ދިވެހިރާއްޖޭގައި ވަޒީފާ އަދާކުރާ އެންމެންނަންހެން އެނގޭ އެއް ކަމަކީ، ސިކްލީވް އަކީ ބަލިވުމުން ނަގާ ސަލާމެކެވެ. އެހެންނަމަވެސް، ގިނަ މީހުން ދެކޭގޮތުގައި ސިކްލީވް ނެގުމަކީ ހަމައެކަނި ޖިސްމާނީ ބައްޔެއް ޖެހުމުން ނުވަތަ ވުމުން ނެގޭ ސަލާމެކެވެ. މިއީ ވަރަށް ބޮޑު އޮޅުމެކެވެ. ކުށްހީއެކެވެ.
އިންސާނާ ބަލިވާ ކިތައްމެ ގޮތެއް ހުރެއެވެ. އޭގެ ތެރޭގައި ޖިސްމާނީ ބަލިބައްޔާއި، ނަފްސާނީ ބަލިބައްޔާއި އަދި ރޫހާނީ ބަލިބަލި ހިމެނެއެވެ. މި ހުރިހާ ބާވަތެއްގެ ބަލިތަކަކީވެސް އިންސާނާގެ ދުޅަހެޔޮކަމަށް އަސަރުކުރާ ކަންކަމެވެ. އެހެންކަމުން، މި ހުރިހާ ބާވަތެއްގެ ބައްޔަކަށްވެސް ސިކްލީވް ނެގެން ޖެހޭނޭ ކަމީ އިންސާނާގެ ހަމަ ބުއްދި ގަބޫލުކުރާ ކަމެކެވެ.
ނަފްސާނީ ބަލިތަކަކީ އަޅުގަނޑުމެންގެ މުޖުތަމަޢުގައި އެހާ ބޮޑަށް ވާހަކަ ދެކެވި، ސަމާލުކަން ދެވޭ ކަމަކަށް ނުވިޔަސް، މިއީ ވަރަށް ގިނަ މީހުން ތަހައްމަލު ކުރާ ކަމެކެވެ. ކަންބޮޑުވުމާއި، ނިދި ނުލިބުމާއި، ކެއުމުގެ އާދަތަކަށް އަންނަ ބަދަލުތަކާއި، އަދި ޑިޕްރެޝަން ފަދަ ކަންކަމަކީ ނަފްސާނީ ދުޅަހެޔޮކަމަށް ނޭދެވޭ އަސަރު ކުރުވާ ކަންކަމެވެ. މިފަދަ ޙާލަތްތަކުގައި، މީހަކަށް އޭނާގެ މަސައްކަތް އެންމެ ރަނގަޅަށް ނުކުރެވިދާނެއެވެ. އެހެންކަމުން، މިފަދަ ޙާލަތްތަކުގައިވެސް ސިކްލީވް ނެގުމަކީ އެކަށީގެންވާ ކަމެއް. މިއީ ބޭރުފުށުން ފެންނަން ހުންނާނެ ބަލި ބައްޔެއް ނޫނެވެ. އަދި މިއީ ފާޅުގައި އެވާހަކަތައް ދައްކަން ކެރޭފަދަ ބަލި ބައްޔެއްވެސް ނޫނެވެ.
ނަފްސާނީ ދުޅަހެޔޮކަމަށް އަހައްމިއްޔަތުކަން ދިނުމަކީ ވަރަށް މުހިންމު ކަމެކެވެ. ނަފްސާނީ ބަލިތަކަށް ފަރުވާ ހޯދުމަކީ ލަދުގަންނަންޖެހޭ ކަމެއް ނޫނެވެ. އަދި ހަމައެހެންމެ، ނަފްސާނީ ބައްޔެއްގެ ސަބަބުން ސިކްލީވް ނެގުމަކީވެސް ލަދުގަންނަންޖެހޭ ކަމެއް ނޫނެވެ. ވަޒީފާދޭ ފަރާތްތަކުން މުވައްޒަފުންގެ ނަފްސާނީ ދުޅަހެޔޮކަމަށް އިސްކަންދީ، އެކަމަށް ބޭނުންވާ އެހީތެރިކަން ފޯރުކޮށްދިނުމަކީ އެހާމެ މުހިންމު ކަމެކެވެ. ބޭރުފުށުން ފެންނަން ނުހުންނަ ބަލިބައްޔަށް ސިކްލީވް ޖަހާ ޖެހުމަށް ޝަކުވާ ކުރުމެއް ނެތެވެ. ގާނޫނުން ކޮންމެ މުވައްޒަފަކަށް ކަށަވަރުކޮށްދީފައިވާ މި ސިކްލީވް ތަކަކީ ”ބަލި“ ވުމުން ނެގެން ޖެހޭ، ކޮންމެ މުވައްޒަފެއްގެ ހައްގެކެވެ. އެ ހައްގުގެ ބޭނުން ހިފާ ހިފުމަކީ، އެކަމާ ޝަކުވާ ކުރެވި ސުވާލު އުފެއްދޭނޭ ޖާގައެއް އޮތްކަމެއްވެސް ނޫނެވެ.
ސިކްލީވް ނެގުމަކީ ހަމައެކަނި ޖިސްމާނީ ބައްޔެއް ޖެހުމުން ނުވަތަ ވުމުން ނެގޭނެ ކަމެއް ނޫނެވެ. ނަފްސާނީ ބަލިތަކަކީވެސް ހަމަ އެހާމެ މުހިންމު، އަދި ސީރިއަސް ކަމެއް ދޭންޖެހޭ ބަލިތަކެކެވެ. އެހެންކަމުން، ނަފްސާނީ ދުޅަހެޔޮކަމަށް އަޅާލުމަކީ ކޮންމެ މީހެއްގެވެސް ޒިންމާއެކެވެ. އަދި ބޭނުންވެއްޖެ ހިނދެއްގައި އެކަމަށް ސިކްލީވް ނެގުމަކީވެސް ހަމަ ކޮންމެ މުވައްޒަފެއްގެވެސް ހައްގެކެވެ. އެއީ ލަދުގަންނަން ޖެހޭ ކަމެއްވެސް ނޫނެވެ. އެއީ ބޮޑުން ސުވާލު ކުރަން ޖެހޭ، ނުވަތަ ޝަކުވާ ކުރަން ޖެހޭ ކަމެއްވެސް ނޫނެވެ. ”ބަލި“ ކަމުގެ އިހުސާސް ކުރެވޭނަމަ، ސިކްލީވް ނެގުމަކީ އެކަމުގައި އެއްވެސް މައްސަލައެއް އޮތްކަމެއް ނޫނެވެ. ނަމަވެސް ތެދުވެރި ވާންވާނެއެވެ. އިހުލާސްތެރިވާންވާނެއެވެ.
