ތެދުވެރިކަމަކީ، މީހާގެ ހަރުދަނާކަމުގެ ނިޝާން!
ދެންމެ | 26 ޖެނުއަރީ 2025

އިންސާނާގައި ހުންނަ ސިފަތަކުގެ ތެރެއިން އެމީހަކީ މާތް އަޚްލާޤެއްގެ ވެރިޔަކުކަން އަންގައިދޭ އެންމެ ފުރިހަމަ އެއް ސިފައަކީ، ތެދުބުނުމެވެ. ބަސްބުނުމުގައު ހަރުދަނާ މީހަކުނަމަ، އެހެން މީހުން އެމީހަކަށް އިހުތިރާމް ކުރާނެ އެވެ. އެމީހަކީ ނަސަބުގެގޮތުން ނުވަތަ މަގާމުގެގޮތުން ނުވަތަ ތަނަވަސްކަމުގެ ގޮތުން ކިތަންމެ އަރާހުރި މީހަކު ކަމުގައިވިޔަސް، އެމީހަކަށް މީހުންކުރާ ޤަދަރު ޙަޤީޤަތުގައި ބިނާވެފައި އޮންނަ އެންމެ މުހިއްމު ކަމަކީ، އެމީހެއްގެ ތެދުވެރިކަމެވެ.

މާތްވެގެންވާ އިސްލާމްދީނުގައި ތެދު ބުނުމަށާއި، ވަޢުދު ފުއްދުމަށާއި ހުރިހާ ކަމެއްގައިވެސް ޙަޤީޤަތާ އެއްގޮތަށް ވާހަކަ ދެއްކުމަށްވަނީ، އަންގަވާފައެވެ. އެއީ، ޙަޤީޤަތާ ޙިލާފު ވާހަކަ ދައްކައި ހެދުމަކީ، މިސްތަކުންގެ މެދުގައި ތިމާގެ އަގުވެއްޓޭ ކަމަކަށް ވާތީ އެވެ. އަދި އެކަމަކީ، މުޖުތަމަޢުގައި ފިތުނަ ފަސާދަ އުފެދޭ ކަމަކަށްވެސް ވާތީ އެވެ.

އެހެންކަމުން، ތެދުބަހުން ޙަޤީޤަތާ އެއްގޮތަށް ވާހަކަ ދައްކައި ހެދުމަކީ، މުޖުތަމަޢުގެ ހަމަޖެހުމަށް މަގުފަހިކޮށްދޭ ކަމެކެވެ. އެއްބަނޑު އެއްބަފާކަމާއި، ރަހުމަތްތެރިކަމުގެ ގުޅުންތައް ވަރުގަދަ ކޮށްދޭ ކަމެއްވެސް މެއެވެ.

އިސްލާމްދީން ބިނާވެފައިވަނީ، ތެދުމަގުގެ މައްޗަށެވެ. ޙަޤީޤަތުގެ މައްޗަށެވެ. އެހެންކަމުން، އިސްލާމީ އުޞޫލަކަށް ވާނީ، ދޮގު ހެދުމާއި ޙަޤީޤަތާ ޙިލާފު ވާހަކަތަކުން ދުރުހެލިވުމެވެ. ސާފުސީދާ ސާބިތު ބަހުން ވާހަކަ ދެއްކުމެވެ. އަދި ކުރާ ކޮންމެ ކަމެއްގައިވެސް ތެދުވެރިވުމެވެ.

ބުއްދި ޤަބޫލުކުރާ ސާބިތު ބަހުން ވާހަކަ ދެއްކުމާއި، ޙަޤީޤަތެއްނެތް ވާހަކަ ނުދެއްކުމާއި، މީސްތަކުންގެ މެދުގައި ހަމަނުޖެހުމާއި ފިތުނަ އުފެދޭފަދަ ވާހަކަ ދެއްކުމުން ދުރުހެލިވުމަކީ، އީމާންކަމުގެ ފާޅުކަންބޮޑު ދަލީލެއްކަން ބަޔާން ކުރައްވައި، މާތްﷲ ވަހީ ކުރެއްވިއެވެ. ( يُثَبِّتُ ٱللَّهُ ٱلَّذِينَ ءَامَنُوا۟ بِٱلْقَوْلِ ٱلثَّابِتِ فِى ٱلْحَيَوٰةِ ٱلدُّنْيَا وَفِى ٱلْـَٔاخِرَةِ) {އިބްރާހިމް: 27} މާނައީ: ”ދުނިޔޭގެ ހަޔާތުގައްޔާއި އާޚިރަތުގައި ސާބިތުވެގެންވާ (ޙައްޤު) ބަހުން، އީމާންވި މީހުންނަށް ﷲ ސާބިތުކަން ދެއްވައެވެ.“

ގުޅުންހުރި ލިޔުންތައް

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!