ވަޒީރު އިހްސާން: ވަގު ބޮންދުންނާއި ބިދޭސީންގެ މައްސަލަ ހައްލު ކުރެއްވި ފަހްލަވާން!
ދެންމެ | 25 ޖެނުއަރީ 2025

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ކެބިނެޓުގައި މިވަގުތު ހުންނެވި އެންމެ ހިންގުންތެރި އަދި އެންމެ ބޮޑެތި ގޮންޖެހުންތަކުން ކާމިޔާބީތައް ހާސިލްކުރައްވަމުން ގެންދަވާ މިނިސްޓަރަކީ ހޯމްލޭންޑް ސެކިއުރިޓީ މިނިސްޓަރ ޢަލީ އިހްސާންއެވެ. ސިޔާސީ އިދިކޮޅު ފަރާތްތަކުގެ ހުއްޓުމެއް ނެތް އެމަނިކުފާނަށް ހަމަލާތައް އަމާޒުވެފައި ވަނީ ވެސް މިދެންނެވި ހަގީގަތްތަކާހުރެ، އެމަނިކުފާނުގެ ވިދުން ފަނޑުކޮށްލުމަށްޓަކައެވެ. އަޒުމްފުޅު ބަލިކަށި ކޮށްލުމަށްޓަކައެވެ. އެހެންނަމަވެސް މިނިސްޓަރު އިހްސާންގެ ސާބިތުކަމާއި ކެރިވަޑައިގަތުން މާބޮޑަށް ފާހަގަކޮށްލެވެއެވެ.

މިނިސްޓަރ އިހްސާނަކީ ވަރަށް ކެރޭ އަދި މަތިކުރެވިފައިވާ ޒިންމާތައް ތަންފީޒުކުރެއްވުމުގައި ފުކެއްވެސް ފަހަތަށް ޖެހިވަޑައިނުގެން ކުރިއަށް ވަޑައިގަންނަވަމުން ގެންދަވާ ސާބިތު ބޭފުޅެކެވެ. އެމަނިކުފާނު ކޮންމެ ކަމެއްވެސް ކުރައްވަނީ އެކުރެއްވެނީ ކޮންކަމެއްކަން ވަރަށް ރަނގަޅަށް އެނގިވަޑައިގެން ހުންނަވައެވެ. އަދި އެކަމެއް ހާސިލްކުރެއްވުމަށް ހިންގަވާނެ ރާސްތާއާއި ކުރިމަތިލައްވަން ޖެހިވަޑައިގަންނަވާނެ ގޮން ޖެހުންތަކާއި އެކަންކަން ހައްލުކުރާނެ ގޮތާއި ކޮންމެ ކަމެއްގެވެސް އެންމެ ފަހުގެ ނަތީޖާ ރަނގަޅަށް ސާފުކޮށް އެނގޭ މިންވަރަށް ޕްލޭން ކުރައްވައިގެންނެވެ.

އެމަނިކުފާނުގެ މަސައްކަތްތަކުގެ ޑައިރީގައި ކާމިޔާބު އެތައް ވާހަކައެއް އެބަވެއެވެ؛ ބިދޭސީ މަސައްކަތު މީހުންގެ މައްސަލައިން ފަށަމާ ހެއްޔެވެ؟

ޤަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށްޓަކައި، ދިވެހިރާއްޖޭގައި މިވަގުތު ތިބި ބިދޭސީންގެ އަދަދު ދެނެގަތުމަށްޓަކައި އެމީހުންގެ 10 އިނގިލީގެ ނިޝާނާއި ފޭޝަލް ރިކޮގްނިޝަނަށް ބޭނުންވާ ފޮޓޯ ހިމެނޭހެން ބައޯމެޓްރިކްސް ނެގުމަށް އޮޕަރޭޝަން ”ކުރަނގި“ ދެ ރަށެއް ފިޔަވައި ރާއްޖޭގެ ހުރިހާ ރަށެއްގައި ފަށައި، 51 ރަށެއްގައި ދިރިއުޅޭ ހުރިހާ ބިދޭސީންގެ މަޢުލޫމާތު ވަނީ އެއްކޮށްފައެވެ. އެ އޮޕަރޭޝަންގެ ދަށުން މިހާރު 21،000އަށްވުރެ ގިނަ ބިދޭސީންގެ މަޢުލޫމާތު އެއްކޮށްފިއެވެ.

ބިދޭސީންގެ މަޢުލޫމާތު ފޯނު އެޕްލިކޭޝަނެއް މެދުވެރިކޮށް ވެރިފައިކުރެވޭނެ ފޭޝަލް ރިކޮގްނިޝަން ސޮފްޓްވެއަރއެއް ތައްޔާރުކޮށް ބޭނުންކުރަން ފަށައިފިއެވެ. މިއީ ޤާނޫނު ތަންފީޒުކުރާ އިދާރާތަކަށާއި ކައުންސިލްތަކަށް ވެސް ފަސޭހަކަމާއެކު ބިދޭސީންގެ މަޢުލޫމާތު ދެނެގަނެވޭނެ ނިޒާމެކެވެ. ބިދޭސީ މީހާގެ ފޮޓޯއެއް ނަގައި ސޮފްޓްވެއާއަށް އަޕްލޯޑްކޮށްލުމުން އޭނާއާ ބެހޭ މަޢުލޫމާތު ވަގުތުން ބަލާލެވޭނެއެވެ. އޭނާ ރާއްޖޭގައި އުޅެނީ ޤަވާއިދާ އެއްގޮތަށްތޯވެސް އެ އެޕްލިކޭޝަނުން ބުނެދޭނެއެވެ.

ބިދޭސީންގެ މައްސަލާގައި އެމަނިކުފާނަށް ތަފާތު ގޮންޖެހުންތައް ކުރިމަތިވަމުން ދިޔަ ނަމަވެސް އެމަނިކުފާނު ހުންނެވީ ދޫދެއްވާ ގޮތަކަށް ނޫނެވެ. ނާޖާއިޒު ފައިދާއަށް ވަނީ ބޮޑުކޮށް ނޫނެކޭ ވިދާޅުވެފައެވެ. އުސޫލުތަކާއި ޤާނޫނާއި ޤަވާއިދާ ޚިލާފުވުން އެމަނިކުފާނު އެއްވެސް ހާލެއްގައި ބަލައެއް ނުގަނެއެވެ. ގަވާއިދާ ޚިލާފު މަސައްކަތެއް ކުރުމަކަށް އެމަނިކުފާނުގެ އާނބަހާއި ރުހުމެއް އެއްވެސް މުވައްޒަފަކަށް ނުދެއްވާނެއެވެ. ސާބިތުކަމުގެ ނަމޫނާ ވެރިއެކެވެ.

ނޮވެމްބަރު 17، 2023 އިން 31 ޑިސެމްބަރު 2024ގެ ނިޔަލަށް ޤަވާއިދާ ޚިލާފަށް އުޅޭ 5613 ބިދޭސީން ވަނީ ފުރުވާލާފައެވެ. އެއީ 2023 ވަނަ އަހަރު ފުރުވާލެވުނު އަދަދާ އަޅާބަލާއިރު 177 ޕަސެންޓްގެ އިތުރުވުމެކެވެ.

ދިވެހިރާއްޖޭގައި ވަޒީފާއަދާކުރާ ބިދޭސީންނާ ގުޅިގެން ދޫކުރާ ހުއްދަތަކަށް ދައްކަން ޖެހޭ ފީތަކާއި ޖޫރުމަނާގެ ފައިސާގެ ހޯދުމުގެ މަސައްކަތް މިނިސްޓަރ އިހްސާންގެ ޚާއްސަ ބެއްލެވުމުގެ ދަށުން ވަނީ ފައްޓަވާފައެވެ. އެގޮތުން 17 ނޮބެމްބަރ 2023ގެ ނިޔަލަށް ދައުލަތަށް ދައްކަން ޖެހޭ ފައިސާގެ އަދަދަކީ 1،765،704،400 ރުފިޔާއެވެ. އެހެންނަމަވެސް، މިފައިސާ ހޯދުމަށް އެޅި ހަރުދަނާ ފިޔަވަޅުތަކާއެކު މިހާރު މިއަދަދު ވަނީ 899،152،482 ރުފިޔާއަށް ދަށްކުރެވިފައެވެ.

 

މިދާއިރާއިން އިތުރަށް ފާހަގަކޮށްލެވޭ ކަންކަން ހުލާސާކޮށް ލިސްޓްކޮށްލަމެވެ.

1. ޤަވާއިދާ ޚިލާފަށް އުޅޭ ބިދޭސީންގެ މައްސަލަތައް ރިޕޯޓްކުރުމަށް އިމިގްރޭޝަން ވޮޗް ތަޢާރަފްކުރެއްވިއެވެ. މިހާތަނަށް އިމިގްރޭޝަން ވޮޗަށް 1161 މައްސަލަ ވަނީ ހުށަހަޅާފައެވެ.

2. ރާއްޖޭގައި ދިރިއުޅޭ ބިދޭސީން މެޑިކަލް ހެއްދުމުގެ އުސޫލް އިސްލާހު ކުރެއްވިއެވެ. ބިދޭސީ މަސައްކަތު މީހުން ރާއްޖެއައިސް މެޑިކަލް ހެދުމަށް ކުރިން ލިބޭ 30 ދުވަހުގެ މުއްދަތު މިނިސްޓަރު އިހްސާންގެ އިސް ނެންގެވުމުގެ ދަށުން ވަނީ 15 ދުވަހަށް ކުރުކޮށްފައެވެ.

3. ޖެނުއަރީ 2024،04 ވަނަ ތާރީޚުން ފެށިގެން ވަރކްޕާމިޓް ދޫކިރެވޭނީ ނުވަތަ ޕާމިޓް ފީ ދެއްކޭނީ ވާރކް ޕާމިޓް މެޑިކަލް އެކްސްޕެޓް ސިސްޓަމް މެދުވެރިކޮށް ހުށަހަޅައިގެން ކަމަށް ވަނީ ހަމަޖައްސާފައެވެ.

4. ރާއްޖޭގައި ޤަވާއިދާ ޚިލާފަށް ބިދޭސީ މަސައްކަތްތެރިން ގެންގުޅޭ ފަރާތްތަކާމެދު ހަރުކަށި ފިޔަވަޅު އެޅުމަށްޓަކައި ވަޒީފާއާ ބެހޭ ޤާނޫނަށް ވަނީ އިސްލާހު ގެނެސްފައެވެ.

ގުޅުންހުރި ލިޔުންތައް

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!