ރާއްޖެއިން ބަލަނީ އާބާދީ މަދުކުރެވޭތޯއެވެ. ދޭތެރެ ދުރުކުރެވޭ ތޯއެވެ. ދޭތެރެ ދުރުކޮށް، އާބާދީ ކޮންޓުރޯލް ކުރުމަށް މުސްލިމުން ލައްވާ ހުޅަނގުގެ ޤައުމުތަކުން ކުރި ފިކުރީ ހަނގުރާމަ ތަކުގެ ތެރޭގައި އެ ޤައުމުތަކުން ދިޔައީ ބޯކޮށް ދަރިން ވިހަމުންނެވެ. މުސްލިމު ޤައުމުތަކަށް ނަސޭޙްތަ ދިނީ އާބާދީ މަދުކުރުމަށެވެ. އެގޮތުން ޒާތްޒާތުގެ ތަކެއްޗާއި ބޭސް މުސްލިމު ޤައުމުތަކަށް ހިލޭ ސާބަހަށް WHO ލައްވައި ބެހިއެވެ.
ދޭތެރެ ދުރުކުރުމަށް ބޭސް ބޭނުންކުރުން ރަނގަޅެއް ނޫން ކަމަށް ބުނާ ޕްރޮފެސަރުން އުޅޭ.
ކޮންމެޔަކަސް، މިއަދު ރާއްޖޭގެ ގިނަ އަންހެން ކުދިންވެސް އަދި ފިރިހެން ކުދިން ވެސް އެހާ އަވަހަކަށް ކައިވެންޏަކަށް ދާކަށް ބޭނުމެއް ނުވެއެވެ. ބޭނުންވަނީ އިތުރަށް ކިޔަވާފަ، ދެން މީހަކާއި އިނުމަށެވެ. ބްރޭކިންގ އެމްވީއިން މިކަމަށް ވަކި ޚާއްޞަ ދިރާސާއެއް ނުކުރަމެވެ. ނަމަވެސް ސަރުކާރުގެ ކަމާއި ގުޅުން ހުރި ދާއިރާތަކުގެ މަތީ ފަންތީގެ އެކި ބޭފުޅުންނާއި ވާހަކަދެއްކުމުން އެނގުނީ، ކިތަންމެ މޮޅަށް ކިޔަވައިގެން ހުއްޓަސް ވަރިވާ މިންވަރަށް ހައްލެއް ނާންނަކަމެވެ. ނަމަވެސް، ޑިގްރީ ނަހަދައި ނުވަތަ ޅައުމުރުގައި ކައިވެނި ކުރި މީހުންނާއި، އޮފީސްއޮފީހަށް ވަޒީފާއަށް ގޮސް ޢާމްދަނީ ބޮޑުކޮށް ލިބޭ މީހުންނާއި، ރަށުގައި ގުރޭޑް 10 ނިމޭތަނުން މާލެ އައިސް، އިތުރަށް ކިޔަވައި 18 އަހަރު ފުރުމާއެކު ކައިވެނީގެ ގޮށް ޖަހާ މީހުންގެ މެދުގައި ބޮޑު ފަރަގެއް ހުންނަކަމެވެ.
ކުރުކޮށް ދަްނަވާނަމަ 18 އަހަރު ފުރުމާއެކު ކައިވެނިކުރާ މީހުންގެ ދިރިއުޅުން، ކިޔަވައި މަތީ ފާސް ނަގައި ނިމެންދެން މީހަކާ ނީނދެ ރައްޓެހިވެގެން އުޅުމަށްފަހު އެތައް އަހަރެއް ކޮށްފައި ދެން ލައިފެއް ފަށާ މީހުންނާއި އަޅައިކިޔާއިރު މާ އުޖާލާއެވެ.
ކޮންމެޔަކަސް، މިހާރު އުޅޭ ގިނަ ދިވެހިން ބޭނުންވަނީ “ޢާއިލާ ރާވާށެވެ”. މި ރޭވުމަކީ ބޮޑު ރޭވުމެކެވެ. މި ރޭވުމުގެ ތެރޭގައި މަދުން ދަރިން ހޯދުން އެއީ އެންމެ ބޮޑު ރޭވުމެވެ.
އަދުގެ ޙާލަތަކީ ޢާއިލާ ”ރޭވުމުގެ ސަބަބުން” ބައެއް ޤައުމުތަކަށް އެއީ ގެއްލުމަކަށް ވެއްޖެއެވެ.
އެމެރިކާގެ ނޫސް އެޖެންސީ އޭޕީ ގައި އޮތް އާޓިކަލެއް ރޭ ކިޔާލީމެވެ. އޭގައި ބުނާ ގޮތުގައި އާބާދީގެ ނިސްބަތަށް ބަދަލު އައުމުގެ ސަބަބުން ޗައިނާ ސަރުކާރަށް ގިނަ ގޮންޖެހުންތަކެއް ކުރިމަތިވެދާނެ ކަމަށް ހުކުރު ދުވަހު ބުނެފައިވެ އެވެ.
ޗައިނާ ސަރުކާރުން ދަރިން ގިނައިން ވިހާނަމަ އެ ޢާއިލާތަކަށް އިތުރަށް އިނާޔަތާއި ފައިސާ ދެއެވެ.
ޗައިނާގައި އެއްފަރާތުން މެދު އުމުރުގެ މީހުންގެ އާބާދީ އިތުރުވަމުން އަންނައިރު އަނެއްކޮޅުން އުފެއްދުންތެރިކަމުގެ އާބާދީ އެއޮށް ދަނީ ހައްތަހާ ދަށަށެވެ.
މިދިޔަ އަހަރު ނިމުނުއިރު ޗައިނާގެ އާބާދީ 1.4 ބިލިއަނަށް ވުރެ މައްޗަށް އަރާފައިވާއިރު، މިއީ 2023 ވަނަ އަހަރާ އަޅާބަލާއިރު 1.39 މިލިއަން މަދު އަދަދެއް ކަމަށް ވެސް އެ ލިޔުމުގައި އޮތެވެ.
މީގެ ތިން އަހަރު ކުރިން ޗައިނާ، ޖަޕާން އަދި އިރުމަތީ ޔޫރަޕް ވަނީ އާބާދީ ދަށްވަމުން އަންނަ ގައުމުތަކުގެ ލިސްޓުގައި ހިމެނިފަ އެވެ.
މިއަދު ޗައިނާ ސަރުކާރުން އެންމެ ކަންބޮޑުވެ ހާސްވަނީ އާބާދީ އިތުރުވާ ރޭޓް ދަށަށް ދާތީއެވެ.
ޗައިނާއަކީ ޒަމާނުއްސުރެ އާބާދީގެ ގޮތުން ދުނިޔޭގެ އެންމެ ބޮޑު ގައުމެވެ.
ދަންނަވަންތޯއެވެ؟ ޗައިނާ އަކީ ވެސް އާބާދީ “ރޭވި” ޤައުމެކެވެ. ނަތީޖާއަކީ މިއަދު އެޤައުމުގެ އާބާދީގެ ފަސްބައިކުޅަ އެއްބައި މީހުންނަކީ އުމުރުން 60 އަހަރުން މަތީގެ މީހުންނެވެ. އެއީ އެ ޤައުމުގެ އާބާދީގެ 22 ޕަސެންޓް މީހުންނެވެ. 2035 ވަނަ އަހަރުގެ ނިޔަލަށް މި ރޭޓް 35 ޕަސެންޓަށް އިތުރުވާނެ ކަމަށް ބެލެވެއެވެ.
އެހެންކަމަށްވާނަމަ ވަކި ހިސާބަކުން ޤައުމުގައި ޒުވާން ޖީލެއް ނޯންނާނެއެވެ. މަސައްކަތްކުރާނެ ބަޔަކު ނުތިބޭނެއެވެ. މި ސަބަބާހުރެ ދަރިން ހޯދުން އިތުރުކުރަން އެބަ ޖެހެއެވެ. ދަރިންނަކީ ރިޒުޤެވެ.
