ފްލެޓު ލިސްޓަށް ޒައްރެއްގެ މިންވަރުގެ ނުފޫޒެއްވެސް ފޯރުވާފައި ނުވާނެ: ރައީސް
ދެންމެ | 27 ފެބްރުއަރީ 2025

ގެދޮރުވެރިޔާ ސްކީމުގެ ދަށުން ހުޅުމާލެ ދެވަނަ ފިޔަވަހިން ދޫކޮށްފައިވާ 4000 ފުލެޓު ލިބޭ މީހުންގެ ލިސްޓު މިހާރު އާންމުކޮށްފައިވާއިރު، އެ ލިސްޓަށް، އެއްވެސް މީހެއްގެ ފަރާތުން، ޒައްރެއްގެ މިންވަރުގެ ނުފޫޒެއް ވެސް ފޯރުވާފައި ނުވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ، އައު ޑިޒައިނެއްގައި އިއްޒުއްދީން ފާލަން ރަސްމީކޮށް ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.

މި 4000 ފްލެޓު ލިބޭ ފަރާތްތައް މިހާރު އިއުލާނުކޮށްފައިވާކަން ފާހަގަކުރައްވައި ރައީސް ވަނީ، މި ލިސްޓަކީ، ކުރީ ސަރުކާރުން އާންމުކުރި ލިސްޓުގައި، އޭސީސީން ފާހަގަކޮށްފައިވާ ކަންކަމަށް ބެލުމަށްފަހު، އެ ސަރުކާރުން ކަނޑައަޅާފައިވާ ޝަރުތުތަކަށް، ޕޮއިންޓުދޭނެ އުސޫލަށް ބެލުމަށްފަހު އެކުލަވާލައި އާންމުކޮށްފައިވާ ލިސްޓެއްކަމަށް ވިދާޅުވެފައެވެ.

ރިޔާސީ ވައުދުފުޅާ އެއްގޮތަށް، އެމީހަކަށް ގޯތި ނުވަތަ ފުލެޓު ލިބުނު ތާކުން އެ އެއްޗެއް ދެއްވާނެކަމަށް ވިދާޅުވާ ވިދާޅުވުން ތަކުރާރުކުރައްވައި ރައީސް ވަނީ، މިއަދު ވެސް، އިއްޔެވެސް އަދި މާދަމާ ވެސް ދެމިހުންނަވާނީ އެ ވައުދުފުޅުގެ މަތީގައިކަމުގެ ޔަގީންކަން ދެއްވާފައެވެ.

މިހާރު ނެރެފައިވާ ލިސްޓުގައި، ކުރީ ސަރުކާރުން ނެރުނު ލިސްޓުގައި ނަންހުރި ބައެއް މީހުންގެ ނަން އުނިކޮށްފައިވާކަން ފާހަގަކުރައްވައި ރައީސް ވިދާޅުވީ، ކަން އެހެން ހިނގި ނަމަވެސް، މި ލިސްޓަށް އެއްވެސް މީހެއްގެ ނުފޫޒެއް ފޯރާފައިނުވާނެ ކަމަށެވެ.

”ލިސްޓު ނުކުތްއިރުގައި ކުރީ ސަރުކާރުން ނެރުނު ލިސްޓުން މަދުވެއްޖެ ބަޔަކު. އޭގެ ސަބަބުތައް އެ ލިސްޓު އިއުލާނުކުރެވިފައިވާއިރު އޭގެން އުނިވި ނުވަތަ ނުހޮވުނު ކޮންމެ މީހެއްގެ މައުލޫމާތު ތެރޭގައި ހިމެނިފައިވާނެ. އަޅުގަނޑު ދޭނެ ޔަގީންކަމަކީ، އަޅުގަނޑު ހަމަ ޔަގީންކަމާއެކީގައި އިރާދަކުރެއްވިއްޔާ ދޭ ޔަގީންކަމެއް މީ، އެންމެ ބޮޑު ޔަގީންކަމަކީ، މި ލިސްޓު ހެދުމުގައި ޒައްރެއްގެ މިންވަރުގެ ވެސް ނުފޫޒެއް ފޯރުވާފަ، އެއްވެސް ފަރާތަކުން ނުވާނެ. މިއީ ނުފޫޒުން އެއްކިބާ ވެގެން ނެރެފައިވާ ލިސްޓެއް. މިއީ ރާއްޖޭގައި އަޅުގަނޑު ހިތުން، އަޅުގަނޑަށް ހަމަ ޔަގީނުންވެސް ގެދޮރުވެރިކަމުގެ ދާއިރާގެ ކަންކަމުގެ މައުލޫމާތު އެނގެން ފެށި ހިސާބުން އަދި އެކިއެކި ހައިސިއްޔަތުތަކުން އެންމެ ޖޫނިއާ ލެވެލްއިން ފެށިގެން ސަރުކާރުގެ ކަމާބެހޭ ދާއިރާގައި އުޅެން ފެށި ހިސާބުން ނުފޫޒެއް ނުފޯރުވާ ހައުސިންއިން ގެދޮރު ލިބޭނެ މީހުންގެ ލިސްޓެއް ނިކުތް ފުރަތަމަ ފަހަރު“.

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު

ރައީސްގެ ވާހަކަފުޅުގައި ވަނީ، ގަސްދުގައި އެއްވެސް ރައްޔިތަކު ފްލެޓް ލިސްޓުން އުނިކޮށްފައިނުވާނެކަމަށް ވިދާޅުވެފައެެވެ. އަދި ރައްޔިތަކަށް ލިބިފައިވާ އެއްވެސް އެއްޗެއް އަތުލުމުގެ ޝައުގެއް ސަރުކާރުގެ ކިބައިގައި އެއްވެސް މިންވަރަކަށް ނެތް ކަމަށް ވެސް ރައީސް ވިދާޅުވިއެވެ.

އަދި ލިސްޓުގައި ނެތް ރައްޔިތުންގެ ތެރެއިން ޝަކުވާއެއް އޮތް ރައްޔިތަކަށް ޝަކުވާ ހުށަހެޅުމުގެ ފުރުސަތު އޮންނާނެކަމަށާއި ކަންބޮޑުވުމެއް އޮތްނަމަ އެކަން ކުރުމަށް ވެސް އެދިވަޑައިގެންނެވިއެވެ.

ކުރީ ސަރުކާރުން ނެރުނު ލިސްޓުގައި ދެ ކޮޓަރީގެ އެޕާޓްމެންޓަށް 1،218 ފަރާތެއް ޝަރުތު ހަމަވާއިރު، ތިން ކޮޓަރީގެ އެޕާޓްމެންޓަށް 3،721 ފަރާތެއް ޝަރުތު ހަމަވެފައިވެއެވެ.

އެހެންނަމަވެސް މިހާރު އާންމުކޮށްފައިވާ ލިސްޓުގައި ފްލެޓް ލިބޭ ކަމަށް ކަނޑައަޅާފައިވަނީ 1،820 މީހަކަށެވެ. މި ލިސްޓްގައި 2،692 މީހެއްގެ ފޯމް ޝަރުތު ހަމަނުވާ ކަމަށް ކާނޑައަލާފައިވާއިރު 424 ފަރާތެއްގެ ޕޮއިންޓްތަކަށް އައި ބަދަލާއެކު ފްލެޓް ލިސްޓް ލިބޭ މީހުންގެ ލިސްޓުން ވަނީ އުނިވެފައެވެ.

ފްލެޓް މަޝްރޫއުއާ ގުޅޭ ގޮތުން ބޭއްވި ނޫސްވެރިންގެ ބައްދަލުވުމުގައި ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވީ މި ސަރުކާރުން ބަލާފައި ވަނީ ކުރީ ސަރުކާރުން ނެރެފައިވާ ލިިސްޓުގައި ހިމެނޭ 4000 މީހުންނަކީ ޝަރުތު ހަމަވެފައި ތިބި މީހުންތޯ ކަމަށެވެ.

އެގޮތަށް ބެލީ އޭރު ސަރުކާރުން ތިން ކޮޓަރީގެ ފްލެޓަށް ޝަރުތު ހަމަވާ ކަމަށް ކަނޑައަޅާފައިވާ 76 ޕޮއިންޓުން މަތިން މާކްސް ލިބޭ މީހުން ބަލައި، އަދި ބާކީވާ ފްލެޓްތައް 75 ޕޮއިންޓު ލިބޭ މީހުންގެ މެދުގައި ގުރު ނަގާ ގޮތަށަށް ކަމަށެވެ. އަދި ދެ ކޮޓަރީގެ ފްލެޓަށް ޝަރުތު ހަމަވާނީ 73 ޕޮއިންޓު ލިބިގެން ކަމަށް އޭރު އޮތީ ކަނޑައަޅާފައި ކަމަށް އޭނާ ވިދާޅުވި އެވެ.

ގުޅުންހުރި ލިޔުންތައް

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!