އެމެެރިކާގެ ލޮސްއެންޖަލެސްގެ ވަށައިގެން މިހާރު ރޯވެ އަނދަމުންދަނީއެވެ. މިއީ ފަހުގެ ތާރީޚުގައި ކެލިފޯނިޔާގައި ފެނިފައިނުވާ ކަހަލަ ބޮޑުވެގެންވާ ބިރުވެރި އަލިފާނެކެވެ. އެމެރިކާގެ ޖުމްލަ ފަންސާސް ސްޓޭޓްގެ ތެރެއިން ކެލިފޯނިޔާއަކީ އެންމެ މުއްސަނދި އެންމެ ބައިބޯ ސްޓޭޓެވެ. ލޮސްއެންޖަލެސްއަކީ ކެލިފޯނިޔާ ސްޓޭޓްގެ އެންމެ ބޮޑު ސިޓީއެވެ. ބޮޑުތަނުން އެންމެ ބައިބޯ މުއްސަނދި ސިޓީއެވެ. މުޅި އެމެރިކާއަށް ނިސްބަތްކުރާއިރުވެސް ލޮސްއެންޖަލެސްއަކީ ގައުމުގެ ދެވަނައަށް އެންމެ ބޮޑު ސިޓީއެވެ. ނިއުޔޯކަށް ފަހުގައެވެ. ކޮންމެއަކަސް ލޮސްއެންޖަލެސް މިހާރު އެއޮތީ އަލިފާނުގެ ތެރޭގައެވެ. ލޮސްއެންޖަލެސްގެ ވަށައިގެންނާއި އަދި އެސަހަރުގެ ރަށްބޭރުގެ ބައެއް ޑިސްޓްރިކްޓްތައް ހިމެނޭހެން ވަރަށް ބޮޑު އޭރިޔާއެއް ވަނީ އަނދައިގެން ގޮސްފައެވެ. އަދިވެސް އަނދަނީއެވެ. އެމެރިކާގެ ނަންމަޝްހޫރު ވަރަށް ގިނަ ފަންނާނުންނާއި މަހުޖަނުން ދިރިއުޅޭ ސަހަރަކީ ލޮސްއެންޖަލެސްއެވެ.
ކުރިން ދެންނެވި ކަހަލަ ވަރަށް ގިނަ ފަންނާނުންގެ ގެދޮރާއި މުދައު ވަނީ މި އަލިފާނުގެ ތެރޭގައި އަނދައި އަޅިއަށްވެގެން ގޮސްފައެވެ. އެމެރިކާގެ ފިލްމް އިންޑަސްޓްރީގެ މަރުކަޒު ކަމަށްވާ ހޮލީވުޑަކީ ލޮސްއެންޖަލެސްގެ އެއްބައެވެ. ހޮލީވުޑް އެއޮތީ އަލިފާނުގެ ތެރޭގައެވެ. އެންމެ އަލިފާންގަޑެއް ދެ އަލިފާންގަޑެއް ނޫނެވެ. ދޮޅަސްސޯޅަ އަލިފާންގަޑެވެ. އަދިވެސް އިތުރުވަނީއެވެ. ފެތުރެނީއެވެ. ނިއްވައިލެވޭނެ އިރެއް، ނިވޭނެ އިރެއް ނޭނގެއެވެ. ލިބުނު ގެއްލުމުގެ މިންވަރެއް އަދި އިތުރަށް ލިބޭނޭ ގެއްލުމުގެ މިންވަރެއް ލަފާކުރަންވެސް ނޭގެއެވެ. ދައްޗެވެ. އެނގި ޔަގީންވަނީ މިއީ ފަހުގެ ތާރީޚުގައި އެމެރިކާގެ ރައްޔިތުން ތަޖުރިބާކޮށްފައިނުވާ ކަހަލަ ބިރުވެރި ނުރައްކާތެރި އަލިފާނެއް ކަމެވެ. ޝައްކެއްވެސް ނެތެވެ. ދުނިޔޭގެ އެންމެ މުއްސަނދި ގައުމަކީ އެމެރިކާއެވެ. އާރާއިބާރު އެންމެ ބޮޑު ގައުމަކީ އެމެރިކާއެވެ. ވަސީލަތްތައް އެންމެ ގިނަ ގައުމަކީ އެމެރިކާއެވެ. އެކަމަކު މި އަލިފާނުގެ ކުރިމަތީގައި އެމެރިކާގެ ހަމައެއްވެސް އާރެއް ބާރެއް ނެތެވެ.
އަލިފާން ކޮންޓްރޯލްކުރުމުގައި ހޯދުނު އެއްވެސް ކުރިއެރުމެއް ނެތެވެ. މުޅި އެމެރިކާގެ ގާތްގަޑަކަށް ހުރިހާ ވަސީލަތެއް މިކަމަށް ޚާއްސަކުރި ކަމަށްވިޔަސްމެއެވެ. އެންމެފަހުން އެމެރިކާގެ ތަޖުރިބާކާރުންވެސް ބުނަން ފަށައިފިއެވެ. މިއީ އިންސާނުންގެ އެއްވެސް ބާރަކުން ހުއްޓުވޭނެ އަލިފާނެއް ނޫނެވެ. މި އަލިފާން ހުއްޓޭނީ އޭގެ ޒާތުގައި އަމިއްލައަށެވެ. ނޫނީ އެއަށް ބާރުލިބޭ ކަންކަމަށް ހުއްޓުމެއް އައިސްގެންނެވެ. އަލިފާނެއް އޭގެޒާތުގައި ހުއްޓޭނީ ހުޅުހިފާ ހުރިހައި އެއްޗެއް އަނދައި ހުލިވެ އަޅިއަށް ވެގެންނެވެ. އަލިފާނަށް ބާރުދެނީ މޫސުމެވެ. ވަޔެވެ. މިފަހަރު ލޮސްއެންޖަލިސްގެ ވަށައިގެން ފެތުރެމުން ފުޅާވަމުންދާ އަލިފާނަށް އެންމެ ބޮޑަށް ވާގިލިބެނީ ޖެހެމުންދާ ބާރު ވައިންނެވެ. މިދުވަސްވަރަކީ ކެލިފޯނިޔާއަށް އާދަޔާ ޚިލާފު ބާރުމިނުގައި ވައިޖެހެމުންދާ ދުވަސްވަރެކެވެ. އާއްމު ގޮތެއްގައި ކެލިފޯނިޔާއަށް އެންމެ ހޫނު ދުވަސްވަރަކީ ޖޫންމަހާއި ޖުލައިމަހެވެ. އެއީ ހޫނު މޫސުމުގެ ދުވަސްތަކެވެ.
ހޫނުގަދަވުމާއި ހަނަފަސްކަމުގެ އަސަރު އެންމެ ބޮޑުވަނީ އެދުވަސްވަރުއެވެ. ޖަންގަލިތަކުގައި ރޯވުމުގެ ހާދިސާތައް ހިނގަނީވެސް އެދުވަސްވަރުއެވެ. އެކަމަކު މިއީ ހޫނު މޫސުމެއް ނޫނެވެ. މިއީ ފިނި މޫސުމެވެ. މިއީ ޖެނުއަރީ މަހެވެ. އެހެންވީމާ މިފަހަރު މިއޮތީ އާއްމުކޮށް ކަންހިނގާ ތަރުތީބު އެކޮޅުކޮޅުން ޖެހިފައެވެ. އެގޮތަށް އެކޮޅުކޮޅުން ޖެހުނަސް މިއަލިފާނުގެ ސިއްރަކީ ހަނަފަސްކަމެވެ. ދެން ޖެހެމުންދާ ގަދަވަޔެވެ. މިހާތަނަށް އެނގިފައިވާ ގޮތުން ލޮސްއެންޖަލެސްގެ ވަށައިގެންވާ އޭރިއާތަކުގެ ތެރެއިން އެންމެ ބޮޑަށް އަނދާފައިވަނީ ފަސް އޭރިޔާއެކެވެ. އޭގެތެރެއިން ޕެސިފިކްގެ އައްސޭރީގައިވާ ޕެލިސާޑެސްގެ ބައިލައްކަ އޭކަރު ވަނީ އަނދައިފައެވެ. އީޓަންގައި ތެއްތިރީސްހާސް އޭކަރު ވަނީ އަނދައިފައެވެ. ކަންޒުކޮނެގެން ނުވަތަ ގަސްތައް ކޮށައި ވިނަ ނޮޅައިގެން އިތުރު ހިސާބުތަކަށް އަލިފާންގަޑު ފެތުރުނަ ނުދިނުމަށް ކުރިހައި މަސައްކަތެއް ވަނީ ބޭކާރުވެފައެވެ.
އެމެރިކާގެ ރައީސް ޖޯ ބައިޑެން އާއި ނާއިބުރައީސް ކަމަލާ ހެރިސްވަނީ ހުރިހާ ކަމެއް ހުއްޓަވައިލައްވައި ހަމައެކަނި އަލިފާން ކޮންޓްރޯލް ކުރުމާގުޅޭ އޮޕަރޭޝަނަށް ހުސްވެވަޑައިގެންފައެވެ. ކެލިފޯނިޔާ ސްޓޭޓްގެ ގަވަރުނަރުވެސް ހުންނެވީ ހަމައެގޮތަށެވެ. މި އޮޕަރޭޝަނުގައި ވަރަށް ގިނަ ސްޓޭޓްތަކުގެ ފަޔަރ ފައިޓަރުންނާއި ސާމާނުވެސް ދަނީ ބޭނުން ކުރަމުންނެވެ. ތަޖުރިބާކާރުން ގަބޫލުކުރާ ގޮތުގައި މޫސުމާއި ވަޔަށް އަންނަ ބަދަލުތަކާއެކު މިފެށުނު ހަފުތާގެ ތެރޭގައި އަލިފާނަށް ހީނަރުކަން އަންނާނެއެވެ. ކޮންޓްރޯލްކުރަން ފަސޭހަވާނެއެވެ. އެހިސާބަށްދާއިރު ނޭނގެނީ ދެން ލިބޭނޭ ގެއްލުމުގެ މިންވަރެވެ. މަރުވި މީހުންގެ އަދަދު މާމަތި ނުވިޔަސް އެމެރިކާ ކަހަލަ ގައުމަކަށް ބަލާއިރު ވަރަށް މައްޗެވެ. މިހާތަނަށް ދިހަބާރަ މީހަކު މަރުވެފައިވާކަން ވަނީ ކަށަވަރުވެފައެވެ. އަލިފާންގަޑު ކޮންޓްރޯލްވާއިރު އެތައް ލައްކަ އޭކަރުގެ ސަރަހައްދެއް ސާފުކުރުންވެސް ވާނީ ވަރަށް ޚަރަދުބޮޑު ކަމަކަށެވެ. ވަރަށް ބޮޑު ގޮންޖެހުމަކަށެވެ.
އަނދައިގެން ގޮސްފައިވާ ގޭގޭގައި ގިނައިންހުރީ ޕްލާސްޓިކާއި އިލެކްޓޯނިކް ސާމާނެވެ. އެއީ ސިއްހަތަށް ނުރައްކާ ވިހަވިހައެވެ. އެހެންވީމާ ސާފުކުރުމުގެ އޮޕަރޭޝަނުގެ ޚަރަދު އެކަނިވެސް ބިލިޔަނުން މައްޗަށް ދިއުން އެކަށީގެންވެއެވެ. ދެންއޮތީ އިންޝޫރެންސްގެ މައްސަލައެވެ. އަނދައިގެން ގޮސްފައިވާ ގެދޮރާއި މުދަލުގެ އިންޝޫރެންސް އަދާކުރާނެ ގޮތެއް ނުވެސް އޮންނާނެއެވެ. އަލުން އިމާރާތްކުރުމުގެ ޚަރަދުވެސް ހިތަށް ގެނެވޭވަރަށްވުރެ ބޮޑުވާނެއެވެ. އެހެންވީމާ މިއަލިފާނަކީ އެމެރިކާގެ ފަހުގެ ތާރީޚުގައި އިގްތިސާދީ ގޮތުންވެސް އެގައުމަށް ކުރިމަތިވި އެންމެ ވޭންދެނިވި ކާރިސާކަމަށް ވާނެއެވެ. މިކާރިސާގެ ގެއްލުމުން އަރައިގަނެ ލޮސްއެންޖަލެސް އަލުން އާރާސްތު ކުރުމުގެ ޒިންމާ އެޅޭނީ އައު ރައީސް ޑޮނަލްޑް ޓްރަމްޕުގެ ކޮނޑުފުޅުގައެވެ. އޭނާ ރައީސްކަމުގެ ހުވާކުރައްވާނީ މިމަހު ވިހިވަނަ ދުވަހުއެވެ. އައުސަރުކާރުގެ އެންމެ ފުރަތަމަ މަސައްކަތަކަށްވާނީ މި މަސައްކަތެވެ.
