ދުންފަތުގެ އިސްތިޢުމާލު ކުރުމަކީ ޞިއްޙަތަށް ގެއްލުން ހުރި ކަމެއްކަން އެންމެންނަށްވެސް އެނގޭ ޙަޤީޤަތެކެވެ. ނަމަވެސް، މިކަމުގެ ނުރައްކާތެރިކަން އެނގިހުރެވެސް، ގިނަ ބަޔަކު ދުންފަތުގެ އިސްތިޢުމާލުކޮށް އަދި މިކަމުގެ ތެރެއަށް ވަންނަމުންދާކަން ފާހަގަކުރެވެއެވެ. ފަހަކަށް އައިސް، ސަރުކާރުން ވަނީ މިކަމާ ދެކޮޅަށް ހަރުދަނާ ފިޔަވަޅުތަކެއް އަޅަން ފަށާފައެވެ.
އެގޮތުން މި ފަހަކުން، އެންމެ ފުރަތަމަ، ވޭޕް މަނާކުރުމުގެ ޤާނޫނެއް ވުޖޫދަށް ގެނެވުނެވެ. މިއީ ޒުވާނުންގެ މެދުގައި ވަރަށް މަޤްބޫލުވެފައިވާ ދުންފަތުގެ ބާވަތެއް ކަމަށްވާތީ، މިކަމުން ޒުވާނުން ސަލާމަތްކުރުމަށް އެޅުނު ފިޔަވަޅެކެވެ. އޭގެ ފަހުން، ސިނގިރޭޓުގެ އިމްޕޯޓް ޑިއުޓީ ބޮޑުކޮށް، އޭގެ އަގު އުފުލާލިއެވެ. މިގޮތުން، ސިނގިރޭޓުގެ އަގު ބޮޑުވުމާ ގުޅިގެން، ގިނަ ބަޔަކު ސިނގިރޭޓު ބޭނުންކުރުން މަދުކޮށްލާނެކަމަށް އުންމީދުކުރެވުނެވެ.
ނަމަވެސް، މި ދެ ފިޔަވަޅު އެޅުމާ ގުޅިގެން، ގިނަ ބަޔަކު ބިޑި އޮޅަން ފެށިއެވެ. ބިޑިއަކީ ސިނގިރޭޓަށްވުރެ އަގުހެޔޮ އަދި ފަސޭހައިން ލިބެންހުރި އެއްޗަކަށްވުމާއެކު، ގިނަ ބަޔަކު މިކަމަށް އަހުލުވެރިވާން ފެށިއެވެ. އެހެންނަމަވެސް، ބިޑި އޮޅަން ރަނގަޅަށް ދަސްނުވަނީސް، ސަރުކާރުން މިވަނީ ބިޑި އޮޅުމަށް ބޭނުންވާ ތަކެތި ރާއްޖެ އެތެރެކުރުންވެސް މަނާކޮށްފައެވެ.
މި ހުރިހާ ކަމެއްހެން ތަންފީޒުވެގެން މި ދިޔައީ ކުއްލިއަކަށް ކަހަލަ ގޮތަކަށެވެ. ދުންފަތުގެ އިސްތިޢުމާލު ކުރަމުން އައި މީހުން، މިކަމާ އަހުލުވެރިވާން ވަގުތު ނުލިބެނީސް، އެއް ބާވަތުން އަނެއް ބާވަތަށް ބަދަލުވާން މަޖުބޫރުވެ، އެންމެ ފަހުން ހުރިހާ ބާވަތެއްވެސް މަނާވެގެން ދިޔައެވެ. މިއީ ގިނަ ބަޔަކަށް ވަރަށް އުނދަގޫ ކަމަކަށް ވެދާނެއެވެ! މަނާ ނުވެ މިއޮތީ ސިނގިރޭޓު އެކަންޏެވެ! ބޮޑު އަގުދީފައިވެސް ދެން، ދުންފަތުގެ އިސްތިއުމާލު ކުރާން އެދޭނަމަ، އޮތީ ސިނގިރޭޓު ގަނެގެން ބޮއުމެވެ.
ދުންފަތުގެ އިސްތިޢުމާލު ކުރުން ހުއްޓުވުމަކީ މުހިންމު ކަމެއް ނަމަވެސް، މިކަން ކުރަންވާނީ ރައްޔިތުންނަށް އޭގެ ނުރައްކާތެރިކަން ރަނގަޅަށް އޮޅުންފިލުވައިދީ، ހޭލުންތެރިކަން އިތުރުކޮށްގެންކަމަށް ބައެއް އާއްމުން ގަބޫލުކުރެއެވެ. އަދި ކުއްލިއަކަށް ހުރިހާ ކަމެއް މަނާކުރުމުގެ ބަދަލުގައި، ދުރު ރާސްތާގެ ޕްލޭނެއް އެކުލަވާލައި، ފިޔަވަހިތަކަކަށް ބަހާލައިގެން މިކަން ކުރުމަކީ މާ ބުއްދިވެރި ގޮތް ކަމުގައި ދެކޭ ރައްޔިތުންވެސް މަދެއް ނޫނެވެ. އަދި މިފަދައިން މަނާކުރުމާއި، އަގުބޮޑުކުރުމުގެ ނަތީޖާއަކީ އެހެނިހެން ކުށްތައް ގިނަވުން ކަމުގައި ދެކޭ މީހުންނަކީވެސް ވަކި މަދު ބައެއް ނޫނެވެ.
ބެލެވޭގޮތުގައި މިއީ އެންމެ ފަހު ކަމަކަށް ސިނގިރޭޓް މަނާކުރުމުގެ ކުރީން، އެޅުމަށް ވިސްނާފައި ފިޔަވަޅުތަކުގެ ތެރެއިން ކުރެވިގެންދިޔަ މުހިއްމު ކަމަކަށްވުމަކީ ވެސް އެކަށީގެންވާ ކަމެކެވެ. އެއްފަހަރާ ހުރިހާ އެއްޗެއް މަނާ ކުރުމުގެ ބަދަލުގައި ފަހަރަކު އެއްޗެއް މަނާ ކުރަމުން ގޮސް، އާޚިރުގައި ދުންފަތުގެ އިސްތިޢުމާލު ކުރުން އެއްކޮށް ހުއްޓުވުމަށް ކުރެވެމުންދާ މުހިއްމު މަސައްކަތުގެ ތެރެއިން ކުރެވިގެންދިޔަ ކަމަކަށް ވެސް ވެދާނެ އެވެ. ދާދިފަހުން ދުންފަތުގެ އިސްތިޢުމާލު ކުރުން ހުއްޓުމަށް އެހީވެދޭ ކުލިނިކުތައް ރާއްޖޭގެ ކޮންމެ ރަށެއްގައިވެސް މި ވަނީ ގާއިމުކޮށްފައެވެ. އެހެންކަމުން މިއީ ތުރާލެއް އަދި ތަކުލީފެއް އަދި ވޭނެއް ކަމަށް ނުދެކި އެކަން ހުއްޓާލުމުގެ އަޒުމް ކޮންމެ ބޭފުޅަކުވެސް އިސްކުރަން ހިނގާށެވެ!
