މިއަހަރާއި އަންނަ އަހަރަކީ ވަޢުދުފުއްދުމުގެ އަހަރުކަމަށާއި، މި ދެއަހަރުގެ ބަޖެޓަކީ ވަޢުދު ފުއްދުމުގެ ބަޖެޓެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ދ. ހުޅުދެލީގެ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުންނެވެ.
އެމަނިކުފާނުގެ ވާހަކަފުޅުގައި ރައްޔިތުން ބޭނުންވާ ގިނަ ކަންކަން ފެށޭނެ އަހަރަކަށް މިއަހަރު ވާނެކަމަށާއި، ހުޅުދެއްޔަށް އޮތް އެންމެބޮޑު ދައްޗަކީ ބިމުގެ ދަތިކަންކަމަށެވެ. ވުމާއެކު އެރަށުގެ ފަޅުން ހިއްކެން އޮތް އެންމެ ބޮޑަށް ހިއްކައި ހިމާޔަތްކުރުމަކީ މިއަހަރު ކުރިއަށްގެންދާނެ މަޝްރޫޢެއްކަމަށް ވިދާޅުވިއެވެ. ރައީސް ވަނީ އެ މަޝްރޫޢު ނިންމެން އޮތް އެންމެ އަވަހަށް ނިންމަވައިދެއްވާނެކަމުގެ ޔަޤީންކަން ދެއްވާފައެވެ.
މީގެ އިތުރުން ސިއްޙީ ދާއިރާއިން ހުރި މައްސަލަ ހައްލުކުރުމަށްވެސް ވަޢުދުވެފައިވާކަމަށާއި، މިއަހަރު ސިއްޙީ ދާއިރާއިން ޢުމްރާނީގޮތުން ކުރާ ހުރިހާ މަސައްކަތެއް ހުރިހާ ރަށެއްގައި ފަށާއިރު ހުޅުދެލީގައިވެސް ފަށާނެކަމަށް ރައީސް ވިދާޅުވިއެވެ. އަދި އެރަށަށް ބޭނުންވާ ފެންވަރުގެ ޢިމާރާތާއި ސިއްޙީ ވަސީލަތާއި މުވައްޒަފުން ހަމަވެފައިވާ ފުރިހަމަ ސިއްޙީ މަރުކަޒަކަށް ހަދައިދޭނެކަމަށްވެސް ރައީސް ވިދާޅުވިއެވެ.
ދ. އަތޮޅުގައި މީހުން ދިރިއުޅޭ ހުރިހާ ރަށަކަށް ކުރެއްވި ދަތުރުފުޅު ނިންމަވާލެއްވުމަށްފަހު، ރައީސް ޑރ. މުޙައްމަދު މުޢިއްޒު މިއަދު ވަނީ މާލެ ވަޑައިގެންފައެވެ. މި ދަތުރުފުޅަކީ، ރައީސްގެ ވަޢުދާއި އެއްގޮތަށް ރައްޔިތުންގެ ގާތަށް ވަޑައިގެން ރައްޔިތުންގެ ހާލަތުބެއްލެވުމަށާއި މި ހިނގާ ރިޔާސީ ދައުރުގެ ތެރޭގައި ދެފަހަރު މީހުން ދިރިއުޅޭ ކޮންމެ ރަށަކަށް ޒިޔާރަތް ކުރެއްވުމަށް ވެވަޑައިގެންފައިވާ ވަޢުދާއި އެއްގޮތަށް ސިލްސިލާކޮށް ކުރިއަށްގެންދަވާ ދަތުރުފުޅެކެވެ.
މިދަތުރުފުޅުގައި ރައީސް ވަނީ އެ އަތޮޅު ކުޑަހުވަދޫ، މާއެނބޫދޫ، ބަނޑިދޫ، މީދޫ، ރިނބުދޫ އަދި ހުޅުދެއްޔަށް ވަޑައިގެން، ރަށު ކައުންސިލްތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާއި، މުވައްސަސާތަކުގެ ވެރިން އަދި ރައްޔިތުންނާ ބައްދަލުކުރައްވައި، ކަންބޮޑުވުންތައް އަޑުއައްސަވާފަ އެވެ.
އަދި ރައްޔިތުން އެދޭ ޚިދުމަތްތައް ފޯރުކޮށްދިނުމުގެ ގޮތުން، މުހިންމު ނިންމެވުންތަކެއް ނިންމަވައި ވަނީ އިއުލާން ކުރައްވާފަ އެވެ. ރާއްޖޭގެ ރަށްތަކަށް ރައީސް ކުރައްވާ ދަތުރުރައް ރޯދަ މަހަށް މެދުކަނޑާލުމަށްފަހު އަލުން ފެށުމަށް ހަމަޖެހިފައިވަނީ އީދު ބަންދަށް ފަހު އެވެ.
