ޕޯސްޓު މެދުވެރިކޮށް ރާއްޖެއަށް މަސްތުވާތަކެތި ހުރި ފޮށީގަނޑަކާ ހަވާލުވި މީހަކު 22 އަހަރަށް ޖަލަށްލާން ހުކުމްކޮށްފި އެވެ.
ކްރިމިނަލް ކޯޓުން އިއްޔެ އެ ހުކުމް އިއްވީ އައްޑޫ ހިތަދޫ، ޖިބްރޯލްޓާ، ޝަރުވާން ސަލީމްގެ މައްޗަށެވެ.
އޭނަ ޖަލަށްލާން ހުކުމްކުރީ ދައުލަތުން އުފުލި މަސްތުވާތަކެއްޗެއް ޓްރެފިކް ކުރުމުގެ ކުށުގެ ދައުވާ ސާބިތުވުމާ ގުޅިގެންނެވެ. އެ ދައުވާ ޝަރުވާން މައްޗަށް އުފުލީ، މާޗް 2، 2024 ގައި ފެޑެކްސް މެދުވެރިކޮށް ރާއްޖެ ގެނެސްފައިވާ ފޮށިގަނޑެއްގައި ރައްކޮށްފައިވާ އެއްޗަކާ މެދު ޝައްކުވެގެން ހިންގި ކޮންޓްރޯލް ޑެލިވަރީ އޮޕަރޭޝަނެއްގައި އޭނަ އެ ފޮށިގަނޑާ ހަވާލުވެފައިވާތީ އެވެ.
އެ ފޮށިގަނޑުން 989.1 ގްރާމުގެ މެފެޑްރޯން ފެނިފައިވެ އެވެ.
ޝަރުވާންގެ މައްޗަށް އުފުލި ދައުވާތަކަށް އިންކާރުކޮށް ކޯޓުގައި ބުނީ، މަސްތުވާތަކެތި ރާއްޖެއަށް އެތެރެކުރުމުގައި އަމަލީ ގޮތުން އެއްވެސް ސިފައެއްގައި ބައިވެރިވެފައި ނުވާނެ ކަމަށާއު މަސްތުވާތަކެތި ހުރި ކަމަށް ބުނާ ފޮށިގަނޑާއި ޕެކޭޖާއި ނުވަތަ އެ މަސްތުވާތަކެތި ގެނައުމުގެ އެއްވެސް މޯޓިވްއެއް ނެތް ކަމަށެވެ.
އޭނަގެ މައްޗަށް އުފުލި ދައުވާ ސާބިތުވެ 22 އަހަރާއި 2 މަހާއި 3 ދުވަހަށް ޖަލަށްލުމަށް ހުކުމްކޮށް، 10،000ރ. އިން ޖޫރިމަނާ ވެސް ކޮށް، އެ ފައިސާ 12 ދުވަހުގެ ތެރޭގައި މީރާއަށް ދައްކަން ހުކުމްކޮށްފައިވެ އެވެ.
