަހަރެއްހާ ދުވަހުގެ ތެރޭގައި ގައުމު ބަނގުރޫޓުވިޔަނުދީ ހިފެހެއްޓުމަކީ ލިބުނު ކާމިޔާބީއެއް ކަމަށް ވިދާޅުވިއެވެ.
”އިގުތިސާދު ސަލާމަތްކޮށް، ސަލާމަތުގެ އައްސޭރިއަށް ގެންދިއުން އެއީ ހަގީގަތުގައި މިދިޔަ އަހަރު އަޅުގަނޑުމެންނަށް ކުރެވުނު އެންމެ ބޮޑު ކަންތައް. ޑިފޯލްޓުނުވެ، ގައުމު ސަލާމަތްކުރުން،“ ރައީސް ވިދާޅުވިއެވެ.
މޫޑީސް އިން މި މަހުގެ ތިން ވަނަ ދުވަހު ނެރުނު ބަޔާނުގައި ކްރެޑިޓް ރޭޓިން ދެމެހެއްޓުމުގައި ބަލާފައިވާ މައިގަނޑު ކަންކަމުގެ ތެރޭގައި ރާއްޖޭގެ މާލީ ހާލަތު ކުރިއަށްވުރެ ހަރުދަނާކުރުމަށް އަޅާފައިވާ މުހިންމު ފިޔަވަޅުތަކަަށް ފާހަގަކޮށްފައިވެއެވެ. އެގޮތުން މަރުކަޒީ ބޭންކް އެމްއެމްއޭ އިން އަލަށް ތައާރަފު ކުރި ބޭރު ފައިސާއާބެހޭ ގަވާއިދުތަކާއި އަދި ސަރުކާރުން ޓެކްސްއަށް ގެނައި އިސްލާހުތަކުން ބޭރު ފައިސާގެ ރިޒާވް އިތުރުވުމުގެ ފުރުސަތު ބޮޑު ކަމަށް މޫޑީސް އިން އާންމުކޮށް ޝާއިއުކުރި ބަޔާނުގައި ފާހަގަކޮށްފައިވެއެވެ.
މޫޑީސްގެ ބަޔާނުގައި ރާއްޖެއަށް ބޭރު ފައިސާގެ ފައިނޭންސިން ހޯދުމުގައި ކާމިޔާބީތަކެއް ހާސިލުވެފައިވާކަންވެސް ފާހަގަކޮށްފައިވެއެވެ. އެގޮތުން 2024 ވަނަ އަހަރުގެ ސެޕްޓެމްބަރު މަހު، ރާއްޖެއާއި އިންޑިއާ އާއެކު 400 މިލިއަން އެމެރިކާ ޑޮލަރާއި 30 ބިލިއަން އިންޑިއަން ރުޕީސްގެ ކަރަންސީ ސްވޮޕް އެއްބަސްވުމެއް ގާއިމުކޮށްފައިވުމަކީ ރާއްޖޭގެ މާލީ ހާލަތު ރަނގަޅުކުރުމަށް ކޮށްފައިވާ މުހިންމު ކަމެއް ކަމަށް ބުނެފައިވެއެވެ.
އޭގެ އިތުރުން، ސަރުކާރުން ޓެކްސް ރޭޓުތަކަށް ގެނެސްފައިވާ ބަދަލުތައް ތަންފީޒުވެގެން ދިއުމާއެކު، ބޭރު ފައިސާގެ ރިޒާވް އިތުރުވެގެންދާނެ ކަމަށްވެސް އަންދާޒާކޮށްފައިވެއެވެ.
މޫޑީސް އިން ބުނީ، ކުރިއަށް އޮތް 12-18 މަސް ދުވަހުގެ ތެރޭގައި ބޭރުގެ ދަރަނި އަދާކުރުމަށް ބޮޑު ހޭދައެއް ކުރަންޖެހޭނެ ކަމަށް ބެލެވޭއިރު، ބޭރު ފައިސާ ލިބުމަށް ހުރި ދަތިތައް އަދިވެސް ދެމިގެންދާނެ ކަމަށެވެ. އަދި މިހާރު އެކަށައަޅާފައިވާ ކްރެޑިޓް ރޭޓިން ކުރިއަށް އޮތް ދުވަސްތަކުގައި އެ މިންގަނޑުގައި ދެމެހެއްޓުން ނުވަތަ މަތިވުން ބިނާވާނީ ރާއްޖޭގެ ސަރުކާރަށް ބޭރު ފައިސާ އިން ފައިނޭންސިން ހޯދޭ މިންވަރަށާއި 2025 ވަނަ އަހަރަށް ރައްޔިތުންގެ މަޖިލީހުން ފާސްކޮށްފައިވާ ބަޖެޓުގައި ސަރުކާރުން ކަނޑައަޅާފައިވާ ފިސްކަލް ރިފޯމްތައް ކާމިޔާބު ކަމާއެކު ތަންފީޒުކުރުމުގެ މައްޗަށް ކަމަށްވެސް އެ އޭޖެންސީން ބުނެފައިވެއެވެ.
