ރައީސް ޑރ. މުހައްމަދު މުއިއްޒު ދިވެހި ވެރިކަމުގެ ބުރަ ބިޔަ މަސްއޫލިއްޔަތާއި ހަވާލު ވަޑައިގެންނެވީ ފިސާރި ޖޯސާއި ހިތްވަރާއި ބުންވަރާއި އެކުގަ އެވެ.
2023 ވަނަ އަހަރުގެ ނޮވެމްބަރު 17 ވަނަ ދުވަހު ވެރިކަމުގެ ހުވާ ކުރެއްވިއިރު ގައުމުގެ ހަޒާނާ ވަނީ ހަފުސްކޮށްލާފަ އެވެ.
ދިވެހި ރައްޔިތުންނަށް ހައްގުތައް ކަށަވަރު ކުރުމަށާއި އަސާސީ ހައްގުތައް ރައްޔިތުންނަށް ހަމަހަމަ ކަމާއި އެކު ފޯރުކޮށްދިނުމަށް މިއަހަރު ރައީސް ކުރެއްވި ހިތްވަރާއި މަސައްކަތަށް ސުކުރު ހައްގެވެ.
އެމަނިކުފާނު ވަނީ އުންމީދު ގެއްލިފައިވާ ރައްޔިތުންނަށް އުންމީދު އަލިކަން ގެނުވާނެ ކަމުގެ ޔަގީންކަން ގެނެސްދެއްވާފަ އެވެ. ރައްޔިތުންގެ ފަޅީގައި ހުންނަވާނެ ކަން އަމަލާއި ބަހުން އެމަނިކުފާނު ގެންދަވަނީ ސާބިތު ކޮށްދެއްވަމުން ނެވެ. އެއްވެސް ރައްޔިތަކު ބާކީ ނުކުރައްވައި އަޅާލައްވާނެ ކަމުގެ ފުރިހަމަ މިސާލު އެމަނިކުފާ ގެންދަވަނީ ދައްކަވަމުން ނެވެ.
ރައީސް ޑރ. މުއިއްޒުގެ ހިތްވަރާއި ކެރުންތެރިކަމަކީ ދުލަކުން ގަލަމަކުން ބަޔާން ކުރެވޭ ވަރަށް ވުރެ ބޮޑު ހިތްވަރަކާއި ކެރުންތެރިކަމެއް ކަމާއި މެދު މިއަދު ސުވާލު އުފައްދާނެ ފަރާތެއް ނެތެވެ.
ނިމިދިޔަ އެއްވެސް ސަރުކާރަކުން ހައްލުކުރަން ފަސްޖެހިފައިވާ ބޮޑެތި ބިޔަ މައްސަލުތަކުގައި އަޅުއްވާ ހަރުދަނާ ފިޔަވަޅުތަކަކީ އާދައިގެ ވެރިއަކަށް އެޅުއްވޭނެ ފިޔަވަޅުތަކެއް ނޫނެވެ.
ޑޮލަރުގެ ކަޅު ބާޒާރު ނައްތާލެއްވުމަށް ކުރައްވާ މަސައްކަތާއި ފާލުން ނައްޓާފައިވާ ބިދޭސީންގެ މައްސަލަ އާއި ގޭންގު ކުއްތަކާއި ޑްރަގްގެ ނުބައި ކުޅިގަނޑާއި ޓްރެފިކްގެ ބޮޑެތި މައްސަލަތަކުގެ އިތުރުން އާއްމުވެފައިވާ ވައްކަމާއި ކަރަޕްޝަނުގެ މައްސަލަތައް ހައްލު ކުރެއްވުމަށް އަޅުއްވާ ބިރު ކުޑަ ހިތްވަރުގަދަ ނިންމެވުންތަކަކީ ސަމާސާ ނިންމެވުން ތަކެއް ނޫނެވެ.
2024 ވަނަ އަހަރު ކާމިޔާބު ކަމާއިއެކު އަޅުގަނޑުމެންނާއި ވަކިވެގެންދާއިރު ރައީސް ވަނީ 2025 ވަނަ އަހަރަކީ ދިވެހިންގެ ރަން ޒަމަނާކަށް ހައްދަވާނެ ކަމަށް ވައުދުވެ ވަޑައިގެންފަ އެވެ.
