ސުޕްރީމް ކޯޓުގެ ބެންޗުން ސުވާލު އުފެއްދީ މަޖިލީހުގެ އިމްތިޔާޒާމެދު: ނާޒިމް
ދެންމެ | 25 ފެބްރުއަރީ 2025

ރައްޔިތުންގެ މަޖިލީހުގެ އިމްތިޔާޒާމެދު ސުޕްރީމް ކޯޓުގެ ބެންޗުން ސުވާލު އުފައްދަވާފައިވާ ކަމަށް ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް މިއަދު ވިދާޅުވެއްޖެ އެވެ.

ސުޕްރީމް ކޯޓުގެ ފަނޑިޔާރުންގެ ބެންޗުގައި ހިމެނޭ ފަނޑިޔާރުންގެ އަދަދު މަދުކޮށްލުމަށް ހުށަހަޅާފައިވާ ބިލްގެ ބަހުސްގައި ނާޒިމް ވިދާޅުވީ އިސްލާމްދީނުގެ އަސްލަކާ ހިލާފު ނުވާ ގޮތެއްގެ މަތިން ގާނޫނު ހެދުމާއި ގާނޫނަށް ބަދަލު ގެނައުމުގެ ބާރު ގާނޫނުއަސާސީ އިން މަޖިލީހަށް ލިބިފައިވާ ކަމަށެވެ.

”އެހެންނަމަވެސް މި މަޖިލީހުގެ އިމްތިޔާޒުތަކާ ދޭތެރޭ ވެސް މިހާރު މި އޮތް ސުޕްރީމް ކޯޓުގެ ބެންޗުން ސުވާލު އުފެއްދިތަން އަޅުގަނޑުމެންނަށް ދާދިފަހުން ފެނިގެން ދިޔަ. އާދެ، އެ ސުވާލަކީ ގާނޫނުއަސާސީގައި ދިވެހިރާއްޖޭގެ ދީނަކީ އިސްލާމް ދީން ކަމަށް ބަޔާންކޮށްފައި ވަނިކޮށް ރާއްޖޭގެ ދީނަކީ އިސްލާމް ދީން ނޫންކަމަށް މަޖިލީހުން ނިންމައިފިއްޔާ ދެން ވެސް އެ މައްސަލަ ސުޕްރީމް ކޯޓަށް ނުބެލޭހެެއްޔޭ،“ ނާޒިމް ވިދާޅުވި އެވެ.

ނާޒިމް ވިދާޅުވީ އިސްލާމުދީނާ ހިލާފު ގާނޫނެއް މަޖިލީހަށް ބަލައިގަތުމާއި ބަހުސްކުރުމަކީވެސް މުސްތަހީލް ކަމެއްގެ ގޮތުގައި އޮއްވާ އެ ގޮތަށް ސުވާލު އުފެއްދުމުން ސުޕްރީމް ކޯޓުގެ ބެންޗާމެދު ވިސްނާލަންޖެހޭ ކަމަށެވެ.

”އިސްލާމުދީނާ ހިލާފު އެއްވެސް ގާނޫނެއް މި މަޖިލީހަށް ބަލައިގަތުމަކީވެސް މަޖިލީހުގައި ބަހުސްކުރުމަކީވެސް މުސްތަހީލް ކަމެއްގެ ގޮތުގައި އޮއްވާ އެ ގޮތަށް ސުވާލު އުފެއްދީމާ އަޅުގަނޑުމެން ސުޕްރީމް ކޯޓުގެ ބެންޗާދޭތެރޭ ވިސްނާލަން އެބަޖެހޭ،“ ނާޒިމް ވިދާޅުވި އެވެ.

ނާޒިމް ވިދާޅުވީ ސިޔާސީ އޮއިވަރުގައި ޖެހިގެންނުވާނެ ބަޔަކު ސިޔާސީ އޮއިވަރަށް ލެނބިގެންދާ މަންޒަރު މިއަދު ފެންނަ ކަމަށެވެ.

”އަޅުގަނޑުމެންނަށް މިއަދު ފެނިގެން މިދަނީ ސިޔާސީ އޮއިވަރުގައި ޖެހިގެން ނުވާނެ ބަޔަކު ސިޔާސީ އޮއިވަރަށް ލެނބިގެން ދާތަން، އަދި ސިޔާސީ ވެރިން ޖަހާ ބެރުތަކަށް ނެށުމަށް ތައްޔާރަށް ތިބި ކަމުގެ ސިގްނަލްތައް ދެމުންދާތަން،“ ނާޒިމް ވިދާޅުވި އެވެ.

ނާޒިމް ވިދާޅުވީ ސިޔާސީ އޮއިވަރުން ބަރީއަވެގެންވާ ބަޔަކަށް ފަނޑިޔާރުންވާން ޖެހޭ ކަމަށާއި ނަމަވެސް ފެންނަނީ އެކަން އެގޮތަށް ނުވާ މަންޒަރު ކަމަށެވެ.

ގުޅުންހުރި ލިޔުންތައް

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!