ސަރުކާރުގެ މަސް ކުންފުނި، މިފްކޯގެ ތެރޭގައި ޒަމާނުއްސުރެން ފެށިގެން ހިންގަމުންދާ ކޮރަޕްޝަންގެ އަމަލުތައް މި ސަރުކާރުން މުލުން ލުހެލާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ގއ. އަދި ގދ. އަތޮޅުގެ ރަށްތަކަށް ރައީސް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ނޫސްވެރިންނާ ބައްދަލު ކުރައްވައި، ރައީސް ވިދާޅުވީ މިފްކޯ ރިފޯމްކޮށް ހަރުދަނާ ކުރުމުގެ ގޮތުން ބޭކާރު ހަރަދުތައް މަދުކުރުމުގެ މަސައްކަތް މި ސަރުކާރުން ކުރަމުން އަންނަ ކަމަށެވެ.
”އެތަނުގެ އެތެރޭގައި ޒަމާންތަކެއް. ވަންދެން އެކިއެކި ގޯސްތައް ހިނގާ، އަޅުގަނޑު ގަބޫލުކުރަނީ ކޮރަޕްޝަންގެ އަމަލުތައް ގޮތަށް ފެންނަ ކަމެކޭ. އަޅުގަނޑުމެން ހުރިހާ ކަމެއް މުލުން ލުހެލާނަން،“ ގއ. ދެއްވަދޫގައި ހުންނަވައިގެން ރައީސް ވިދާޅުވި އެވެ.
ސަރުކާރުން މަސައްކަތް ކުރަމުން ދަނީ އެ އަޒުމުގައި ކަމަށާއި އެ ކުންފުންޏަށް ބޭރުގެ ސީއީއޯއެއް އައްޔަން ކުރެއްވީ ވެސް އެެހެންވެ، ކަމަށް ރައީސް ވިދާޅުވި އެވެ.
މިދިޔަ ޑިސެމްބަރު މަހުގެ ކުރީކޮޅު އެ ކުންފުންޏަށް އައްޔަން ކުރީ ސްވިޓްޒަލެންޑުގެ ރައްޔިތެއް ކަމަށްވާ ޑރ. ވިޓާލީ ލުބިމޯވް އެވެ. އެއީ ސްޓްރެޓީޖިކް ކްރައިސިސް މެނޭޖްމެންޓުގެ ދާއިރާގެ ސްޕެޝަލިސްޓެއްގެ ގޮތުގައި 20 އަހަރު މަސައްކަތް ކުރައްވާފައިވާ ބޭފުޅެކެވެ.
ރައީސް ވިދާޅުވި ގޮތުގައި ސަރުކާރުގެ މަސް ކުންފުންޏަށް ފުރަތަމަ ފަހަރަށް ބޭރުގެ ބޭފުޅަކު އައްޔަން ކުރެއްވީ ވެސް ކޮރަޕްޝަނާ ދެކޮޅަށް ކުރައްވާ މަސައްކަތުގެ ތެރެއިންނެވެ.
”އެ އަޒުމުގައި މަސައްކަތްތައް ކުރަން ފެށީ. ބޭރު މީހަކު އެހެރީ [މިފްކޯގެ ސީއީއޯ] އެ ކަމުގައި. އަޅުގަނޑުމެން ދެންނެވި ގޮތަށް މި ސަރަހައްދު ނޫނީ އަޅުގަނޑުމެންގެ އާންމުކޮށް މި ކަންކަމުގެ ތެރޭގައި ނޫޅޭ ހިސާބަކުން ރަނގަޅު ބޭފުޅަކު ގެނެސް ހަވާލުކޮށްފައި،“ ރައީސް ވިދާޅުވި އެވެ.
އެމަނިކުފާނު ވިދާޅުވީ ސަރުކާރުން މަސައްކަތް ކުރަނީ މަސްވެރިން ބޭނުންވާ ގޮތަށް މިފްކޯ ހަރުދަނާ ކުރުމަށް ކަމަށެވެ.
އެ މަސައްކަތްކުރުމަށް މިހާރު ކޯލްޑް ސްޓޯރޭޖް އިތުރުކުރުން ފަދަ ކަންކަން ދަނީ ކުރަމުންނެވެ.
ރައީސް ވިދާޅުވީ މި ސަރުކާރުން މަސްވެރިން ބޭނުންވާ ކަންކަން އެންމެ ފުރިހަމައަށް ކޮށްދެއްވާނެ ކަމަށެވެ.
އެ ދަތުރުފުޅުގެ ތެރެއިން ރައީސް ވަނީ ގދ. ފިޔޯރީގައި މަސް ބަންދު ކުރާ ބޮޑު ކާރުހާނާއެއް ހެދުމުގެ އެއްބަސްވުމެއްގައި އަންނަ މަހު ސޮއި ކުރާނެކަން ވެސް އިއުލާން ކުރައްވައިފަ އެވެ.
ރައީސް ކުރިން ވިދާޅުވި ގޮތުގައި މިދިޔަ މަހުގެ 10 ވަނަ ދުވަހުން ފެށިގެން މަސްވެރިން ކިތަންމެ ގިނައިން މަސް ކިރުވިޔަސް، އޭގެ ފައިސާ 48 ގަޑިއިރުގެ ތެރޭގައި ދަނީ ދޫކުރަމުންނެވެ.
