އިސްލާމް ދީނުގެ މައިގަނޑު އެންމެ ބޮޑު އަސާސަކީ އިންޞާފް ޤާއިމްކުރުމާ އަނިޔާ ލިބުން ހުއްޓުވުމެވެ. އެކަމުގައި މީހާގެ ފެންވަރަކަށް، ހަސަބާ ނަޞަބަކަށް ބެލުމެއް ނެތިއެވެ. ގާތް މީހަކަށް ދުރުމީހަކަށްވެސް ބެލުމެއް ނެތެވެ. އަނިޔާލިބެމުންދާ މީހަކަށް ލިބެމުންދާ ހިތާމައިން އެމީހާ ސަލާމަތްކުރުމަކީ މީހަކަށް ކުރެވޭނެ އެންމެ ބޮޑު އެއް ހެޔޮކަމެވެ. އެއީ އެންމެ މަތިވެރި އަޅުކަމުގެ ތެރެއިން ހިމެނޭ ކަމެކެވެ.
އަދިވެސް ވަރަށް މުހިންމު އެއްކަމެއް ފާހަގަކޮށްލާނަމެވެ. ޢާއިލީ ދިރިއުޅުމަށް ބަލާއިއރު ދެމަފިރިއެއްގެ ދެމެދުގައި މައްސަލައެއް ޖެހުމުން ޙައްލަކީ ދެމަފިރިން ދުރުވުން ކަމަށް ބުނެ އެކަން އެހިސާބުން ނިންމާލައިގެން ނުވާނެއެވެ. އެފަދަގޮތެއް މެދުވެރިވެއްޖެ ނަމަ ނކަމެތިކަން ލިބި ޙާލުގައި ޖެހޭ މީހާއަށް އެހީތެރިކަން ފޯރުކޮށްދޭންވާނެއެވެ! އެހީތެރިކަން ފޯރުކޮށްނުދެވޭނެނަމަ ވަކިގޮތަކަށް ކަންކަން ނިންމަން ބާރުއަޅައިގެން ނުވާނެއެވެ.
ކަންމިހެން އޮތް ނަމަވެސް މިއަދު ގިނައިން މިފެންނަނީ ނަޞޭޙަތްދޭ މީހުންނެވެ. އެހީތެރިވަނީ އެއިގެތެރެއިން މަދުމީހެކެވެ. ނަތީޖާއަކަށްވަނީ ދޭ ނަޞޭޙަތުގައި ހިފުމުން އިތުރަށް އަނިޔާލިބެންފެށުމެވެ. އަޅާވޭން އިތުރުވުމެވެ. ވީމާ ނަޞޭޙަތް ލިބިގަންނައިރު މިކަންކަމަށްވެސް އެބަ ވިސްނަން ޖެހެއެވެ. ޙަޤީޤީ ޙައްލެއް ލިބޭނީ އެއިރުންނެވެ.
އެއްވެސް މީހަކަށް މީހެގެ ކިބައިން ނުވަތަ ބައެއްގެ ކިބައިން އަނިޔާލިބެމުންދާނަމަ އެ އަނިޔާގައި ކެތްތެރިވުމަށް ބުނެ އަނިޔާލިބެން ދޫކޮށްލުމަކަށް އިސްލާމް ދީނަކު ނެތެވެ. އިސްލާމް ދީނުގައި އޮތީ އެމީހާއަށް ލިބެމުންދާ އަނިޔާއިން ސަލާމަތްކޮށްދިނުމެވެ. އަނިޔާލިބުމުން ސަލާމަތްވުމަށް އެހީތެރިވުމެވެ.
މިސާލަކަށް ދެމަފިރިއެއްގެ ޢާއިލީ ދިރިއުޅުމުގައި އެކަކަށް އަނިޔާލިބެމުންދާނަމަ އެ އަނިޔާއަށް ކެތްތެރިވުމަށް ބުނެ އެކަން އެހިސާބުން ނިންމާލައިގެން ނުވާނެއެވެ! އަނިޔާއިން ސަލާމަތްކޮށްދޭން އެމީހަކަށް ކޮށްދެވެން އޮތް ހުރިހާ ކަމެއް ކޮށްދޭންވާނެއެވެ!
މިސާލަކަށް އަނބިމީހާއަށް ފިރިމީހާގެ ކިބައިން އަނިޔާލިބެމުންދާނަމަވެސް އަދި ފިރިމީހާއަށް އަނބިމީހާގެ ކިބައިން އަނިޔާލިބެމުންދާނަމަވެސް ކެތްތެރިވާށޭ ބުނުމަކުން ނުފުދޭނެއެވެ. އެއަނިޔާއިން އަނިޔާލިބެމުންދާ މީހާ ސަލާމަތްކޮށްދޭން އެހީތެރިވާންވާނެއެވެ. ނަޞޭޙަތްދޭން ޖެހޭ މީހާއަށް ނަޞޭޙަތްދޭންވާނެއެވެ. އެހީތެރިކަމަށް ބޭނުންވާނަމަ އެހީތެރިކަން ފޯރުކޮށްދޭންވާނެއެވެ!
ކޮންމެ ކަމެއްގައިވެސް ގޮތްކިޔަން ވަރަށް ފަސޭހަވާނެއެވެ. އުނދަގޫވަނީ ކަންކުރުމެވެ. ރަނގަޅުވާނެކަމަށް ފެންނަ ގޮތް ބުނެލަން ވަރަށް ފަސޭހަވާނެއެވެ. އެބުނި ގޮތަށް ކަންތައް ކުރުމުން ކުރިމަތިވާ މައްސަލަތަކަށް ޙައްލުހޯދައިދިނުމަކީ ކުރަން ފަސޭހަ ކަމަކަށް ނުވެއެވެ. މިޘާލަކަށް ޙައްލަކީ ކައިވެނި ރޫޅައިލުން ކަމަށް ބުނެ ނަޞޭޙަތްދޭތަނުން އެކަން ޤަބޫލުކޮށް އެކަނިވެ ޙާލުގައި ޖެހުމުން އެހީތެރިވެނުދެވޭނަމަ އަނެކާއަށް އެދެވުނީ ބޮޑު އަނިޔާއެއް ނޫން ދެން އެހެން ކޮންކަމެއް ހެއްޔެވެ؟
–މުފްތީ މެންކުގެ ދަރުސަކުން
