މި އަހަރުގެ މިހާތަނަށް މަސްވެރިންނަށް 5،747،098 މިލިއަން ރުފިޔާ ޖަމާކޮށްފައިވާކަމަށް މިފްކޯއިން ބުނެފިއެވެ.
މިފްކޯ އިން ބުނީ، މިއަހަރުގެ އެއްވަނަ ދުވަހު މުޅި ޖުމުލަ 3،667،760 ރުފިޔާ މަސްވެރިންނަށް ޖަމާކޮށްފައިވާ ކަމަށެވެ. އެއީ 74 ދޯނިން ކިރާފައިވާ 311 މެޓްރިކް ޓަނުުގެ މަހަށްވާ ފައިސާއެވެ. އަދި މި އަހަރުގެ ދެވަނަ ދުވަހު މުޅި ޖުމުލަ 2،079،338 މިލިއަން ރުފިޔާ މަސްވެރިންނަށް ޖަމާކޮށްފައިވާއިރު މިއީ 46 މަސް ދޯނިން ކިރާފައިވާ 173.9 މެޓްރިކް ޓަނުގެ މަހެވެ.
އެގޮތުން 2023 ވަނަ އަހަރުގެ ނޮވެމަބްރު މަހުގެ 20 ވަނަ ދުވަހުން މި އަހަރުގެ ދެވަނަ ދުވަހުގެ ނިޔަލަށް މުޅި ޖުމުލަ މަސްވެރިންނަށް އެއް ބިލިއަނަށް ވުރެ ގިނަ ރުފިޔާ މިފްކޯ އިން ވަނީ ޖަމާކޮށްފައެވެ. އެއީ ޖުމުލަ 181 ދޯނިން ކިރާފައިވާ 57،521 ޓަނުގެ މަހަށްވާ ފައިސާއެވެ.
ސަރުކާރުން މަސްވެރިންނަށް ފައިސާތައް ދެމުންދާއިރު، މިދިޔަ މަހުގެ 10 އިން ފެށިގެން މަސްވެރިންނަށް ދަނީ ބާނާ މަހަށް، 48 ގަޑިއިރުގެ ތެރޭގައި ފައިސާ ދެމުންނެވެ. އެގޮތުން މިވަގުތު 48 ގަޑިއިރުގެ ތެރޭގައި ފައިސާ ޖަމާވަނީ ބޭންކް އޮފް މޯލްޑިވްސްގައި އެކައުންޓް ގެންގުޅޭ ފަރާތަކަށްކަމަށްވާއިރު އިސްލާމިކް ބޭންކް (އެމްއައިބީ)ގައި އެކައުންޓް ހުޅުވާފައި ހުރި މަސް ދޯނިތަކަށް 48 ގަޑިއިރު ތެރޭ ފައިސާ ދެވޭނެ އިންތިޒާމު ހަމަޖެއްސުމުގެ މަސައްކަތް ސަރުކާރުން ދަނީ ކުރަމުންނެވެ.
