ބިރުވެރި ހުވަފެން އެފެންނަނީ ޝައިޠޯނާގެ ކިބައިންނެވެ. ބިރުން އަޑުގަދަކުރެވުމާއި ހޭލެވޭއިރު ތުރުތުރު އެޅުމާއި ދައުހިއްލާފައިވުން، އަޑުބޭރުނުވެ ވާހަކަނުދެއްކުން ފަދަ ކަންކަން މެދުވެރިއެވަނީ އެހުވަފެނަކީ ޝައިޠޯނާގެ ކިބައިން ފެނުނު ކަންކަމުގައިވާތީއެވެ.
ﷲ ތަޢާލާގެ ޙަޟްރަތުން ފެންނަ ހުވަފެނުގައި ފެންނާނީ ހެޔޮކަންކަމެވެ. ހެޔޮ ނަޞޭޙަތްތަކެވެ. ހެޔޮ އިރުޝާދުތަކެވެ. ހިތްހަަމޖެހުމާއި އުފާވެރިކަމުގެ ޚަބަރުތަކެވެ. ބިރުގަނެ ކަންބޮޑުވާންޖެހޭނެ އެއްވެސް ކަމެއް ނުފެންނާނެއެވެ. އިން ޝާ ﷲ
މިއީ ޙަދީޘްފުޅުން ޔަޤީންކުރެވެން ހުރި ކަންކަމެވެ. ޞަޙާބީއަކަށް ހުވަފެންފުޅުގައި އެބޭކަލެއްގެ ބޯ މީހަކު ކަނޑައިލުމުން އެބޯފަހަތުން ދުވެވަޑައިގަންނަވަނިކޮށް ހުވަފެންފުޅުން ފެނިވަޑައިގެންނެވި ވާހަކަ ރަސޫލާ ﷺ އަށް ދެންނެވުމުން ޙަދީޘްފުޅު ކުރެއްވެވީ އެއީ ޝައިޠޯނާގެ ކިބައިން މެދުވެރވެވަޑައިގެންނެވި ކަމެއް ކަމަށާއި އެވާހަކަ އެއްވެސް މީހަކުގެ ގާތުގައި ނުދެއްކެވުމަށެވެ. ދައްކާނަމަ ޝައިޠޯނާގެ މަޅީގައި އެމީހަކު ޖެހުނީތީ އޭތި ހީނ އުފާކުރާނެ ކަމަށެވެ.
މިކަންކަން ނުއެނގޭތީ ނަމަވެސް ގިނަ މީހުން އެންމެ ބޮޑަށް ކަންބޮޑުވެ، ދެރަވެ ހިތާމަކުރަނީ އެމީހުންނަށް ކޮންމެވެސް މުޞީބާތެއް ޖެހިގެން އުޅޭތަން ހުވަފެނުން ފެނުމުންނެވެ. ޢާއިލާ ރޫޅި ވިޔަފާރި ބަނގުރޫޓުވެ ވަޒީފާ ގެއްލިގެން ، ނުވަތަ އެކްސިޑެންޓެއްވެގެން އުޅޭތަން ފެނިދާނެއެވެ. ތިމާ ނުވަތަ އެހެން ބައަކު މަރުވެގެން އުޅޭތަންވެސް ފެނިދާނެއެވެ.
މިބާވަތުގެ ހުވަފެނެއް ފެނިގެން އެއްވެސް ވަރަކަށް ކަންބޮޑުނުވާށެވެ! ސަބަބު ވަރަށް ސާފެވެ! މިފަދަ ކޮންމެ ހުވަފެނަކީވެސް ޝައިޠޯނާގެ ކިބައިން ފެންނަ ކަންކަމެވެ. އެއްވެސް ވަރަކަށް ކަންބޮޑުނުވާންވީ އެންމެ ބޮޑު ސަބަބަކީ މީހަކު މަރުވާން އުޅޭކަމެއް ނުވަތަ ފަހުން ވާން އުޅޭކަމެއް (ޣައިބުގައިވާ އެއްވެސް ކަމެއް) ޝައިޠޯނުންނަކަށް ނުއެނގޭނެއެވެ.
އެހެންކަމަށްވާއިއރު ތިބާއަށް ނުވަތަ ޢާއިލާގެ މީހަކަށް ނުވަތަ ގާތް އެކުވެރިއަކަށް ނުވަތަ އެނޫންވެސް މީހަކަށް ދެރައެއް ލިބެން އުޅޭކަން ޝައިޠޯނާއަށް އެނގޭނެ އެއްވެސް ގޮތެއް ނުއޮންނާނެއެވެ. ޝއިޠޯނާއަށް ނުއެނގޭ ކަމެއް އެހެން މީހަކަށް އަންގައިދެވޭނީ ކިހިނަކުން ހެއްޔެވެ؟
– ޑރ. ޔާސިރު ޤާޟީގެ ދަރުސަކުން
