ކުޅި ފިލުވަން ފޮނި އެއްޗަކަށްވުރެ މޮޅީ ފިނި އެއްޗެއް!
ދެންމެ | 07 ފެބްރުއަރީ 2025

ކުޅި އެއްޗެއް ކައިފިނަމަ، އަނގައިގައި އުފެދޭ ޚާއްޞަ ރަހައެއް ފިލުވުމަށް ގިނަ މީހުން އިޚްތިޔާރުކުރަނީ ފޮނި އެއްޗެކެވެ. ބައެއް މީހުން ދެކޭ ގޮތުގައި ކުޅި އަކީ ރަހައެއް ނޫނެވެ. އެއީ ވޭނެކެވެ. ނުވަތަ ތަދެކެވެ. ޙަޤީޤަތުގައި ކުޅި ފިލުވުމަށް އެންމެ އެކަށީގެންވަނީ ފިނި އެއްޗެކެވެ. މިކަމުގެ ސަބަބުތަކާއި ފައިދާތަކަށް މި ލިޔުމުގައި ބަލައިލާނަމެވެ.

ފިނި އެއްޗެއް ބުއިމުން އަނގައިގެ ފިނިހޫނުމިން ވަގުތުން ދަށްވެއެވެ. މިއީ ކުޅި ރަހަ ފިލުވުމަށް ވަރަށް އެހީތެރިވާ ކަމެކެވެ. ނަމަވެސް، ފޮނި އެއްޗެއް ކެއުމުން ކުޅި ރަހައާ އެކުވެ، އަނގައިގައި އިތުރު ރަހައެއް އުފެދުމުގެ ފުރުޞަތު އޮވެއެވެ.

ފިނި ފެން ބުއިމުން އަނގަތެރެ ސާފުވެ، ކުޅި ރަހަ ފިލުމަށް އެހީތެރިވެދެއެވެ. ފިނި ފެނުން އަނގަ ދޮވެލުމުން، ކުޅި ރަހަ އުފައްދައިދޭ ކެމިކަލްތައް އަނގައިގެ ތެރެއިން ފިލައިދެއެވެ.

ފިނި އެއްޗެހި ބުއިމުން އަނގައިގެ ނާރުތަކަށް ”ސްޓިމިއުލޭޝަން“ އެއް ލިބެއެވެ. މިކަމުގެ ސަބަބުން ކުޅި ރަހަ އަވަހަށް ފިލައި، އަނގައިގެ ހާލަތު އިހު ހުރިގޮތަށް ބަދަލުވެދެއެވެ. މީގެ އިތުރުން އަނގަތެރެ ފިނިކޮށްލުމުން، އަނގައިގާ ހިއްސު ދެނެގަންނަ ނާރުތަކުގެ ހިއްސު ދެނެގަންނަ މިންވަރު ބޮޑުތަނުން ކުޑަކޮށްދެއެވެ. ނަތީޖާއަކަށް ވަނީ ކުޅީގެ އިހުސާސް ކުރެވޭ މިންވަރު ކުޑަކޮށްދިނުމެވެ.

ފޮނި އެއްޗެއް ކެއުމަކުން، އަނގައިގެ ހިއްސުތަކަށް ކުރާ މާބޮޑު އަސަރެއް ނޯވެއެވެ. ނާރުތަކުން ކުޅިރަހަ ދެނެގަނެ، ކުޅީގެ އިހުސާސް ކުރުވާ މިންވަރުވެސް ކުޑަކޮށެއް ނުދެއެވެ. ފޮނި އެއްޗެއް ކެއުމުން ކުޅި ރަހައިގެ ތެރެއަށް އެހެން ރަހައެއް އެކުވެގެން ދެއެވެ. މިގޮތުން ކުޅީގެ އިހުސާސް ކުޑަކުރުމަކީ އަވަހަކަށް ވާނެ ކަމެއް ނޫނެވެ.

އެހެންކަމުން ކުޅި ފިލުވުމަށް ފޮނި އެއްޗަކަށްވުރެ ފިނި އެއްޗެއްގެ ފައިދާ މާ ބޮޑެވެ. އާއްމުކޮށް ކުޅި ފިލުވަން އަހަރެމެން ފޮނި އެއްޗެއް ބޭނުން ކުރި ނަމަވެސް، ކުޅި ފިލުވަން ފިނި އެއްޗަކުން ކުރާ އަސަރު ބޮޑުތަނުން ބޮޑެވެ. މިކަން އަމިއްލަފުޅަށްވެސް ތަޖުރިބާކުރައްވާށެވެ! ތަފާތު ދެނެގަނެވޭނެއެވެ!

ގުޅުންހުރި ލިޔުންތައް

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!