ދިވެހިންނަކީ މަސްކެއުމަށް ވަރަށް ލޯބިކުރާ ބައެކެވެ. އަދި ގިނަ ދިވެހިންގެ ކެއުމުގެ މައިގަނޑު ބައެއްގެ ގޮތުގައި މަސް ހިމެނެއެވެ. ނަމަވެސް، މަސްކެއުމުގައި ވެސް ސަމާލުވާންޖެހޭ ކަންތައްތަކެއް ހުރެއެވެ. އޭގެ ތެރެއިން އެންމެ މުހިންމު އެއް ކަމަކީ މަހުގެ ކަށިތަކަށް ސަމާލުވުމެވެ. ކަރުގައި މަހު ކައްޓެއް ތާށިވުމަކީ ވަރަށް ނުރައްކާތެރި އަދި ވޭންދެނިވި ކަމެކެވެ. މި މަޒުމޫނުގައި އަޅުގަނޑުމެން ބަލައިލާނީ ކަރުގައި މަހު ކައްޓެއް ތާށިވެއްޖެނަމަ ކުރަންވީ ކަންތައްތަކާއި، މިފަދަ ހާލަތެއް ދިމާވިޔަ ނުދިނުމަށް އަޅަންވީ ފިޔަވަޅުތަކަށެވެ.
ކަރުގައި މަހު ކައްޓެއް ތާށިވެއްޖެނަމަ، އެންމެ ފުރަތަމަ ކުރަންވީ ކަމަކީ ހަމަޖެހުމެވެ. ބިރުގަތުމާއި ކަންބޮޑުވުމުގެ ބަދަލުގައި، ހިތްވަރުގަދަކޮށް އެކަން ހައްލުކުރުމަށް މަސައްކަތްކުރުމެވެ. ދެން ކުރަންވީ ކަމަކީ ބޮޑު ތައްޓެއްގެ ފެން ބުއިމެވެ. މިއީ ކައްޓަށް ބާރުލައި، އަނގައިގެ ތެރެއިން ތިރިއަށް ވައްޓާލުމަށް އެހީތެރިވެދޭނެ ކަމެކެވެ. އަދި މިގޮތަށް ކަން ކުރުމުން ކަށި ނު ނެއްޓޭނަމަ، ރަނގަޅަށް ނުހަފާ ބަތް މުށެއް ނުވަތަ ދޮންކެޔޮ ވަކެއް ދިރުވާލެވިދާނެއެވެ. ބައެއް މީހުން ލުނބޯ ފަޅިއެއްވެސް ކުޑަކޮށް ހަފާލުމަށްފަހު ދިރުވާލައެވެ. މިކަންކަމަކީވެސް ކަރުގެ ތެރެއިން ކަށި، ތިރިއަށް ދުއްވާލުމަށް ކުރެވޭ ކަންކަމެވެ.
މީގެ އިތުރުން، ލުނބޯހުތު ފެން ބުއިމަކީ ވެސް ކަށި ނެއްޓުމަަށް ނުވަތަ ދިޔުމަށް އެހީވެދޭނެ ކަމެކެވެ. ލުނބޯ ހުތުގައި އެސިޑް އެކުލެވުމުގެ ސަބަބުން ކަށިނކުޑަކޮށް މަޑުކޮށްލަދީ އެޅިފައި އިން ތަނުން ނެއްޓުމަށް އެހީތެރިވެެދެއެވެ.
މި ގޮތްތަކުން އެއްވެސް ގޮތަކުން ކަށި ނުނެއްޓިއްޖެނަމަ، ލަސްނުކޮށް ޑޮކްޓަރަކަށް ދައްކަން ޖެހޭނެއެވެ. ޚާއްޞަކޮށް ކަށި ތާށިވެފައިވާ ތަނުގައި ރިހުމާއި ވޭން އިހުސާސްވާނަމަ، ނުވަތަ ދުޅަވެ، ރަތްވާން ފަށައިފިނަމަ ވަގުތުން ޑޮކްޓަރަށް ދެއްކުން މުހިންމެވެ.
ކަރުގައި މަހު ކައްޓެއް ތާށިވުމުގެ ނުރައްކާ ކުޑަކުރުމަށްޓަކައި، މަސް ކެއުމުގައި ސަމާލުވާންޖެހޭ ބައެއް ކަންތައްތައް ވެސް ހުރެއެވެ. މިގޮތުން، މަސް ރަނގަޅަށް ކަށިނަގައި ސާފުކުރުމަށްފަހު ނޫނީ ނުކެއުމާއި، މަސް ކާއިރު ރަނގަޅަށް ހަފަމުން ކެއުން ހިމެނެއެވެ. އަދި ކުޑަކުދިންނަށް މަސް ކާންދޭއިރު، ބޮޑެތި މީހުން އެކުދިންނަށް މަސް ރަނގަޅަށް ސާފުކޮށްދިނުމަކީ ވެސް މުހިންމު ކަމެކެވެ.
ކަރުގައި ޖެހިފައިވާ ކަށި، ކަރުން ނެއްޓިގެން ދިޔައެއް ކަމަކު، އެ ކަށި ހެރިފައި ހުރި ތަނުގައި ރިހިފައި ހުރެދާނެއެވެ. މިހާލަތުގައިވެސް އިހުސާސް ކުރެވޭނީ ކަރުގައި ކައްޓެއް ޖެހިފައި ހުންނަ ހެންނެވެ. އާއްމުގޮތެއްގައި ކަރުގައި ޖެހޭ ކަށި އޭގެ ޒާތަށް ނެއްޓިގެން ހިނގައިދާނެއެވެ. މިއީ ކަންބޮޑުވާންވީ ކަމެއް ނޫނެވެ. މިދެންނެވި ހައްލުތަކުންވެސް ހައްލު ނުވެއްޖެނަމަ ޑަކްޓަރަކަށް ދައްކާށެވެ. އަނގަތެރެ އާއި އަރުތެރެ އައްސިކޮށްލާ ސްޕްރޭއަކުން އައްސިކޮށްލުމަފު، ކަރުތެރެ ތަނަވަސްކޮށްދޭ އާލާތަކުން ކަރިތެރެ ތަނަވަސްކޮށްލާ ކަށި ހޯދާ، އެ ކަށި ނެގުމަކީ ޑަކްޓަރުންނަށް މާ އުނދަގޫކަމެއް ނޫނެވެ. ވިސްނަންވީ ހާސްނުވެ، މީހާ ހަމަޖެހެވޭތޯއެވެ. އޭރުން ހުރިހާ ކަމެއްވެސް ރަނގަޅުވެދާނެއެވެ.
