އަންނަ ރޯދަ މަހުން ފެށިގެން އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ މެމްބަރުންނަށް ރޯދަ މަހުގެ އިނާޔަތް ދޭން ފަށާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އދ. ގެ އަތޮޅުތަކަށް ކުރައްވާ ދަތުރުފުޅުގެ ތެރެއިން މިރޭ ދަނގެތީގައި އޮތް ޖަލްސާގައި ވާހަކަ ދައްކަވަމުން ރައީސް ވިދާޅުވީ ރައްޔިތުންގެ މަޖިލީހުގެ އައު ދައުރުގެ މަސައްކަތް އަންނަ ފެބްރުއަރީ މަހު ފެށުމުން ޑަބްލިއުޑީސީގެ މެމްބަރުންނަށް ރޯދަ އިނާޔަތް ލިބޭ ގޮތަށް ގާނޫނަށް އިސްލާހު ގެނައުމަށް ހުށަހަޅުއްވާނެ ކަމަށެވެ.
ގާނޫނަށް އިސްލާހު ހުށަހަޅުއްވައި، ފާސްކޮށް އަންނަ ރޯދަ މަހުން ފެށިގެން އިނާޔަތް ލިބޭ ގޮތަށް ތަސްދީގު ކުރައްވާނެކަމަށް ވެސް ރައީސް ވިދާޅުވި އެވެ.
ޑަބްލިއުޑީސީގެ މެމްބަރުންނަކީ ވެސް މުހިންމު ބަޔަކަށް ހަދައި، އެލަވަންސެއްގެ ބަދަލުގައި މުސާރަ ހިނގާ ގޮތަށް ބަދަލު ގެނައުމަކީ ރައީސްގެ ރިޔާސީ ވައުދެކެވެ. އެމަނިކުފާނު ވަނީ ރިޔާސީ ކެމްޕެއިނުގެ ދުވަސްވަރު ވެސް އެކަން ތަކުރާރުކޮށް ފާހަގަކުރައްވާފަ އެވެ.
އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކަކީ ރަށުގެ ތަރައްގީއަށް މުހިންމު ދައުރެއް އަދާކުރާ ބައެއް.. އެހެންކަމުން ކޮމިޓީގެ މެމްބަރުންގެ ވަރަށް ގިނަ ކަންތައްތަކެއް ހައްލުކޮށްދޭނަމޭ އަޅުގަނޑު ބުނިން ގާނޫނު ހަދާ މަޖިލިސް ތެރެއިން..
އަންހެނުންގެ ތަރައްގީއަށް މަސައްކަތް ކުރާ ކޮމިޓީ މެމްބަރުންނަށް ސީދާ މުސާރަ ނުހިނގާތީ ވިހެއުމުގެ ޗުއްޓީއާއި، ރޯދަ އެލަވަންސް ނުލިބެ އެވެ. އަދި ބޭންކުން ލޯނެއް ނެގުމުގައި ވެސް ދަތިތައް ދިމާވެ އެވެ.
ރައީސް ވިދާޅުވީ ސަރުކާރުން އަބަދުވެސް މަސައްކަތް ކުރާނީ ރައްޔިތުންގެ ކަންބޮޑުވުންތައް ހައްލު ކުރުންކަމަށާއި، ރައްޔިތުންނަށް ވީހާވެސް ލުއިފަސޭހަ ގޮތްތައް ހަމަޖައްސައިދޭނެކަމަށެވެ. މިއާއި އެކު ރައްޔިތުންނަށް ލިބޭ އެއްވެސް އެއްޗެސް އަތު ނުލައި، ރާއްޖެ ބަނގުރޫޓުވިޔަ ނުދީ ގައުމަށް އިތުރު ކުރިއެރުން ގެނެސްދެއްވާނެކަމަށް ރައީސް ވިދާޅުވި އެވެ.
މިރޭގެ ޖަލްސާގައި ވެސް ރައީސް ވިދާޅުވީ ސަރުކާރުން މަސައްކަތް ކުރަނީ މާލީ ދަތިތަކުން އަރައިގަނެ، ފައިސާ ޗާޕު ނުކޮށް ކުރިޔަށް ދިއުމަށް ކަމަށެވެ.