މޯލްޑިވްސް މީޑިއާ ކައުންސިލް (އެމްއެމްސީ) ގެ އާ ދައުރުގެ ރައީސަކަށް ތިލަދުން އޮންލައިންގެ ހުސައިން ސަގީފް މިއަދު އިންތިހާބުކޮށްފި އެވެ.
މިއަދު ފެށި އެމްއެމްސީގެ 16 ވަނަ ދައުރުގެ ރައީސަކަށް ސަގީފާ އެކު ދެން ވާދަކުރީ އެމްއެމްސީ މި ފަހަރުގެ އިންތިހާބުގައި އެންމެ ގިނަ ވޯޓު ހޯދި ”މިހާރު“ ގެ ފާތިމަތު ޝަނާ މުހައްމަދެވެ.
މީގެ ކުރިން އެމްއެމްސީގެ ނައިބު ރައީސްކަން ވެސް ކުރެއްވި ސަގީފް 16 ވަނަ ދައުރުގެ ރައީސަކަށް އިންތިހާބުކުރީ 8 ވޯޓުންނެވެ. ޝަނާ އަށް ލިބުނީ 7 ވޯޓެވެ.
އެމްއެމްސީގެ އާ ދައުރުގެ ރައީސަށް ސަގީފް މި އިންތިހާބުކުރީ ދެ ބުރަށް ވޯޓު ނަގައިގެންނެވެ. ރައީސަކު ހޮވަން އިއްޔެ ބޭއްވި އިންތިހާބުގައި ސަގީފާއި ޝަނާގެ ވޯޓު 7-7 އިން ވީ އެއްވަރެވެ. އެހެންވެ، ނަތީޖާ ނެރުމަށް އަލުން މިއަދު ސިއްރު ވޯޓު ނެގީ އެވެ.
އެކަމަކު ކައުންސިލްގެ ނައިބު ރައީސަކަށް އިއްޔެ ވަނީ އަމިއްލަ ގޮތުން ވާދަކުރެއްވި އިބްރާހިމް މުހައްމަދު އިންތިހާބު ކޮށްފަ އެވެ. އިބްރާހިމް ނުވަ ވޯޓު ހޯއްދެވިއިރު އޭނާއާ ވާދަކުރެއްވި އިބްރާހިމް ފައުޒީ އަށް ހޯއްދެވުނީ ހަ ވޯޓެވެ.
މީޑިއާ ކައުންސިލްގައި ތިބެނީ މީޑިއާތަކުން 8 ނޫސްވެރިއަކާއި އަމިއްލަ ގޮތުން 7 މީހަކާ އެކު ޖުމްލަ 15 މީހެކެވެ. އެ ކައުންސިލްގެ ދައުރަކީ ދެ އަހަރެވެ.
